ລັດຖະບານລາວ ໄດ້ດຳເນິນການແປຮູບລັດວິສາຫະກິດ 32 ຫົວໜ່ວຍ ແລະ ຍົກເລີກກິດຈະການອີກເຖິງ 7 ຫົວ ໜ່ວຍ ຍ້ອນວ່າປະເຊີນກັບການຂາດທຶນຢ່າງໜັກໜ່ວງ ທັງຍັງໄດ້ສ້າງໜີ້ສິນຢ່າງຫຼວງຫລາຍ ຈາກການສໍ້ລາດບັງຫຼວງອີກດ້ວຍ.
Your browser doesn’t support HTML5
ລັດຖະບານລາວ ໄດ້ດຳເນີນການປະຕິຮູບ ບໍລິສັດລັດວິສາຫະກິດ 32 ຫັວໜ່ວຍ ແລະ ຍົກເລີກກິດຈະການອີກເຖິງ 7 ຫັວໜ່ວຍ
ເຈົ້າໜ້າທີ່ຂັ້ນສູງໃນຄະນະກວດສອບລັດຖະບານ ເປີດເຜີຍວ່າ ໃນໄລຍະ 1 ປີຜ່ານມາ ລັດຖະບານລາວ ໄດ້ດຳເນີນການແປຮູບລັດວິສາຫະກິດ ຈຳນວນ 32 ຫົວໜ່ວຍ ແລະໄດ້ຍົກເລີກກິດຈະການ 7 ຫັວໜ່ວຍ ຍ້ອນວ່າ ປະເຊີນກັບການຂາດທຶນຢ່າງໜັກໜ່ວງ ທັງຍັງໄດ້ສ້າງໜີ້ໃຫ້ແກ່ລັດຖະບານລາວ ຄິດເປັນມູນຄ່າລວມຫລາຍກວ່າ 177,451 ຕື້ກີບ ໂດຍມີສາເຫດສຳຄັນມາຈາກການສໍ້ລາດບັງຫຼວງຂອງບັນດາພະນັກງານຂອງລັດວິສາຫະກິດເປັນດ້ານຫລັກ.
ໂດຍການຍົກເລີກກິດຈະການລັດວິສາຫະກິດ 7 ຫົວໜ່ວຍດັ່ງກ່າວ ເຮັດໃຫ້ລັດຖະບານລາວ ຍັງຄົງເຫລືອລັດວິສາຫະກິດທັງໝົດ 171 ຫົວໜ່ວຍ ມີຊັບສິນລວມ 184,765 ຕື້ກີບ ແຕ່ກໍຍັງປະເຊີນກັບພາວະການຂາດທຶນຢ່າງໜັກໜ່ວງ ທີ່ເກີດຈາກການບໍລິຫານທີ່ບໍ່ມີປະສິດທິພາບ ເພາະມີການຫລິ້ນພັກຫລິ້ນພວກເພື່ອສະແຫວງຫາຜົນປະໂຫຍດສ່ວນຕົວເປັນດ້ານຫລັກ ຈຶ່ງເຮັດໃຫ້ຕ້ອງດຳເນີນການປະຕິຮູບຢ່າງຮີບດ່ວນ ໂດຍໃຫ້ບໍລິສັດເອກະຊົນເຂົ້າຮ່ວມລົງທຶນ. ຖ້າບໍ່ດັ່ງນັ້ນ ລັດວິສາຫະກິດເຫຼົ່ານີ້ ຍັງຈະຕ້ອງປະເຊີນກັບການຂາດທຶນເພີ່ມຂຶ້ນ. ຍ້ອນການສໍ້ລາດບັງຫຼວງໂດຍຝ່າຍບໍລິຫານ ແລະຍາດຕິພີ່ນ້ອງ ດັ່ງເຈົ້າໜ້າທີ່ຂັ້ນສູງ ໄດ້ຍົກເອົາບັນຫາທີ່ເກີດຂຶ້ນຢູ່ໃນລັດວິສາຫະກິດເບຍລາວ ເປັນກໍລະນີຕົວຢ່າງວ່າ “ໂດຍສະເພາະລັດວິສາຫະກິດເບຍລາວນີ້ ສ້າງລາຍຈ່າຍນີ້ມະຫາສານ ສ້າງໃຫ້ຈູ້ມເຈື່ອຍາດຕິພີ່ນ້ອງ ເອົາໄປເອົາມານີ້ ວຽກທຸກວຽກ ແມ່ນຄືວຽກຂອງຄອບຄົວຫລາຍກວ່າ ຕົວຢ່າງປ້າຍໂຄສະນານີ້ ກະເປັນຂອງລູກເຂີຍ-ລູກໄພ້ ຂີ້ເບຍສື່ໆນີ້ ກະຍັງຍາດກັນຊື້ ຜັດແມ່ນຂອງລູກສາວ ເອົາໄປເອົາມານີ້ ບັນຫານີ້ ບໍ່ແມ່ນເລື່ອງແປກທີ່ລາຍງານວ່າ ບໍ່ມີກໍາໄລ? ຫຼືວ່າຈັງໃດຫັ່ນ ພວກເຮົາກະກວດໄດ້ເນາະ ບໍ່ແມ່ນວ່າ ກວດບໍ່ໄດ້ ແຕ່ວ່າການປະຕິບັດມັນຍາກຊ່ຳໃດນັ້ນ ແມ່ນອຸປະສັກ ພວກເຮົາຕ້ອງສູ້ຊົນຜ່ານຜ່ານໍາກັນ."
ທັງນີ້ ເງິນກູ້ຢືມໃນລະບົບສິນເຊື່ອຂອງທະນາຄານພາຍໃນລາວ ໃນປັດຈຸບັນນີ້ ມີມູນຄ່າລວມ 155,000 ກວ່າຕື້ກີບ ໃນນີ້ 48.45% ກໍແມ່ນສິນເຊື່ອພາຍໃຕ້ການຄຸ້ມຄອງຂອງທະນາຄານແຫ່ງຊາດ ທະນາຄານຮ່ວມທຶນລະຫວ່າງລັດແລະເອກະຊົນ 10.15%, ແລະ 41.4% ເປັນສິນເຊື່ອໃນທະນາຄານເອກະຊົນ ແຕ່ການລະບາດຂອງພະຍາດໂຄວິດ-19 ໃນໄລຍະປີ 2020-2023 ກໍເຮັດໃຫ້ບັນດາຫົວໜ່ວຍທຸລະກິດບໍ່ສາມາດຊໍາລະໜີ້ໃຫ້ທະນາຄານໄດ້ເລີຍ ອັນເຮັດໃຫ້ມີໜີ້ສິນ (NPL) ໃນລະບົບທະນາຄານເພີ່ມຂື້ນສູງກ່ວາ 7% ທັງຍັງມີໜີ້ທີ່ມີຄວາມສ່ຽງສູງທີ່ຈະເກັບຄືນມາບໍ່ໄດ້ເຖິງ 19.98% ຂອງມູນຄ່າສິນເຊື່ອທັງໝົດ ໂດຍສະເພາະແມ່ນລັດວິສາຫະກິດ ກໍຄືພາກສ່ວນທີ່ມີ NPL ຫຼາຍທີ່ສຸດ ແລະເຮັດໃຫ້ຈະຕ້ອງດຳເນີນການປະຕິຮູບຢ່າງຈິງຈັງ, ດັ່ງທີ່ ທ່ານ ສອນໄຊ ສີພັນດອນ ນາຍົກລັດຖະ ມົນຕີ ໄດ້ຖະແຫຼງຍືນຍັນວ່າ “ການປະຕິຮູບລັດວິສາຫະກິດ ແມ່ນໜ້າທີ່ທີ່ຕິດພັນກັບການຈັດຕັ້ງປະຕິ ບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ປັດຈຸບັນ ມີວິສາຫະກິດທີ່ລັດລົງທຶນໃນຂອບເຂດທົ່ວປະເທດ ຈຳນວນທັ້ງໝົດ 171 ຫົວໜ່ວຍ ໄດ້ດຳເນີນຂັ້ນຕອນການປະຕິຮູບ ຈຳນວນ 32 ຫົວໜ່ວຍ ໃນນັ້ນສາມາດປະຕິບັດສຳເລັດແລ້ວ 10 ຫັວໜ່ວຍ ແລະໄດ້ສໍາເລັດຕາມກຳນົດແຜນການປະຕິຮູບ 3 ຫົວໜ່ວຍ ຄື ລັດວິສາຫະກິດໄຟຟ້າລາວ ລັດວິສາຫະ ກິດນ້ຳມັນເຊື້ອໄຟລາວ ແລະ ລັດວິສາຫະກິດການບິນລາວ.”
ທັງນີ້ ບັນດາວິສາຫະກິດຂອງລັດຖະບານລາວມີໜີ້ຈາກການກູ້ຢືມໃນລະບົບສິນເຊື່ອຂອງທະນາຄານໃນລາວ ຄິດເປັນມູນຄ່າລວມເກີນກວ່າ 67,670 ຕື້ກີບ ໃນນີ້ ໄດ້ຕົກເປັນ NPL ໄປແລ້ວຫຼາຍກວ່າ 6,897 ຕື້ກີບ ແລະຫຼາຍກວ່າ 9,971 ຕື້ກີບ ກໍຖືກຈັດໃຫ້ເປັນໜີ້ທີ່ມີຄວາມສ່ຽງສູງທີ່ຈະເກັບຄືນບໍ່ໄດ້ ໂດຍລັດວິສາຫະກິດການບິນລາວ ລັດວິສາຫະກິດໄຟຟ້າລາວ ແລະ ລັດວິສາຫະກິດນໍ້າມັນເຊື້ອໄຟລາວ ມີໜີ້ສິນລວມກັນຫຼາຍກວ່າ 3.9 ຕື້ໂດລາຈາກການກູ້ຢືມທັງພາຍໃນແລະຕ່າງປະເທດໃນປັດຈຸບັນນີ້.