ປະທານປະເທດລາວ ຂໍໃຫ້ທຸກພາກສ່ວນ ກະກຽມຄວາມພ້ອມໃນທຸກໆດ້ານເພື່ອຮອງຮັບກອງປະຊຸມໃຫຍ່ຄັ້ງທີ 10 ຂອງພັກ ແລະການເປັນປະທານອາຊ່ຽນຂອງລາວໃນປີ 2016.
Your browser doesn’t support HTML5
ຟັງລາຍງານ ລາວ ກະກຽມຄວາມພ້ອມ ເພື່ອຮອງຮັບ ກອງປະຊຸມໃຫຍ່ຄັ້ງທີ 10 ຂອງພັກ ແລະ ການເປັນປະທານອາຊ່ຽນນຳ.
ທ່ານຈູມມາລີ ໄຊຍະສອນ ປະທານປະເທດ ແລະເລຂາທິການໃຫຍ່ພັກປະຊາຊົນປະຕິວັດລາວ ໄດ້ຖະແຫລງຮຽກຮ້ອງຂໍໃຫ້ທຸກພາກສ່ວນ ທັງໃນພາກລັດແລະພາກເອກະຊົນ ຮ່ວມກັນກຽມຄວາມພ້ອມໃນທຸກໆດ້ານເພື່ອຮອງຮັບ 2 ໂອກາດທີ່ສຳຄັນຂອງລາວ ທີ່ຈະມີຂຶ້ນໃນປີ 2016 ກໍຄືການດຳເນີນກອງປະຊຸມໃຫຍ່ຄັ້ງທີ 10 ຂອງພັກປະຊາຊົນປະຕິວັດລາວ ແລະການເປັນປະທານວຽນຂອງກຸ່ມອາຊ່ຽນໃນປີດຽວກັນ ດັ່ງທີ່ທ່ານຈູມມາລີ ໄດ້ຖະແຫລງເນັ້ນຢ້ຳວ່າ:
“ໃນປີ 2016 ທີ່ຈະມາເຖິງ ສປປ ລາວ ພວກເຮົາຍັງມີເຫດການອັນເດັ່ນ ທີ່ຈະຕ້ອງ ເອົາໃຈໃສ່ອອກແຮງກະກຽມ ໃຫ້ແກ່ການດຳເນີນກອງປະຊຸມໃຫຍ່ຄັ້ງທີ 10 ຂອງ
ພັກ ທັງຈະໄດ້ຮັບກຽດອີກເທື່ອໃໝ່ ເປັນປະທານຈັດ ກອງປະຊຸມສຸດຍອດອາຊ່ຽນ.”
ພິທີເປີດກອງປະຊຸມ ບັນດາລັດຖະມົນຕີ ກະຊວງສຶກສາ ອາຊ່ຽນຄັ້ງທີ 8
ໂດຍສຳຫລັບກອງປະຊຸມໃຫຍ່ຄັ້ງທີ 10 ຂອງພັກນັ້ນ ຄາດວ່າ
ຈະມີຂຶ້ນພາຍໃນເດືອນມີນາ ເພື່ອກຳນົດທິດທາງໃນການນຳພາ
ປະເທດຂອງພັກລັດ ໃນຊ່ວງປີ 2016-2020 ແລະວິໄສທັດ
ຂອງການພັດທະນາປະເທດລາວເຖິງປີ 2030 ລວມເຖິງການ
ເລືອກຕັ້ງ ຄະນະບໍລິຫານງານສູນກາງພັກ ກົມການເມືອງສູນ
ກາງພັກ ແລະເລຂາທິການໃຫຍ່ຂອງພັກດ້ວຍ ສ່ວນການເປັນ
ປະທານອາຊ່ຽນນັ້ນ ກໍຈະຕ້ອງເປັນເຈົ້າພາບຈັດກອງປະຊຸມໃນ
ລະດັບຕ່າງໆ ຂອງອາຊ່ຽນທີ່ລວມເຖິງກອງປະຊຸມສຸດຍອດ
ຜູ້ນຳລັດຖະບານອາຊ່ຽນ ທີ່ຈະຕ້ອງມີການຈັດກອງປະຊຸມເຖິງ
2 ຄັ້ງໃນປີດຽວກັນ.
ຊຶ່ງຕໍ່ກໍລະນີດັ່ງກ່າວນີ້ ທ່ານທອງສິງ ທຳມະວົງ ນາຍົກລັດຖະມົນຕີ ກໍໄດ້ມອບໝາຍໃຫ້
ກະຊວງການຕ່າງປະເທດ ເປັນພາກສ່ວນທີ່ຮັບຜິດຊອບ ໃນການກະກຽມຄວາມພ້ອມ
ໃນທຸກໆດ້ານ ເພື່ອຮອງຮັບການເປັນປະທານອາຊ່ຽນໃຫ້ໄດ້ ຢ່າງຄັກແນ່ ເພາະການເປັນ
ປະທານອາຊ່ຽນນັ້ນ ນອກຈາກຈະຕ້ອງຮັບຜິດຊອບ ໃນການເປັນເຈົ້າພາບຈັດກອງປະຊຸມ
ສຸດຍອດ ຜູ້ນຳລັດຖະບານ ເຖິງສອງຄັ້ງແລ້ວ ຍັງຈະຕ້ອງຈັດກອງປະຊຸມລະດັບ ເຈົ້າໜ້າທີ່
ອາວຸໂສ ລະດັບລັດຖະມົນຕີ ໃນປີດຽວກັນອີກດຽວກນອີກດ້ວຍ.
ໂດຍປະເທດຄູ່ເຈລະຈາຂອງອາຊ່ຽນ ກໍປະກອບດ້ວຍ ຈີນ ຍີ່ປຸ່ນ ເກົາຫຼີໃຕ້ ອິນເດຍ
ອອສເຕຣເລຍ ນິວຊີແລນ ການາດາ ຣັດເຊຍ ສະຫະລັດອາເມຣິກາ ແລະ ສະຫະພາບ
ຢູໂຣບ ຊຶ່ງໝາຍຄວາມວ່າ ບັນດາຜູ້ນຳຂອງປະເທດເຫຼົ່ານີ້ ກໍຈະຕ້ອງເດີນທາງເຂົ້າມາ
ຮ່ວມກອງປະຊຸມສຸດຍອດ ທີ່ລາວຈະເປັນເຈົ້າພາບຈັດຂຶ້ນໃນທ້າຍປີ 2016 ດ້ວຍນັ້ນເອງ.
ດ້ວຍເຫດນີ້ ຈຶ່ງເຮັດໃຫ້ລັດຖະບານລາວ ຈະຕ້ອງຮັບປະກັນຄວາມປອດໄພໃຫ້ໄດ້ ຢ່າງຄັກ
ແນ່ ທັງຍັງຈະຕ້ອງກະກຽມສະຖານທີ່ຈັດກອງປະຊຸມ ບ້ານພັກຮັບຮອງຜູ້ນຳ ແລະຄະນະ
ຜູ້ແທນຂອງທຸກປະເທດ ຕະຫລອດຈົນຮອດສິ່ງອຳນວຍຄວາມສະດວກຕ່າງໆ ຢ່າງຄົບຊຸດ
ຊຶ່ງຮວມທັງການກຽມຄວາມພ້ອມໃນດ້ານບຸກຄະລາກອນດ້ວຍ ດັ່ງທີ່ທ່ານທອງລຸນ ສີສຸລິດ
ຮອງນາຍົກລັດຖະມົນຕີ ແລະ ລັດຖະມົນຕີວ່າການຕ່າງປະເທດ ໄດ້ໃຫ້ການຢືນຢັນວ່າ:
“ຕະຫລອດໄລຍະ 17 ປີທີ່ ສປປ ລາວ ໄດ້ເຂົ້າເປັນສະມາຊິກອາຊ່ຽນ ພວກເຮົາ
ໄດ້ເຂົ້າຮ່ວມຢ່າງຕັ້ງໜ້າ ໃນຂະບວນການສ້າງປະຊາຄົມອາຊ່ຽນ ແລະ ໃນປີ
2016 ນີ້ ສປປ ລາວ ກໍຖືກມອບໝາຍໃຫ້ເປັນປະທານອາຊ່ຽນອີກຄັ້ງໜຶ່ງ ດັ່ງນັ້ນ
ພວກເຮົາຈະຕ້ອງໄດ້ພ້ອມກັນສ້າງຄວາມພ້ອມໃນທຸກດ້ານ ເພື່ອຮັບປະກັນຜົນ
ສຳເລັດ ຂອງການເປັນເຈົ້າພາບ ແລະເປັນປະທານໃນຄັ້ງນີ້.”
ສປປ ລາວໄດ້ເຂົ້າຮ່ວມເປັນປະເທດສະມາຊິກ ຂອງກຸ່ມອາຊ່ຽນ ນັບຕັ້ງແຕ່ວັນທີ 23 ກໍລະກົດ 1997 ເປັນຕົ້ນມາ ໂດຍລາວໄດ້ເປັນປະທານວຽນຂອງອາຊ່ຽນຄັ້ງທຳອິດ ໃນ
ປີ 2004 ທີ່ຍັງມີການຈັດການປະຊຸມສຸດຍອດຜູ້ນຳເຖິງ 2 ຄັ້ງ ທັງກໍຍັງຈະຕ້ອງຈັດກອງປະຊຸມສຸດຍອດ ລະຫວ່າງຜູ້ນຳຂອງອາຊ່ຽນກັບປະເທດຄູ່ເຈລະຈາດ້ວຍນັ້ນ ຍ່ອມຈະຕ້ອງໃຊ້ຈ່າຍງົບປະມານຢ່າງຫລວງຫຼາຍເຊັ່ນກັນ.