ການຜະລິດສິນຄ້າໃນພາກອຸດສາຫະກຳຂອງລາວ ຍັງມີສະມັດຕະພາບຕ່ຳ ແລະມີການເຕີບໂຕຢ່າງຊັກຊ້າ ໂດຍຄິດເປັນສັດສ່ວນພຽງ 21.62 ເປີເຊັນເທົ່ານັ້ນ ຂອງຍອດຜະລິດຕະພັນລວມພາຍໃນ (GDP) ໃນປີກາຍນີ້.
Your browser doesn’t support HTML5
ການຜະລິດສິນຄ້າອຸດສາຫະກຳຂອງລາວ ຍັງມີສະມັດຕະພາບຕ່ຳ ກວມເອົາພຽງ 21.62 ເປີເຊັນ ຂອງ GDP
ນັກທຸລະກິດໃນສະພາການຄ້າແລະອຸດສາຫະກໍາແຫ່ງຊາດ ຍອມຮັບວ່າການຜະລິດໃນພາກອຸດສາຫະກຳປຸງແຕ່ງຂອງລາວ ຍັງມີສະມັດຕະພາບຕ່ຳຫຼາຍ ເມື່ອທຽບໃສ່ບັນດາປະເທດສະມາຊິກໃນກຸ່ມອາຊຽນດ້ວຍກັນ ໂດຍມີສາເຫດມາຈາກການຂາດແຄນທາງດ້ານເງິນທຶນ ແລະ ເທັກໂນໂລຈີການຜະລິດສິນຄ້າທີ່ທັນສະໄໝ ຈຶ່ງເຮັດໃຫ້ຜະລິດຕະພັນອຸດສາຫະກຳປຸງແຕ່ງຂອງລາວ ມີຄຸນນະພາບຕໍ່າ ແລະບໍ່ສາມາດແຂ່ງຂັນໃນຕະຫຼາດສາກົນໄດ້ເລີຍ ທັງຍັງມີການເຕີບໂຕຢ່າງຊັກຊ້າອີກດ້ວຍ ຫຼືຄິດເປັນສັດສ່ວນພຽງ 21.62 ເປີເຊັນ ຂອງຍອດຜະລິດຕະພັນພາຍໃນ (GDP) ຂອງລາວ ໃນປີ 2023 ດັ່ງທີ່ນັກທຸລະກິດລາວຢືນຢັນວ່າ:
“ອັດຕາສ່ວນມູນຄ່າການສົ່ງອອກຜະລິດຕະພັນອຸດສາຫະກຳປຸງແຕ່ງໄດ້ຂະຫຍາຍຕົວຈາກ 36,30 ເປີເຊັນ ໃນປີ 2022 ແລະ ຈະກາຍເປັນ 37,88 ເປີເຊັນ ໃນປີ 2023 ເຮັດໃຫ້ຂະແໜງອຸດສາຫະກຳປຸແຕ່ງ ປະກອບສ່ວນໃນໂຄງສ້າງ GDP ຈາກ 19.83 ເປີເຊັນ ໃນປີ 2021 ເປັນ 21.62 ເປີເຊັນ ໃນປີ 2023, ສ້າງວຽກເຮັດງານທຳໃນຂະແໜງອຸດສາຫະກຳປຸງແຕ່ງຂະຫຍາຍຕົວສະເລ່ຍ 3 ເປີເຊັນ ຕໍ່ປີ, ມູນຄ່າການຜະລິດອຸດສາຫະກຳປຸງແຕ່ງບັນລຸ 32,067.23 ຕື້ກີບ, ເມື່ອທຽບໃສ່ໄລຍະດຽວກັນເພີ່ມຂຶ້ນ 19.29 ເປີເຊັນ.”
ການຜະລິດສິນຄ້າອຸດສາຫະກໍາປຸງແຕ່ງ ທີ່ມີສະມັດຕະພາບຕ່ໍາດັ່ງກ່າວ ກໍຍັງເປັນເຫດສຳຄັນທີ່ເຮັດໃຫ້ລາວ ຕ້ອງປະເຊີນກັບວິກິດການເສດຖະກິດຢ່າງໜັກໜ່ວງ ເພາະຕ້ອງນຳເຂົ້າສິນຄ້າຈາກຕ່າງປະເທດ ເພື່ອຕອບສະໜອງຄວາມຕ້ອງການຂອງຜູ້ຊົມພາຍໃນປະເທດຢ່າງພຽງພໍ ຈຶ່ງເຮັດໃຫ້ລາວ ຕ້ອງປະເຊີນກັບການຂາດດຸນການຄ້າຕ່າງປະເທດຢ່າງຕໍ່ເນື່ອງ ແລະຕ້ອງປະເຊີນກັບບັນຫາຂາດແຄນເງິນຕາຕ່າງປະເທດຢ່າງຮ້າຍແຮງ ສ່ວນການຜະລິດສິນຄ້າສິນຄ້າທີ່ມີຄຸນນະພາບຕ່ໍາ ແຕ່ກັບມີຕົ້ນທຶນການຜະລິດທີ່ສູງດ້ວຍນັ້ນ ກໍຍັງເຮັດໃຫ້ສິນຄ້າຂອງລາວ ບໍ່ສາມາດແຂ່ງຂັນດ້ານລາຄາໃນຕະຫຼາດຕ່າງປະເທດໄດ້ເລີຍ ເພາະວ່າ ປັດໄຈການຜະລິດວໃນລາວ ມີລາຄາສູງກວ່າສິນຄ້າຕ່າງປະເທດ ຈຶ່ງເປັນໄປໄດ້ຍາກທີ່ສິນຄ້າຜະລິດໃນລາວ ຈະແຂ່ງຂັນໃນຕະຫຼາດສາກົນໄດ້ຢ່າງແທ້ຈິງ ດັ່ງທີ່ ທ່ານທອງລຸນ ສີສຸລິດ ປະທານປະເທດ ໄດ້ຢືນຢັນວ່າ:
“ສິນຄ້າຫຼາຍປະເພດທີ່ສາມາດຜະລິດໄດ້ຢູ່ພາຍໃນເຮົາ ຜັດບໍ່ຢຸດການນຳເຂົ້າຈາກຕ່າງປະເທດໄດ້ ເປັນຕົ້ນແມ່ນປະເພດ ສະບຽງອາຫານ ອຸດສາຫະກຳປຸງແຕ່ງຜົນຜະລິດກະສິກຳເປັນສິນຄ້າ ອັນນີ້ ກະຍັງບໍ່ທັນໄດ້ຮັບການເສີມຂະຫຍາຍແລະພັດທະນາ ບັນຫານີ້ ພວກເຮົາຕ້ອງມີຄວາມກ້າຫານເບິ່ງສາເຫດຂອງມັນວ່າ ມັນແມ່ນຫຍັງ ແມ່ນບໍ່ວ່າ ຍ້ອນຍັງຂາດລະບົບໂຄງລ່າງພື້ນຖານທີ່ເໝາະສົມ ຫຼືຍ້ອນຄວາມຮັບຜິດຊອບ ບໍ່ທັນແທກເຖິງ ຢາກໃຫ້ຊອກຮູ້ໃຫ້ເຫັນບັນຫາ ແລ້ວກໍຕ້ອງແກ້ໄຂ.”
ສ່ວນການຜະລິດດ້ານກະສິກຳໃນລາວ ກໍຍັງມີສະມັດຕະພາບຕ່ຳເຊັ່ນດຽວກັນ ໃນຂະນະທີ່ລັດຖະບານລາວ ກໍໄດ້ວາງເປົ້າໝາຍຈະຊຸກຍູ້ການຜະລິດເຂົ້າໃຫ້ເປັນສິນຄ້າສົ່ງອອກໄປຕ່າງປະເທດ ໃນປະລິມານ 1.9 ລ້ານໂຕນ ແຕ່ກໍຄົງຈະເປັນໄປໄດ້ຍາກ ເພາະສະມັດຕະພາບການຜະລິດເຂົ້າຂອງຊາວກະສິກອນລາວຍັງຕ່ຳ ຊຶ່ງຈະເຫັນໄດ້ຈາກການເພີ້ມຜົນຜະລິດດ້ວຍການເພີ້ມພື້ນທີ່ປູກໃຫ້ຫຼາຍຂຶ້ນ ເພາະຊາວກະສິກອນລາວ ມີຄວາມສາມາດຢ່າງຈຳກັດໃນດ້ານເງິນທຶນ ແລະເທັກນິກການຜະລິດສທີ່ທັນສະໄໝ ເມື່ອສົມທົບກັບຕົ້ນທຶນການຜະລິດສູງດ້ວຍແລ້ວ ກໍຍິ່ງເປັນບັນຫາທີ່ຫຍຸ້ງຍາກຫຼາຍຂຶ້ນໄປອີກສຳລັບການຜະລິດໃນພາກກະສິກຳຂອງລາວ.
ໃນປີ 2023 ລາວໄດ້ສົ່ງສິນຄ້າກະສິກຳໄປຕ່າງປະເທດໄດ້ໃນມູນຄ່າລວມກວ່າ 2,000 ລ້ານໂດລາ ເພີ່ມຂຶ້ນກວ່າ 25 ເປີເຊັນ ທຽບໃສ່ປີ 2022 ໃນນີ້ເປັນການສົ່ງອອກພືດແລະຜະລິດຕະພັນທີ່ມູນຄ່າລວມ 1,800 ກວ່າລ້ານໂດລາ ແລະສົ່ງອອກ ສັດປີກ ງົວ ຄວາຍ ໝູ ແບ້ ແລະ ແກະ ໃນມູນຄ່າລວມເກືອບ 200 ລ້ານໂດລາ ເຖິງແມ່ນວ່າ ລາວ ຈະໄດ້ຮັບໂຄຕ້າໃນການສົ່ງງົວໄປຈີນເຖິງ 5 ແສນໂຕໃນແຕ່ລະປີກໍຕາມ ແຕ່ດ້ວຍລະບົບການລ້ຽງງົວ ທີ່ຍັງບໍ່ໄດ້ມາດຕະຖານຕາມລັດຖະບານຈີນ ຈຶ່ງບໍ່ສາມາດສົ່ງງົວໄປຈີນໄດ້ຕາມໂຄວຕ້າດັ່ງກ່າວ.
ສ່ວນການສົ່ງອອກສິນຄ້າກະສິກຳຂອງລາວໄປຈີນໃນປີ 2023 ມີມູນຄ່າລວມເກີນກວ່າ 1,500 ລ້ານໂດລາ ໃນນີ້ ຄິດເປັນສັດສ່ວນເຖິງ 85 ເປີເຊັນ ທີ່ເປັນໂຄຕ້າພິເສດທີ່ລັດຖະບານຈີນ ອະນຸຍາດໃຫ້ນຳເຂົ້າສິນຄ້າກະສິກຳຈາກລາວ ຈຳນວນ 18 ຊະນິດ ສ່ວນໃນປີ 2024 ນີ້ ລັດຖະບານລາວ ຍັງຄາດຫວັງວ່າ ລັດຖະບານຈີນ ຈະເພີ້ມໂຄວຕ້າໃຫ້ອີກ 91 ຊະນິດ ຊຶ່ງລັດຖະບານລາວ ໄດ້ສະເໜີຕໍ່ລັດຖະບານຈີນ ໄປແລ້ວ ຫາກແຕ່ກໍຍັງບໍ່ມີທີທ່າວ່າ ທາງການຈີນ ຈະເພີ່ມໂຄວຕ້ານໍາເຂົ້າສິນຄ້າກະສິກໍາຈາກລາວຕາມການສະເໜີດັ່ງກ່າວແຕ່ຢ່າງໃດ.