ວິສາຫະກິດຖືຮຸ້ນຂອງລັດຖະບານລາວ ລະດົມເງິນທຶນໄດ້
ຫຼາຍກວ່າ 536 ລ້ານດອນລາ ເພື່ອປະກອບສ່ວນລົງທຶນ
ໃນການກໍ່ສ້າງເຂື່ອນຜະລິດກະແສໄຟຟ້າ 4 ໂຄງການ
ໃນລະຍະ 10 ປີທີ່ຜ່ານມາ.
Your browser doesn’t support HTML5
ຟັງລາຍງານ ວິສາຫະກິດຖືຮຸ້ນຂອງລັດ ລົງທຶນ ໃນການກໍ່ສ້າງເຂື່ອນ ຫຼາຍກວ່າ 536 ລ້ານດອນລາ.
ທ່ານສົມບູນ ມະໂນລົມ ປະທານລັດວິສາຫະກິດ ຖືຮຸ້ນລາວ
(Laos Holding State Enterprise) ໃຫ້ການຢືນຢັນໃນໂອກາດການສະເຫຼີມສະຫຼອງ
ການສ້າງຕັ້ງລັດວິສາຫະກິດ ຖືຮຸ້ນລາວ ຄົບຮອບ 10 ປີ ໃນຊ່ວງເດືອນມີນາ 2015 ວ່າ
ໄດ້ລະດົມເງິນທຶນ ເພື່ອປະກອບສ່ວນລົງທຶນ ໃນການກໍ່ສ້າງເຂື່ອນຜະລິດກະແສໄຟຟ້າ
ໃນ 4 ໂຄງການຄິດເປັນມູນຄ່າ ການຮ່ວມລົງທຶນຫຼາຍກວ່າ 536 ລ້ານດອນລາ.
ໂດຍການຮ່ວມລົງທຶນ ໃນ 4 ໂຄງການດັ່ງກ່າວ ກໍປະກອບດ້ວຍໂຄງການເຂື່ອນໄຟຟ້ານ້ຳເທີນ 2 ຊຶ່ງລັດວິສາຫະກິດ ຖືຮຸ້ນລາວ ໄດ້ຮ່ວມລົງທຶນໃນມູນຄ່າ 112 ລ້ານດອນລາ ໂຮງໄຟຟ້າພະລັງງານຄວາມຮ້ອນ ຈາກຖ່ານຫິນ ຫຼື ໂຄງການຫົງສາລິກໄນຕ໌ ມູນຄ່າ 220 ກວ່າລ້ານດອນລາ ໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ ມູນຄ່າ 100 ກວ່າລ້ານດອນລາ ແລະ ໂຄງການເຂື່ອນນ້ຳງຽບ 1 ໃນມູູນຄ່າຫຼາຍກວ່າ 103 ລ້ານດອນລາ ຕາມລຳດັບ.
ໂດຍສຳຫລັບໂຄງການເຂື່ອນນ້ຳເທີນ 2 ໄດ້ກໍ່ສ້າງແລ້ວເສັດ ແລະຜະລິດກະແສໄຟຟ້າໃນປະລິມານ ລວມ 1,080 ເມກາວັດ ນັບຕັງແຕ່ປີ 2010 ເປັນຕົ້ນມາແລ້ວ ຊຶ່ງກໍເຮັດໃຫ້ລັດວິສາຫະກິດ ຖືຮຸ້ນລາວ ໄດ້ຮັບເງິນປັນຜົນໃນມູນຄ່າຫຼາຍກວ່າ 98 ລ້ານດອນລາ ສ່ວນລັດຖະບານລາວ ໄດ້ຮັບຄ່າພາກຫລວງຫຼາຍກວ່າ 62 ລ້ານ ໃນລະຍະ 5 ປີ ທີ່ຜ່ານມາ ແຕ່ຖ້າຫາກຄິດໄລ່ຕະຫລອດລະຍະສຳປະທານ 25 ປີ ລັດຖະບານລາວກໍຈະໄດ້ຮັບສ່ວນແບ່ງຮອດ 2,000 ລ້ານດອນລາ ໃນຂະນະທີ່ລັດວິສາຫະກິດ ຖືຮຸ້ນລາວ ກໍຈະໄດ້ຮັບເງິນປັນຜົນລວມຮອດ 723 ລ້ານດອນລາ.
ໂຄງການເຂື່ອນນ້ຳເທີນ 2 ໄດ້ກໍ່ສ້າງແລ້ວເສັດ ແລະຜະລິດກະແສໄຟຟ້າໃນປະລິມານ ລວມ 1,080 ເມກາວັດ ນັບຕັງແຕ່ປີ 2010 ເປັນຕົ້ນມາແລ້ວ.
ສ່ວນອີກ 3 ໂຄງການທີ່ເຫຼືອນັ້ນ ກໍກຳລັງດຳເນີນການກໍ່ສ້າງ
ຢ່າງຕັ້ງໜ້າ ໂດຍໂຄງການສົງສາລິກໄນຕ໌ ໄດ້ຄືບໜ້າໄປແລ້ວ
ເຖິງ 94 ເປີເຊັນ ແລະຄາດວ່າ ຈະແລ້ວເສັດຢ່າງສົມບູນ ພາຍ
ໃນປີ 2016 ສ່ວນໂຄງການເຂື່ອນເຊປຽນ-ເຊນ້ຳນ້ອຍ ແລະ
ໂຄງການເຂື່ອນ້ຳງຽບ 1 ກໍເຊື່ອວ່າ ຈະກໍ່ສ້າງແລ້ວເສັດຕາມ
ແຜນການ ທີ່ວາງໄວ້ພາຍໃນປີ 2019 ຊຶ່ງກໍຈະເປັນຜົນເຮັດ
ໃຫ້ທັງ 4 ໂຄງການມີຄວາມອາດສາມາດ ໃນການຜະລິດ
ກະແສໄຟຟ້າ ໄດ້ລວມກັນເຖິງ 21,215 ລ້ານກິໂລວັດ/ໂມງຕໍ່ປີ
ໂດຍລັດວິສາຫະກິດຖືຮຸ້ນລາວ ຈະໄດ້ຮັບສ່ວນແບ່ງຕາມການ
ຮ່ວມລົງທຶນໃນແຕ່ລະໂຄງການຄື ຕັ້ງແຕ່ 20 ເປີເຊັນ ເຖິງ 25
ເປີເຊັນ ນັ້ນເອງ.
ລັດຖະບານລາວ ໄດ້ວາງແຜນການທີ່ຈະເພີ້ມການຜະລິດກະແສໄຟຟ້າ ໃນປະເທດໃຫ້ໄດ້ ໃນປະລິມານລວມບໍ່ນ້ອຍກວ່າ 15,260.5 ລ້ານກິໂລວັດ/ໂມງໃນປີ 2015 ໃນນີ້ ຈະເປັນກະແສໄຟຟ້າ ສຳຫລັບສົ່ງອອກໄປຕ່າງປະທເ ໃນປະລິມານລວມ 11,793.68 ລ້ານກິໂລວັດ/ໂມງ ຊຶ່ງຈະເຮັດໃຫ້ມີລາຍຮັບເຂົ້າປະເທດຄິດເປັນມູນຄ່າບໍ່ນ້ອຍກວ່າ 535 ລ້ານ 47 ແສນດອນລາຕໍ່ປີ.
ກ່ອນໜ້ານີ້ ທ່ານດາວົງ ພອນແກ້ວ ຫົວໜ້າກົມນະໂຍບາຍ ແລະແຜນພະລັງງານແລະບໍ່ແຮ່ ລາຍງານວ່າ ໃນປັດຈຸບັນນີ້ ມີເຂື່ອນໄຟຟ້າ ທີ່ກໍ່ສ້າງແລ້ວເສັດ ແລະໄດ້ຜະລິດກະແສໄຟຟ້າແລ້ວ ຈຳນວນ 24 ໂຄງການ ສ່ວນທີ່ກຳລັງຢູ່ໃນລະຫວ່າງດຳເນີນການກໍ່ສ້າງມີຈຳນວນ 38 ໂຄງການ ແລະອີກ 100 ໂຄງການຢູ່ໃນຂັ້ນຂອງການສຶກສາ ສຳຫລວດ ອອກແບບ ຫຼື ສະແຫວງຫາເງິນທຶນ ທີ່ຈະນຳໃຊ້ໃນການກໍ່ສ້າງຕໍ່ໄປ.
ທັງນີ້ໂດຍຈາກການສຶກສາ ໃນລະຍະທີ່ຜ່ານມາ ພົບວ່າການກໍ່ສ້າງເຂື່ອນໃນລາວຢ່າງເຕັມກຳລັງນັ້ນ ຈະເຮັດໃຫ້ສາມາດຜະລິດພະລັງງານໄຟຟ້າໄດ້ລວມກັນລະຫວ່າງ 28,000 ຮອດ 30,000 ເມກາວັດ ທັງກໍຍັງຈະສົ່ງຜົນດີ ຕໍ່ການພັດທະນາເພື່ອລົບລ້າງບັນຫາ ຄວາມຍາກຈົນຂອງປະຊາຊົນລາວ ບັນດາເຜົ່າ ທີ່ຢູ່ເຂດຊົນນະບົດອີກດ້ວຍ ດັ່ງທີ່ທ່ານດາວົງ ໄດ້ໃຫ້ການຊີ້ແຈງວ່າ:
“ເວລາເຮົາພັດທະນາເຂື່ອນໄຟຟ້ານ້ຳຕົກ ມັນຊ່ວຍໃນການພັດທະນາເຂດຊົນນະບົດ ເພາະວ່າໂຄງການໄຟຟ້ານ້ຳຕົງນີ້ ສິໄປຕັ້ງຢູ່ຊົນນະບົດຫ່າງໄກສອກຫລີກ ສະນັ້ນ ຄັນມີໂຄງການຢູ່ຈຸດໃດ ຜົນພອຍໄດ້ກໍຕາມມາ ເພາະວ່າເຮົາບໍ່ໄດ້ແຕ່ໄຟຟ້າ ເຮົາສິໄດ້ຖະໜົນຫົນທາງ ຮັກສາແຫລ່ງນ້ຳໄວ້ໃຊ້ ໃນລະດູແລ້ງ ສາມາດລ້ຽງປາໄດ້ ເປັນແຫລ່ງອາຫານ ຫຼືວ່າ ເປັນເຂດທ່ອງທ່ຽວ.”
ໂດຍໂຄງການທີ່ຈະກໍ່ສ້າງແລ້ວເສັດພາຍໃນປີ 2015-2016 ມີຢູ່ 20 ໂຄງການດ້ວຍກັນ ຊຶ່ງໃນນີ້ ເປັນການກໍ່ສ້າງເຂື່ອນ 19 ໂຄງການ ແລະ ໂຮງໄຟຟ້າຫົງສາລິກໄນຕ໌ 1 ໂຄງການ ທີ່ຈະເຮັດໃຫ້ຄວາມອາດສາມາດໃນການຜະລິດພະລັງງານໄຟຟ້າໃນລາວເພີ້ມຂຶ້ນຈາກ 3,200 ເມກາວັດ ໃນປັດຈຸບັນນີ້ເປັນຫຼາຍກວ່າ 7,000 ເມກາວັດ ພາຍໃນປີ 2016 ດັ່ງກ່າວ.