ນາຍົກລັດຖະມົນຕີລາວຢືນຢັນວ່າ: ລັດຖະບານລາວພ້ອມແລ້ວທີ່ຈະເປັນເຈົ້າພາບຈັດກອງປະຊຸມສຸດຍອດຜູ້ນຳອາຊຽນ ແລະອາຊີຕາເວັນອອກ. ເຊິ່ງຈະມີຜູ້ນຳຈາກ 20 ກວ່າປະເທດເຂົ້າຮ່ວມທີ່ນະຄອນຫຼວງວຽງຈັນ.
Your browser doesn’t support HTML5
ລັດຖະບານລາວພ້ອມແລ້ວທີ່ຈະເປັນເຈົ້າພາບຈັດກອງປະຊຸມສຸດຍອດຜູ້ນຳອາຊຽນ ແລະອາຊີຕາເວັນອອກ
ທ່ານສອນໄຊ ສີພັນດອນ ນາຍົກລັດຖະມົນຕີ ຖະແຫລງຍືນຍັນວ່າ: ລັດຖະບານລາວໄດ້ກະກຽມທຸກດ້ານແລ້ວ ເພື່ອເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ພ້ອມທັງກອງປະຊຸມສຸດຍອດອເອເຊຍຕາເວັນອອກຄັ້ງທີ 19 ໃນລະຫວ່າງວັນທີ 8-11 ຕຸລາ 2024 ທີ່ນະຄອນຫຼວງວຽງຈັນ ເຊິ່ງຈະມີຜູ້ນຳລັດຖະບານຂອງອາຊຽນ, ຜູ້ນຳປະເທດຄູ່ເຈລະຈາຂອງອາຊຽນ, ຄະນະຜູ້ຕ່າງຫນ້າອົງການຈັດຕັ້ງສາກົນ ແລະຄະນະຜູ້ແທນລັດຖະບານຂອງປະເທດຜູ້ສັງເກດການທີ່ມາຈາກ 20 ກວ່າປະເທດທີ່ຈະເຂົ້າຮ່ວມກອງປະຊຸມສຸດຍອດສາມວາລະດັງກ່າວ ທີ່ລວມທັງກອງປະຊຸມອື່ນໆ ທີ່ກ່ຽວຂ້ອງຈົນເຖິງທ້າຍປີ 2024 ນີ້ດ້ວຍ ດັ່ງທີ່ ທ່ານສອນໄຊ ໄດ້ຖະແຫລງຍືນຍັນວ່າ:
“ພວກເຮົາຈະສືບຕໍ່ເປັນເຈົ້າພາບ ແລະເປັນປະທານຈັດກອງປະຊຸມຕ່າງໆ ຂອງອາຊຽນ ແຕ່ນີ້ຮອດທ້າຍປີ 2024 ໃຫ້ສຳເລັດຜົນຕາມຄາດຫມາຍໄວ້, ສິ່ງສໍາຄັນທີ່ສຸດພວກເຮົາຈະເປັນເຈົ້າພາບ ຫຼື ເປັນປະທານກອງປະຊຸມສຸດຍອດອາຊຽນຄັ້ງທີ 44 ແລະ 45 ພ້ອມທັງບັນດາກອງປະຊຸມສຸດຍອດທີ່ກ່ຽວຂ້ອງໃນລະຫວ່າງວັນທີ 8-11 ຕຸລາ 2024 ທີ່ນະຄອນຫຼວງວຽງຈັນ ເຊິ່ງຈະມີບັນດາປາມຸກລັດ ຫຼື ຫົວຫນ້າລັດຖະບານຈາກບັນດາປະເທດສະມາຊິກຂອງອາຊຽນ ແລະຄູ່ຮ່ວມມືພາຍນອກຂອງອາຊຽນ ລວມທັ້ງຫມດ 20 ກວ່າປະເທດ ພ້ອມທັງຫົວໜ້າອົງການຈັດຕັ້ງສາກົນເຂົ້າຮ່ວມ.”
ສ່ວນນັກຊ່ຽວຊານໃນດ້ານການພົວພັນ ແລະການຮ່ວມມືໃນອາຊຽນ ເປີດເຜີຍວ່າ ສາເຫດສຳຄັນທີ່ລັດຖະບານລາວຈະຕ້ອງຈັດກອງປະຊຸມສຸດຍອດຜູ້ນຳອາຊຽນໃນປີ 2024 ທັ້ງສອງຄັ້ງຕິດຕໍ່ກັນຄື ຄັ້ງທີ 44 ແລະ 45 ກະຍ້ອນວ່າ ລັດຖະບານລາວມີງົບປະມານຈຳກັດ. ໃນຂະນະທີ່ການຈັດກອງປະຊຸມດັ່ງກ່າວຈະຕ້ອງການໃຊ້ງົບປະມານຈຳນວນຫຼາຍ. ໂດຍສະເພາະໃນດ້ານການຮັກສາຄວາມປອດໄພໃຫ້ແກ່ຜູ້ນຳ ແລະຜູ້ຕາງໜ້າຂອງທຸກປະເທດທີ່ເຂົ້າຮ່ວມໃນກອງປະຊຸມຕ່າງໆ ທີ່ຈະຈັດຂຶ້ນໃນລະຫວ່າງວັນທີ 6-12 ຕຸລາ 2024 ທີ່ນະຄອນຫຼວງວຽງຈັນ, ໃນນີ້ ລວມເຖິງກອງປະຊຸມສຸດຍອດເອເຊຍຕາເວັນອອກ ທີ່ມີຜູ້ນຳອາເມຣິກາ, ຈີນ, ຣັດເຊຍ, ອິນເດຍ, ອອສເຕຣເລຍ ແລະ ນິວຊີແລນ ເຂ້າຮ່ວມໃນກອງປະຊຸມອີກດ້ວຍ, ດັ່ງທີ່ຜູ້ຊ່ຽວຊານໃຫ້ການຢືນຢັນວ່າ:
“ສປປ ລາວ ໄດ້ຕັດສິນໃຈວ່າ ຈະມີກອງປະຊຸມສຸດຍອດອາຊຽນ ຄັ້ງທີ 44 ແລະ 45 ພ້ອມກັນໃນເດືອນຕຸລາ, ການຈັດການປະຊຸມທັງສອງໃນຊ່ວງເວລາດຽວກັນ ມັນຈະຊ່ວຍຫຼຸດຜ່ອນຄ່າໃຊ້ຈ່າຍ ໂດຍສະເພາະກ່ຽວກັບການຮັກສາຄວາມປອດໄພ ຫຼື ການເບິ່ງແຍງຜູ້ນໍາຂອງປະເທດຕ່າງໆທີ່ເຂົ້າຮ່ວມກອງປະຊຸມັັັັັັັັັັັດ, ຢ່າລືມວ່າ ຜູ້ນຳຂອງສະຫະລັດ, ຈາກຈີນ, ຈາກຣັດເຊຍ, ຈາກອິນເດຍ, ຈາກອອສເຕຣເລຍ, ແລະຈາກ ນິວຊີແລນ, ເຊິ່ງເປັນຄູ່ເຈລະຈາທີ່ສໍາຄັນນັ້ນ, ຈະໄດ້ພົບປະກັນໃນລະຫວ່າງການປະຊຸມທີ່ເອີ້ນວ່າກອງປະຊຸມສຸດຍອດເອເຊຍຕາເວັນອອກ.”
ກ່ອນຫນ້ານີ້ ທ່ານສະເຫລິມໄຊ ກົມມະສິດ, ຮອງນາຍົກລັດຖະມົນຕີ ແລະລັດຖະມົນຕີວ່າການຕ່າງປະເທດ ໄດ້ອອກມາຖະແຫຼງຢືນຢັນວ່າ ອຳນາດການປົກຄອງລາວ ໄດ້ເພີ້ມທະວີການຮັກສາຄວາມປອດໄພ ແລະຕິດຕາມຢ່າງໃກ້ຊິດທຸກການເຄື່ອນໄຫວໃນຂອບເຂດທົ່ວປະເທດ ສໍາລັບໂອກາດທີ່ລັດຖະບານລາວເປັນປະທານອາຊຽນໃນປີ 2024 ລວມທັງຈະຕິດຕາມການເຜີຍແຜ່ຂໍ້ມູນ ແລະຂ່າວສານທາງສື່ສັງຄົມຢ່າງໃກ້ສິດ ທັງໃນລາວ ແລະ ຕ່າງປະເທດດ້ວຍ, ພ້ອມທັງຈະຕອບໂຕ້ຄືນໃນທັນທີ ໃນກໍລະນີທີ່ສື່ສັງຄົມ ນຳສະເໜີຂໍ້ມູນຂ່າວສານທີ່ໂຈມຕີລັດຖະບານລາວໃນຖານະປະທານອາຊຽນປີ 2024 ນີ້.
ໃນປັດຈຸບັນ, ປະເທດລາວມີສື່ສັງຄົມອອນລາຍຫຼາຍກວ່າ 100 ສື່ ທີ່ໄດ້ຈົດທະບຽນຍ່າງຖືກຕ້ອງຕາມກົດໝາຍສື່ມວນຊົນ. ແຕ່ກໍຍັງມີອີກຫລາຍສິບສື່ສັງຄົມອອນລາຍ ທີ່ໄດ້ເຜີຍແຜ່ຂຂໍ້ມູນ ແລະຂ່າວສານກ່ຽວກັບລາວໃນຕ່າງປະເທດ ທີ່ທາງການລາວຄວບຄຸມບໍ່ໄດ້. ສະນັ້ນ, ຈຶ່ງຢາກຈະພັດທະນາລະບົບເຄືອຂ່າຍສື່ມວນຊົນໃນລາວໃຫ້ມີຄວາມທັນສະໄໝ ດ້ວຍການຊ່ວຍ ເຫຼືອທາງວິຊາການ ແລະເທັກນິກຂັ້ນສູງຈາກ ສປ ຈີນ ເພື່ອໃຫ້ສາມາດຕອບໂຕ້ກັບສື່ສັງຄົມໃນຕ່າງປະເທດໄດ້ຢ່າງເທົ່າທັນກັບການເຜີຍແຜ່ຂໍ້ມູນແລະ ຂ່າວສານທີ່ໂຈມຕີການນຳຂອງພັກ ແລະ ຄວາມລ້ມເຫລວໃນການຈັດຕັ້ງປະຕິບັດແຜນການພັດທະນາຕ່າງໆຂອງພັກ ແລະລັດຖະບານລາວ.