ທາງການລາວທັງໃນຂັ້ນສູນກາງແລະທ້ອງຖິ່ນໄດ້ອະນຸຍາດ
ສຳປະທານທີ່ດິນໃຫ້ເອກະຊົນລາວ ແລະຕ່າງຊາດໄປແລ້ວ
1,281 ສັນຍາ ໂດຍມີເນື້ອທີ່ລວມກັນກວ້າງກວ່າ 3 ແສນ
ເຮັກຕາໃນທົ່ວປະເທດ.
Your browser doesn’t support HTML5
ຟັງລາຍງານ ທາງການລາວ ໄດ້ອະນຸຍາດ ສຳປະທານທີ່ດິນ ກວ້າງກວ່າ 3 ແສນເຮັກຕາ ໃຫ້ເອກະຊົນລາວ ແລະຕ່າງຊາດ.
ກະຊວງຊັບພະຍາກອນທຳມະຊາດ ແລະສິ່ງແວດລ້ອມ ລາຍງານວ່າສະພາບການເຊົ່າຫຼື
ສຳປະທານທີ່ດິນລັດເພື່ອດຳເນີນກິດຈະການຕ່າງໆຢູ່ໃນລາວ ເຊັ່ນໂຄງການດ້ານກະສິກຳ
ແລະປ່າໄມ້ ໂຄງການກໍ່ສ້າງເຂື່ອນໄຟຟ້ານ້ຳຕົກ ໂຮງງານອຸດສາຫະກຳ ການບໍລິການທ່ອງທ່ຽວໄດ້ຂະຫຍາຍຕົວເພີ້ມຂຶ້ນຢ່າງຕໍ່ເນື່ອງ.
ໂດຍໃນປັດຈຸບັນນີ້ ທາງການລາວທັງໃນຂັ້ນສູນກາງ ແລະລະດັບທ້ອງຖິ່ນໄດ້ອະນຸຍາດສຳປະທານທີ່ດິນ ໃຫ້ແກ່ເອກະຊົນລາວແລະຕ່າງຊາດໄປແລ້ວ 1,281 ສັນຍາ ຊຶ່ງແບ່ງເປັນການອະນຸຍາດຈາກລະດັບສູນກາງຈຳນວນ 45 ສັນຍາໃນເນື້ອທີ່ 113,281 ເຮັກຕາ ສ່ວນຂັ້ນແຂວງອະນຸຍາດ 1,213 ສັນຍາ ໃນເນື້ອທີ່ 158,813 ເຮັກຕາ ແລະ ອີກ 23 ສັນ
ຍາເປັນການສຳຫລວດ ເພື່ອພິຈາລະນາອອກໃບອະນຸຍາດ ໃນເນື້ອທີ່ກວ້າງກວ່າ 3 ໝື່ນ
ເຮັກຕາໃນທົ່ວປະເທດ.
ປະຊາຊົນລາວ ໄດ້ຮັບໃບຕາດິນ ຢັ້ງຢືນກຳມະສິດ ຢ່າງຖືກຕ້ອງຕາມກົດໝາຍ ຈາກທາງການລາວ.
ແຕ່ຢ່າງໃດກໍຕາມ ຫ້ອງການສະພາແຫ່ງຊາດລາວ ລາຍງານ
ວ່າໃນລະຍະກວ່າ 3 ປີມານີ້ ສະພາແຫ່ງຊາດ ໄດ້ຮັບການຮ້ອງ
ຮຽນຈາກປະຊາຊົນລາວຈຳນວນຫຼາຍກວ່າ 5,000 ກໍລະນີຊຶ່ງ
ສ່ວນໃຫຍ່ເປັນບັນຫາຂັດແຍ້ງກ່ຽວກັບສິດໃນການຖືຄອງທີ່ດິນ
ແລະທີ່ຢູ່ອາໄສ ໂດຍມີທັງຄວາມຂັດແຍ້ງລະຫວ່າງພາກ ປະຊາ
ຊົນດ້ວຍກັນ ຄວາມຂັດແຍ້ງລະຫວ່າງປະຊາຊົນກັບບໍລິສັດ
ເອກະຊົນລາວ ແລະບໍລິສັດຕ່າງຊາດ ຕະຫລອດຈົນຂໍ້ຂັດແຍ້ງ
ລະຫວ່າງປະຊາຊົນກັບລັດຖະບານລາວ ໂດຍສະເພາະແມ່ນໃນ
2 ກໍລະນີຫຼັງນີ້ ກໍຍັງເປັນບັນຫາທີ່ເກີດຂຶ້ນຢ່າງກວ້າງຂວາງທີ່ສຸດ
ອີກດ້ວຍ.
ທັງນີ້ກໍເນື່ອງຈາກວ່າ ທາງການລາວທັງໃນຂັ້ນສູນກາງ ແລະທ້ອງຖິ່ນໄດ້ມີການໃຫ້ສຳປະ
ທານສິດ ໃນການເຊົ່າທີ່ດິນລະຍະຍາວ ແກ່ບັນດາ ບໍລິສັດເອກະຊົນລາວ ແລະບໍລິສັດ
ຕ່າງຊາດຢ່າງກວ້າງຂວາງນັ້ນ ໄດ້ໄປກວມເອົາທີ່ດິນທຳກິນ ແລະທີ່ຢູ່ອາໄສຂອງປະຊາ
ຊົນລາວດ້ວຍ ເມື່ອປະກອບກັບການທີ່ປະຊາຊົນລາວສ່ວນໃຫຍ່ ກໍຍັງຄົງບໍ່ມີໃບຕາດິນ
ເພື່ອຢັ້ງຢືນສິດໃນທີ່ດິນຂອງພວກຕົນດ້ວຍແລ້ວ ກໍກາຍເປັນຊ່ອງຫວ່າງໃຫ້ເກີດການ
ຍາດແຍ່ງເອົາທີ່ດິນຂອງປະຊາຊົນ ໄປສົ່ງມອບໃຫ້ບໍລິສັດເອກະຊົນລາວ ແລະຕ່າງຊາດ
ຢ່າງເປັນຂະບວນ ຈົນມີການຟ້ອງຮ້ອງເປັນຄະດີຄວາມກັນຢ່າງກວ້າງຂວາງ ດັ່ງເຈົ້າໜ້າທີ່
ຂັ້ນສູງ ໃນກະຊວງກະສິກຳປ່າໄມ້ ໄດ້ໃຫ້ການຢືນຢັນວ່າ:
“ເລື່ອງບັນຫາທີ່ດິນນີ້ ກະຍັງເປັນບັນຫາທີ່ວ່າ ມີຄວາມສົນໃຈ ແລະ ເປັນຫ່ວງເປັນໃຍ ຂອງສັງຄົມ ເວົ້າເຖິງທີ່ດິນ ມັນຕ້ອງເວົ້າເຖິງການພົວພັນເຖິງປ່າ ແລ້ວກະພົວພັນເຖິງບ່ອນວ່າການຈັບຈອງ ນັບແຕ່ພວກເຮົາໄດ້ມີການຈັດສັນແບ່ງດິນແບ່ງປ່າໃຫ້ພໍ່ແມ່ປະຊາຊົນໄດ້ຄຸ້ມຄອງນຳໃຊ້ນັ້ນ ແລະພ້ອມດຽວກັນນັ້ນ ບັນຫາດັ່ງກ່າວກະຍັງເປັນຊ່ອງຫວ່າງເກີດມີການຂຶ້ນສິດ ນຳໃຊ້ທີ່ດິນຈາກປະຊາຊົນ ກະລາມໄປຮອດບ່ອນປ່າ
ສະຫງວນ.”
ພ້ອມກັນນີ້ເຈົ້າໜ້າທີ່ຂັ້ນສູງໃນກະຊວງກະສິກຳ ປ່າໄມ້ກໍເປີດເຜີຍວ່າການອອກໃບຕາດິນໃຫ້ປະຊາຊົນລາວທີ່ໄດ້ເລີ້ມລົງມືດຳເນີນການນັບຕັ້ງແຕ່ປີ 1997 ເປັນຕົ້ນມາຈົນເຖິງປັດຈຸບັນນີ້ນັບ ເປັນເວລາເຖິງ 16 ປີແລ້ວ ຫາກແຕ່ຄະນະຮັບຜິດຊອບກໍສາມາດອອກໃບຕາດິນໃຫ້ກັບປະຊາຊົນໄດ້ພຽງ 705,000 ຕອນ ຊຶ່ງຄິດເປັນ 30 ເປີເຊັນຂອງຈຳນວນຕອນທີ່ດິນທັງໝົດໃນທົ່ວປະເທດເທົ່ານັ້ນ.
ດ້ວຍເຫດນີ້ ຈຶ່ງຖືເປັນການດຳເນີນງານທີ່ຊັກຊ້າຢ່າງຍິ່ງ ເມື່ອທຽບກັບແຜນການທີ່ລັດຖະ
ບານລາວໄດ້ວາງເປົ້າໝາຍ ທີ່ຈະອອກໃບຕາດິນໃຫ້ກັບປະຊາຊົນລາວໃຫ້ໄດ້ຢ່າງຄົບຖ້ວນພາຍໃນປີ 2020 ອີກດ້ວຍ.