ລັດຖະບານລາວຈະຈັດເກັບລາຍຮັບໄດ້ຕໍ່າກວ່າເປົ້າໝາຍເກີນກວ່າ 14 ເປີເຊັນໃນແຜນງົບປະມານປະຈໍາປີ 2021, ຈຶ່ງເຮັດໃຫ້ຈະຕ້ອງກູ້ຢືມ ແລະຂໍການຊ່ວຍເຫລືອຈາກຕ່າງປະເທດຫລາຍກວ່າ 2000 ລ້ານໂດລາ. ເຊິ່ງ ຊົງຣິດ ໂພນເງິນ ມີລາຍງານເລື້ອງນີ້ຈາກບາງກອກ.
Your browser doesn’t support HTML5
ເຊີນຟັງລາຍງານ ການເກັບລາຍຮັບຂອງລັດຖະບານລາວ ຈະຕໍ່າກວ່າແຜນເຖິງ 14 ເປີເຊັນ ໃນແຜນງົບປະມານຂອງປີ 2021
ທ່ານພູວົງ ກິດຕິວົງ ຫົວໜ້າກົມງົບປະມານແຫ່ງລັດ ກະຊວງການເງິນ, ຖະແຫລງຍອມຮັບວ່າ ການຈັດເກັບລາຍຮັບຂອງລັດຖະບານລາວໃນປີ 2021 ຈະບໍ່ສາມາດບັນລຸເປົ້າໝາຍທີ່ວາງໄວ້ ແລະຄາດວ່າຈະສາມາດຈັດຕັ້ງປະຕິບັດໄດ້ຈິງໃນມູນຄ່າລວມບໍ່ເກີນ 23,683 ຕື້ກີບ ຫລື 85 ເປີເຊັນກວ່າ ຂອງແຜນການທີ່ວາງໄວ້ກໍຄື ລັດຖະບານລາວຈະຈັດເກັບລາຍຮັບໄດ້ຕໍ່າກວ່າແຜນການເກີນກວ່າ 14 ເປີເຊັນ, ເຊິ່ງເຮັດໃຫ້ຈະຕ້ອງຫາລາຍຮັບຈາກການກູ້ຢືມ ແລະຂໍການຊ່ວຍເຫລືອຈາກຕ່າງປະເທດສໍາຫລັບນໍາໃຊ້ເພື່ອການດຸ່ນດ່ຽງດ້ານລາຍຈ່າຍທີ່ຫລາຍກວ່າດ້ານລາຍຮັບດັ່ງກ່າວ.
ທັງນີ້, ບັດຖະບານລາວວາງແຜນຈະສ້າງລາຍຮັບໃຫ້ໄດ້ 27,629 ຕື້ກີບ ຫລືຄິດເປັນ 15.13 ເປີເຊັນຂອງມູນຄ່າຜະລິດຕະພັນລວມພາຍໃນ (GDP) ໃນຕະຫລອດປີ 2021,ແລະໃນຂະນະດຽວກັນກໍຈະຄວບຄຸມລາຍຈ່າຍໃຫ້ຢູ່ໃນມູນຄ່າລວມບໍ່ເກີນ 31,583 ຕື້ກີບ ຫລືຄິດເປັນ 17.3 ເປີເຊັນຂອງ GDP ອັນຈະເຮັດໃຫ້ລັດຖະບານລາວສາມາດຈໍາກັດການຂາດດຸນງົບປະມານໃຫ້ຢູ່ໃນມູນຄ່າບໍ່ເກີນ 3,954 ຕື້ກີບ ຫລືຄິດເປັນ 2.17 ເປີເຊັນຂອງມູນຄ່າ GDP ທັງໝົດໃນຕະຫລອດປີ 2021 ນີ້.
ແຕ່ຢ່າງໃດກໍຕາມ ການທີ່ຈະສາມາດບັນລຸຄາດໝາຍດັ່ງກ່າວໄດ້ໃນການຈັດຕັ້ງປະຕິບັດຕົວຈິງນັ້ນບໍ່ແມ່ນເລື້ອງງ່າຍ ເພາະຜົນກະທົບຈາກການລະບາດຂອງພະຍາດໄວຣັສໂຄວິດ-19 ນັບຕັ້ງແຕ່ປີ 2020 ເປັນຕົ້ນມາໄດ້ສົ່ງຜົນເຮັດໃຫ້ລັດຖະບານລາວຈັດເກັບລາຍຮັບຕໍ່າກວ່າແຜນການທີ່ວາງໄວ້ເຊັ່ນ ໃນແຜນການປີ 2020 ລັດຖະບານລາວຈັດເກັບລາຍຮັບໄດ້ຕໍ່າກວ່າແຜນການຄິດເປັນມູນຄ່າ 6,322 ກວ່າຕື້ກີບ ເຊິ່ງກໍເຊັ່ນດຽວກັນກັບໃນປີ 2016-2020 ດັ່ງທີ່ທ່ານທອງລຸນ ສີສຸລິດ ປະທານປະເທດຢືນຢັນວ່າ:
“ເກັບລາຍຮັບໄດ້ທັງໝົດ 120,422 ຕື້ກີບ ເທົ່າກັບ 98.4 ເປີເຊັນຂອງແຜນການສະເລ່ຍໄດ້ເທົ່າກັບ 15.9 ເປີເຊັນຂອງ GDP ລາຍຈ່າຍທັງໝົດປະຕິບັດໄດ້ 156,351 ຕື້ກີບ ເທົ່າກັບ 95.9 ເປີເຊັນຂອງແຜນການ ສະເລ່ຍໄດ້ເທົ່າກັບ 20.6 ເປີເຊັນຂອງ GDP ຂາດດຸນງົບປະມານໄລຍະ 5 ປີ ຢູ່ໃນລະດັບ 4.73 ເປີເຊັນຂອງ GDP.”
ທັງນີ້ ໂດຍການລະບາດຂອງໄວຣັສໂຄວິດ-19 ເຮັດໃຫ້ເສດຖະກິດລາວເກີດການເສຍຫາຍຫລາຍກວ່າ 7,000 ຕື້ກີບ, ເພາະວ່າການປະກາດຄໍາສັ່ງເລກທີ 06 ຂອງລັດຖະມົນຕີວ່າດ້ວຍມາດຕະການສະກັດກັ້ນການລະບາດໄວຣັສໂຄວິດ-19 ທີ່ບັງຄັບໃຊ້ຈາກວັນທີ 1 ເມສາ, ປີ 2020 ເປັນຕົ້ນມາ ເຮັດໃຫ້ນັກທ່ອງທ່ຽວຕ່າງຊາດບໍ່ສາມາດເດີນທາງເຂົ້າມາລາວໄດ້ເປັນປົກກະຕິ ແລະການປິດດ່ານຊາຍແດນໃນທົ່ວປະເທດນັ້ນ ຍັງໄດ້ສົ່ງຜົນກະທົບຕໍ່ການຄ້າຕ່າງປະເທດຂອງລາວອີກດ້ວຍ.
ໂດຍທະນາຄານພັດທະນາເອເຊຍ ຫລື ADB ສະເໜີລາຍງານວ່າ ເສດຖະກິດລາວໃນປີ 2020 ປັບຕົວຫລຸດລົງ ແລະຕິດລົບເຖິງ 2.5 ເປີເຊັນທຽບໃສ່ປີ 2019 ອັນຖືເປັນການຕິດລົບຄັ້ງທໍາອິດໃນໄລຍະເວລາກວ່າ 30 ປີ ນັບແຕ່ປີ 1986 ເປັນຕົ້ນມາ, ເຊິ່ງມີສາເຫດສໍາຄັນມາຈາກການລະບາດຂອງໄວຣັສໂຄວິດ-19 ໃນປີ 2020 ເລື້ອຍມາຈົນເຖິງປັດຈຸບັນ, ອັນໄດ້ເຮັດໃຫ້ພາກກະສິກໍາຂະຫຍາຍໂຕພຽງ 1.4 ເປີເຊັນ ແລະພາກບໍລິການຕິດລົບເຖິງ 5.5 ເປີເຊັນ ທຽບໃສ່ປີ 2019. ສ່ວນໃນປີ 2021 ນີ້ ADB ກໍໄດ້ປັບຫລຸດການຂະຫຍາຍໂຕຂອງ GDP ລາວຈາກ 4 ເປີເຊັນລົງມາເປັນ 2.3 ເປີເຊັນ.
ແຕ່ຢ່າງໃດກໍຕາມ ລັດຖະບານລາວໄດ້ວາງເປົ້າໝາຍຂອງວາລະແຫ່ງຊາດດ້ານເສດຖະກິດ-ການເງິນໄວ້ໃນ 4 ດ້ານດ້ວຍກັນຄື ການຫລຸດພາລະໜີ້ສາທາລະນະຂອງລັດຖະບານໃຫ້ຢູ່ທີ່ລະດັບ 64.2 ເປີເຊັນຂອງ GDP ພາຍໃນປີ 2023, ໃນນີ້ເປັນໜີ້ຕ່າງປະເທດ 55.3 ເປີເຊັນ ກັບໜີ້ພາຍໃນ 8.9 ເປີເຊັນຂອງ GDP ການເພີ້ມທຶນສໍາຮອງເງິນຕາຕ່າງປະເທດທີ່ຮັບປະກັນການນໍາເຂົ້າສິນຄ້າຈາກຕ່າງປະເທດໃຫ້ໄດ້ 3 ເດືອນ, ການຄວບຄຸມອັດຕາແລກປ່ຽນເງິນລະຫວ່າງໃນທະນາຄານກັບຕະຫລາດໃຫ້ແຕກຕ່າງກັນບໍ່ເກີນ 2 ເປີເຊັນ ແລະການຄຸມໜີ້ເງິນກູ້ໃນລະບົບທະນາຄານທີ່ຮຽກເກັບຄືນບໍ່ໄດ້ ຫລື (NPL) ໃຫ້ບໍ່ເກີນ 3 ເປີເຊັນຂອງມູນຄ່າໜີ້ທັງໝົດ.