ການປະກາດໃຊ້ກົດໝາຍສະພາວະສຸກເສີນໃນໄທ ເຮັດໃຫ້ແຮງງານລາວ ຫລາຍໝື່ນຄົນ ຕ້ອງເດີນທາງກັບມາລາວ ທັງຍັງກວດພົບ 2 ຄົນທີ່ຕິດເຊື້ອໄວຣັສ Covid-19 ເປັນຄັ້ງ ທໍາອິດໃນລາວ ອີກດ້ວຍ. ຊົງລິດ ໂພນເງິນ ມີລາຍງານເລື້ອງນີ້ ມາສະເໜີທ່ານ ຈາກບາງກອກ.
Your browser doesn’t support HTML5
ເຊີນຟັງລາຍງານການກັບຄືນບ້ານຂອງແຮງງານລາວ ຍ້ອນການປະກາດພາວະສຸກເສີນໃນໄທ
ສືບເນື່ອງຈາກການດໍາເນີນມາດຕະການສະກັດກັ້ນ ການແຜ່ລະບາດ ຂອງເຊື້ອ ໄວຣັສ Covid-19 ໃນໄທ ໂດຍສະເພາະແມ່ນ ການສັ່ງປິດສໍານັກງານ, ຫ້າງສັບພະສິນຄ້າ, ສະຖານບັນເທີງ ແລະສະຖານບໍລິການຕ່າງໆ ໃນໄລຍະວັນທີ 22 ມີນາ ຫາ 12 ເມສາ 2020 ແລະ ການປະກາດບັງຄັບໃຊ້ກົດໝາຍການບໍລິຫານງານໃນສະພາວະສຸກເສີນ ຂອງລັດຖະບານໄທ ຈາກວັນທີ 26 ມີນາ ຫາ 24 ເມສາ 2020 ນັ້ນ ນອກຈາກຈະກະທົບຕໍ່ ການດໍາເດີນກິດຈະການ ຂອງບັນດາຫົວໜ່ວຍທຸລະກິດຕ່າງໆ ຢ່າງກວ້າງຂວາງແລ້ວ ກໍຍັງສົ່ງຜົນກະທົບ ຕໍ່ການຈ້າງງານໃນທົ່ວປະເທດໄທອີກດ້ວຍ ໂດຍໃນນີ້ ກໍຮວມເຖິງ ການຈ້າງແຮງງານລາວ ທີ່ທໍາງານຢູ່ໃນໄທອີກດ້ວຍນັ້ນເອງ.
ຄົນທີ່ຂ້າມາຈາກໄທ ຜ່ານດ່ານຂົວມິດຕະພາບຢູ່ວຽງຈັນ ກໍາລັງຖືກກວດເບິ່ງອຸຫະພູມ ເພື່ອຊອກຫາໄວຣັສ ໂຄວິດ-19
ທັງນີ້ ກໍເນື່ອງຈາກວ່າການຢຸດກິດຈະການຊົ່ວຄາວຂອງບັນດາຫົວໜ່ວຍທຸລະກິດ ຕ່າງໆ ໃນໄທ ໄດ້ເຮັດໃຫ້ ຕ້ອງເລີກຈ້າງແຮງງານລາວ ເປັນການຊົ່ວຄາວອີກດ້ວຍ ເຊັ່ນກັນ ແລະ ປະກອບຍັງບໍ່ທັນຊັດເຈນວ່າ ບັນດາຫົວໜ່ວຍທຸລະກິດຕ່າງໆ ຈະສາມາດກັບຄືນ ມາດໍາເນີນກິດຈະການໄດ້ເມື່ອໃດແທ້ ຊຶ່ງກໍຂຶ້ນຢູ່ກັບ ຄວາມສາມາດໃນການຄວບຄຸມ ການແຜ່ລະບາດ ຂອງໄວຣັສ Covid-19 ເປັນສໍາຄັນ. ດ້ວຍເຫດນີ້ ຈຶ່ງເຮັດໃຫ້ແຮງງານ ລາວ ຈໍານວນຫລວງຫລາຍຕ່າງກໍໄດ້ພາກັນເດີນທາງຈາກໄທ ກັບຄືນມາລາວ ເປັນການຊົ່ວຄາວ ເພາະໃນເມື່ອວ່າ ແຮງງານລາວເຫລົ່ານີ້ ບໍ່ມີລາຍໄດ້ຈາກຄ່າຈ້າງ ກໍຍ່ອມບໍ່ສາມາດທີ່ຈະຄອງຊີບຢູ່ໃນໄທຕໍ່ໄປໄດ້ນັ້ນເອງ.
ອີງຕາມການລາຍງານ ຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການ ລະບາດຂອງພະຍາດ Covid-19 ໃນລາວ ລະບຸວ່າ ໃນວັນທີ 23 ມີນາ 2020 ໄດ້ມີການ ຜ່ອນຜັນດ້ວຍການເປີດດ່ານຊາຍແດນທັງ 10 ແຫ່ງເພື່ອຮັບເອົາແຮງງານລາວ 26,326 ຄົນ ທີ່ເດີນທາງມາຈາກໄທກັບຄືນມາລາວ ຊຶ່ງທຸກຄົນ ຈະຕ້ອງຖືກກັກບໍລິເວນເປັນເວລາ 14 ວັນ ດັ່ງທີ່ທ່ານລັດຕະນະໄຊ ເພັດສຸວັນ, ຫົວໜ້າ ກົມຄວບຄຸມ ພະຍາດຕິດຕໍ່, ກະຊວງ ສາທາລະນະສຸກ ໄດ້ຖະແຫລງຢືນຢັນວ່າ:
"ບຸກຄົນທີ່ເດີນທາງ ຈາກບັນດາປະເທດ ທີ່ມີການລະບາດແມ່ນ ຈະຖືກກັກກັນ ໃຫ້ຢູ່ບ້ານ, ຢູ່ໂຮງແຮມ ຫລືວ່າ ຢູ່ສະຖານທີ່ພັກເຊົາຂອງຕົນເອງ 14 ວັນ. 14 ວັນໝາຍຄວາມວ່າ ບໍ່ໃຫ້ອອກໄປໃສ ການກິນຢູ່ພັກເຊົານີ້ ໝາຍຄວາມວ່າ ທາງຄອບຄົວບໍ ຫລືວ່າ ທາງຍາດພີ່ນ້ອງ ຫລືວ່າ ທາງຜູ້ປະກອບການ ຈະເປັນຜູ້ສະໜອງໃຫ້ ໃນເງື່ອນໄຂ ການກັກກັນຕົນເອງ 14 ວັນ. ໝາຍຄວາມວ່າ ຜູ່ກ່ຽວຈະຕ້ອງບໍ່ມີອາການໄຂ້, ໄອ, ຫລື ວ່າຈາມ ຫລືວ່າ ຫັນໃຈຍາກ ບໍ່ເຂົ້ານິຍາມ ເດ້. ໝາຍຄວາມວ່າ ຜ່ານດ່ານຕ່າງໆ ຂອງພວກເຮົາ."
ນອກຈາກນີ້ແລ້ວ ຄະນະສະເພາະກິດ ກໍຍັງກວດພົບການຕິດເຊື້ອໄວຣັສ Covid-19 ເປັນ 2 ກໍລະນີທໍາອິດໃນລາວອີກດ້ວຍ ໂດຍເປັນປະຊາຊົນລາວ ທີ່ຢູ່ໃນນະຄອນວຽງຈັນ ທີ່ປະກອບອາຊີບໃນພາກບໍລິການ ດັ່ງທີ່ທ່ານ ພູທອນ ເມືອງປາກ, ຮອງລັດຖະມົນຕີ ກະຊວງ ສາທາລະນະສຸກໄດ້ຢືນຢັນວ່າ:
“ສອງກໍລະນີທີ່ຢູ່ນະຄອນຫລວງວຽງຈັນນີ້ ກວດກາພົບວ່າ ມີເຊື້ອພະຍາດ Covid-19 ຜູ້ທີນຶ່ງນີ້ ເປັນເພດຍິງ ອາຍຸ 36 ປີ, ອາຊີບນໍາພານັກທ່ອງທ່ຽວຕ່າງປະເທດ ຊຶ່ງວ່າ ລາວ ໄດ້ນໍາພາກຸ່ມນັກທ່ອງທ່ຽວຈາກປະເທດຢູໂຣບ ນໍາພາທ່ອງທ່ຽວຢູ່ວັງວຽງ ແລະ ຫລວງ ພະບາງ, ຜູ້ທີ 2 ເປັນເພດຊາຍ ອາຍຸ 28 ປີ ຊຶ່ງເປັນພະນັກງານຢູ່ໂຮງແຮມ Crown Plaza. ຜູ້ກ່ຽວນີ້ ມີປະຫວັດການເດີນທາງໄປປະຊຸມ ສໍາມະນາ ຢູ່ບາງກອກປະເທດໄທ ມາຮອດປັດຈຸບັນນີ້ ທັງ 2 ຄົນນີ້ ໄດ້ຮັບການປິ່ນປົວ ຢູ່ໃນໂຮງໝໍມິດຕະພາບ.”
ທາງດ້ານກະຊວງ ແຮງງານຂອງໄທ ລາຍງານວ່າ ໃນປັດຈຸບັນ ມີແຮງງານລາວ ທໍາງານ ຢູ່ໃນໄທຢ່າງຖືກຕ້ອງຕາມກົດໝາຍ 277,845 ຄົນ ສ່ວນເຄືອຂ່າຍເພື່ອໃຫ້ການຊ່ວຍ ເຫລືອແຮງງານຕ່າງດ້າວ ໃນໄທ ປະເມີນວ່າ ມີແຮງງານລາວ ທີ່ລັກລອບທໍາງານ ໂດຍຜິດກົດໝາຍ ຢູ່ໃນໄທ 330,000 ກວ່າຄົນ ແລະເກີນກວ່າ 60 ເປີເຊັນ ແມ່ນເປັນເພດຍິງ ຈຶ່ງມີຄວາມສ່ຽງສູງ ທີ່ຈະຕົກເປັນເຫຍື່ອ ຂອງການຄ້າມະນຸດໃນໄທ.