ລັດຖະບານລາວບໍ່ມີງົບປະມານສຳລັບນຳໃຊ້ໃນການພັດທະນາດ່ານສາກົນປາກຕະພານ ໃນແຂວງສາລະວັນ ເພື່ອຮອງຮັບການເຊື່ອມຕໍ່ການຄ້າ ແລະ ການທ່ອງທ່ຽວລະຫວ່າງ ລາວ-ໄທ-ຫວຽດນາມ.
Your browser doesn’t support HTML5
ລັດຖະບານລາວບໍ່ມີງົບປະມານສຳລັບການພັດທະນາດ່ານສາກົນປາກຕະພານ ໃນແຂວງສາລະວັນ
ເຈົ້າໜ້າທີ່ຂັ້ນສູງໃນແຂວງສາລະວັນ ເປີດເຜີຍວ່າ ພາຍຫຼັງທີ່ໄດ້ມີການຍົກລະດັບດ່ານຊາຍແດນບ້ານປາກຕະພານ ເມືອງລະຄອນເພັງ ຂຶ້ນເປັນດ່ານສາກົນ ແລະໄດ້ຈັດພິທີເປີດຢ່າງເປັນທາງການ ນັບຈາກເດືອນກັນຍາ 2024 ເປັນຕົ້ນມາ ຈົນເຖິງປັດຈຸບັນນີ້ ທາງການແຂວງສາລະວັນ ຍັງບໍ່ສາມາດພັດທະນາລະບົບພື້ນຖານຕ່າງໆເພື່ອຮອງຮັບການເຊື່ອມຕໍ່ທາງການຄ້າ ແລະການທ່ອງທ່ຽວລະຫວ່າງລາວ, ໄທ ແລະຫວຽດນາມ ໃຫ້ມີຄວາມສະດວກແລະວ່ອງໄວໄດ້ ໃນການຈັດຕັ້ງປະຕິບັດຕົວຈິງ ແຕ່ຢ່າງໃດກໍຕາມ ຍ້ອນວ່າລັດຖະບານຍັງບໍ່ທັນມີງົບປະມານໃຫ້ການສະໜັບສະໜູນ ໂດຍສະເພາະແມ່ນການກໍ່ສ້າງອາຄານສໍານັກງານພາສີ ແລະກວດຄົນເຂົ້າ-ອອກເມືອງ ລວມເຖິງການກໍ່ສ້າງເສັ້ນທາງທີ່ເຊື່ອມຕໍ່ດ່ານສາກົນກັບທາງເລກທີ 13 ໃຕ້ ເພື່ອເຮັດໃຫ້ການເຊື່ອມຕໍ່ໄປຫວຽດນາມ ສາມາດດຳເນີນການໄດ້ຢ່າງສະດວກ-ວ່ອງໄວດ້ວຍນັ້ນ ດັ່ງເຈົ້າໜ້າທີ່ຂັ້ນສູງຂອງລາວ ຢືນຢັນວ່າ:
“ເຖິງແມ່ນວ່າ ການຍົກລະດັບດ່ານທ້ອງຖິ່ນປາກຕະພານຂຶ້ນເປັນດ່ານສາກົນ ຈະມີທ່າແຮງແລະປະໂຫຍດຫຼາຍດ້ານ ກໍຍັງມີສິ່ງທ້າທາຍຈຳນວນໜຶ່ງທີ່ຈະຕ້ອງໄດ້ສືບຕໍ່ເອົາໃຈໃສ່ຈັດຕັ້ງປະຕິບັດໃຫ້ມີຜົນສຳເລັດ ເປັນຕົ້ນ ການປະສານງານລະຫວ່າງດ່ານສາກົນປາກຕະພານ ກັບດ່ານສາກົນປາກແຊງຂອງໄທ ໃນການພັວພັນປະສານງານ ແລະການແລກປ່ຽນຂໍ້ມູນ-ຂ່າວສານ ການປັບປຸງພື້ນຖານໂຄງຮ່າງ ໂດຍສະເພາະກໍແມ່ນເສັ້ນທາງ ເພື່ອໃຫ້ສາມາດຮອງຮັບການສັນຈອນຂອງລົດບັນທຸກຂະໜາດໃຫຍ່ ໃຫ້ມີຄວາມສະດວກຍິ່ງຂື້ນ.”
ໂດຍດ່ານປາກຕະພານ ມີທີ່ຕັ້ງຢູ່ກົງກັນຂ້າມຝັ່ງແມ່ນ້ຳຂອງກັບບ້ານປາກແຊງ ເມືອງນາຕານ ແຂວງອຸບົນຣາຊະທານີ ປະເທດໄທ ຊຶ່ງມີເປົ້າໝາຍສຳຄັນເພື່ອເຊື່ອມຕໍ່ການຄ້າ ແລະການທ່ອງທ່ຽວ ລະຫວ່າງ ລາວ-ໄທ ແລະ ຫວຽດນາມ ດ້ວຍໄລຍະທາງສັ້ນທີ່ສຸດ ເມື່ອທຽບໃສ່ກັບດ່ານສາກົນອື່ນໆ ທີ່ເຊື່ອມຕໍ່ ລາວ-ໄທ-ຫວຽດນາມ ຈຶ່ງມີການຄາດໝາຍວ່າ ດ່ານສາກົນທີ່ບ້ານປາກຕະພານ ຈະມີບົດບາດຢ່າງສໍາຄັນໃນການເພີ້ມມູນຄ່າທາງການຄ້າ ແລະການຂະຫຍາຍດ້ານການທ່ອງທ່ຽວລະຫວ່າງ ລາວ-ໄທ-ຫວຽດນາມ ແລະສາກົນຫລາຍຂຶ້ນນັບມື້ ຖ້າຫາກວ່າ ໂຄງຮ່າງພື້ນຖານໄດ້ຮັບການພັດທະນາຢ່າງສົມບູນແລ້ວ ໃນນີ້ ລວມມີໂຄງການກໍ່ສ້າງຂົວຂ້າມແມ່ນໍ້າຂອງ ເຊື່ອມຕໍ່ລະຫວ່າງດ່ານປາກຕະພານ ແລະດ່ານປາກແຊງດ້ວຍນັ້ນເອງ.
ແຕ່ຢ່າງໃດກໍ່ຕາມ ແຜນການກໍ່ສ້າງຂົວດັ່ງກ່າວນີ້ ກໍໄດ້ຖືກເລື່ອນອອກໄປຢ່າງບໍ່ມີກຳນົດທີ່ຊັດເຈນ ເນື່ອງຈາກວ່າ ລັດຖະບານລາວ ຍັງປະເຊີນກັບການຂາດງົບປະມານຢ່າງໜັກໜ່ວງ ຍ້ອນຜົນກະທົບຈາກວິກິດການເສດຖະກິດ-ການເງິນໃນລາວ ນັບແຕ່ປີ 2020 ເປັນຕົ້ນມາ ຊຶ່ງເຮັດໃຫ້ສູນເສຍໂອກາດທາງການຄ້າໄປບໍ່ໜ້ອຍ ດັ່ງທີ່ນັກທຸລະກິດໄທ ໄດ້ໃຫ້ການຢືນຢັນວ່າ:
“ຖ້າເກີດວ່າ ມີຂົວ ສິນຄ້າທີ່ຜະລິດຢູ່ໃນປະເທດໄທເຮົານິ, ມັນຈະສາມາດທີ່ຈະຂ້າມໄປໄດ້ງ່າຍຫຼາຍ ແລ້ວມູນຄ່າ ແລະປະລິມານ ມັນກໍຈະມະຫາສານ. ຖ້າເກີດວ່າ ເຮົາເລື່ອນແຜນການກໍ່ສ້າງຂົວອອກໄປ, ລາຍໄດ້ຂອງເຮົາກໍຈະສູນເສຍໄປຢ່າງຫຼວງຫຼາຍ ປີໜຶ່ງຄືທີ່ດ່ານຊ່ອງເມັກນີ້ ລາຍໄດ້ປະມານຫລັກໝື່ນລ້ານເນາະ ຢູ່ທີ່ດ່ານປາກແຊງ ທີ່ກຳລັງຈະສ້າງຂົວໃໝ່ ມັນກໍຄົງຈະບໍ່ຕ່າງກັນ. ເພາະດ່ານນັ້ນ ມັນສາມາດຈະເຊື່ອມຕໍ່ໄປຍັງຫວຽດນາມໄດ້ໄກ້ກວ່າ.”
ໂດຍແຜນການກໍ່ສ້າງຂົວຂ້າມແມ່ນໍ້າຂອງແຫ່ງທີ 6 ລະຫວ່າງ ລາວ-ໄທດັ່ງກ່າວນີ້ ຊຶ່ງລັດຖະບານໄທ ໄດ້ຕົກລົງໃນຫຼັກການ ແລ້ວວ່າ ຈະຈັດສັນງົບປະມານໃນມູນຄ່າລວມ 4,765 ລ້ານບາດ ເພື່ອໃຫ້ການສະໜັບສະໜູນການກໍ່ສ້າງ, ໂດຍໃນນີ້ 50 ເປີເຊັນ ຈະເປັນການຊ່ວຍເຫຼືອ ແລະເງິນກູ້ທີ່ຈັດສັນໃຫ້ລັດຖະບານລາວ ເພື່ອນຳໃຊ້ເຂົ້າໃນການກໍ່ສ້າງຂົວໃນລາວ ທີ່ມີຄວາມຍາວ 1,020 ແມັດ ແລະ ມີ 2 ຊ່ອງຈະລາຈອນ ລວມທັງຈະມີການກໍ່ສ້າງອາຄານ ດ່ານພາສີ ແລະ ເສັ້ນທາງເຊື່ອມຕໍ່ຂັວຢູ່ເບື້ອງລາວດ້ວຍ. ຊຶ່ງຈະເຮັດໃຫ້ການເຊື່ອມຕໍ່ລະຫວ່າງ ລາວ-ໄທ-ຫວຽດນາມ ມີຄວາມຍາວພຽງ 150 ກິໂລແມັດເທົ່ານັ້ນ.