ຄ່າໃຊ້ຈ່າຍໃນການຂົນສົ່ງສິນຄ້າທາງລົດໄຟ ລາວ-ຈີນ ຍັງສູງກວ່າຄ່າຂົນສົ່ງສິນຄ້າດ້ວຍລົດບັນທຸກເຖິງ 2 ເທົ່າ ເນື່ອງຈາກການເກັບຄ່າບໍລິການຂົນສົ່ງສິນຄ້າໃນລາວ ສູງກວ່າມາດຕະຖານສາກົນ.
Your browser doesn’t support HTML5
ຄ່າໃຊ້ຈ່າຍໃນການຂົນສົ່ງສິນຄ້າທາງລົດໄຟ ລາວ-ຈີນ ຍັງສູງກວ່າຄ່າຂົນສົ່ງສິນຄ້າດ້ວຍລົດບັນທຸກເຖິງ 2 ເທົ່າ
ນັກທຸລະກິດໄທໃນລາວ ໃຫ້ທັດສະນະວ່າ ລາວຍັງໄດ້ຮັບຜົນປະໂຫຍດບໍ່ຫຼາຍຈາກການບໍລິການຂົນສົ່ງສິນຄ້າ Logistic ນັບຈາກທີ່ໄດ້ເປີດເສັ້ນທາງລົດໄຟລາວ-ຈີນ ຢ່າງເປັນທາງການ ເມື່ອວັນທີ 3 ທັນວາ 2021 ເປັນຕົ້ນມາ ໂດຍມີສາເຫດສຳຄັນຈາກຕົ້ນທຶນການຂົນສົ່ງສິນຄ້າໃນລາວທີ່ສູງກວ່າປະເທດເພື່ອນບ້ານ ໂດຍສະເພາະຄ່າທຳນຽມໃນການໃຊ້ບໍລິການທ່າບົກທີ່ສູງເກີນໄປ ທັ້ງຢັງເປັນຄ່າທຳນຽມທີ່ສູງກວ່າມາດຕະຖານສາກົນອີກດ້ວຍ ຈຶ່ງເຮັດໃຫ້ການມີລົດໄຟທີ່ເຊື່ອມຕໍ່ລາວ-ຈີນນັ້ນ ບໍ່ໄດ້ເຮັດໃຫ້ຄ່າຂົນສົ່ງສິນຄ້າຈາກລາວ ໄປຈີນຫລຸດລົງແຕ່ຢ່າງໃດ ແຕ່ປະກົດວ່າ ຄ່າຂົນສົ່ງກໍຍັງສູງກວ່າການຂົນສົ່ງສິນຄ້າດ້ວຍລົດບັນທຸກຈາກໄທຜ່ານລາວໄປຈີນ ທີ່ຄິດເປັນອັດຕາສ່ວນເຖິງ 2 ເທົ່າ ຈຶ່ງເຮັດໃຫ້ນັກທຸລະະກິດໄທສ່ວນໃຫຍ່ ຍັງຄົງຂົນສົ່ງສິນຄ້າຈາກໄທ ຜ່ານລາວ ໄປຈີນ ດ້ວຍລົດບັນທຸກສິນຄ້າເປັນດ້ານຫຼັກ ດັ່ງທີ່ນັກທຸລະກິດໄທໃນລາວ ໄດ້ໃຫ້ການຢືນຢັນວ່າ:
“ການຂົນສົ່ງສິນຄ້ານີ້ ຂ້ອຍເບິ່ງແລ້ວມັນຍັງບໍ່ໄດ້ຜົນ ເພາະວ່າ ຍັງບໍ່ສາມາດຄວບຄຸມລາຄາການຂົນສົ່ງໃຫ້ຕ່ໍາກວ່າການຂົນສົ່ງຜ່ານລະບົບຖະໜົນ ກໍຄືໂດຍສະເລ່ຍແລ້ວ ຄ່າຂົນສົ່ງຕໍ່ຕູ້ລົດໄຟທີ່ເຮົາຕ້ອງເອົາຂ້າມຊາຍແດນໄປນັ້ນ ຈຳພວກໝາກໄມ້ທີ່ຂ້າມແດນໄປຫັ່ນ ມັນມີລາຄາ 200,000 ກວ່າບາດ ແຕ່ໃນຂະນະທີ່ພວກເຮົາໃຊ້ການຂົນສົ່ງ ຜ່ານຖະຫນົນ R3A ເພື່ອສົ່ງໄປຊາຍແດນຈີນນັ້ນ ຄ່າຂົນສົ່ງສະເລ່ຍມັນຕົກຍູ່ປະມານ 100,000 ກວ່າບາດຕໍ່ຕູ້.”
ສ່ວນຜູ້ຊ່ຽວຊານດ້ານການຄ້າໃນອາຊຽນ ໄດ້ໃຫ້ທັດສະນະວ່າ ການເຊື່ອມຕໍ່ທາງລົດໄຟລາວ-ຈີນ ແມ່ນປັດໄຈສຳຄັນທີ່ຈະສົ່ງຜົນດີຕໍ່ການພັດທະນາເສດຖະກິດໃນໄລຍະຍາວຂອງລາວ. ເພາະທາງລົດໄຟດັ່ງກ່າວ ຈະໃຫ້ໂອກາດລາວ ໃນການສົ່ງອອກສິນຄ້າໄປຈີນ ແລະປະເທດອື່ນໆຫລາຍຂຶ້ນ ໃນຂະນະດຽວກັນ ການທີ່ປະເທດລາວ ມີທີ່ຕັ້ງທີ່ເຊື່ອມຕໍ່ກັບໄທແລະຈີນດ້ວຍນັ້ນ ກໍແມ່ນປັດໄຈສຳຄັນທີ່ຈະເຮັດໃຫ້ລາວໄດ້ຮັບຜົນປະໂຫຍດຈາກການບໍລິການດ້ານ Logistic ໃນການຄ້າລະຫວ່າງໄທແລະຈີນ ລວມທັງຜົນປະໂຫຍດຈາກການທ່ອງທ່ຽວດ້ວຍ ດັ່ງທີ່ຜູ້ຊ່ຽວຊານ ຢືນຢັນວ່າ:
“ເຊື່ອວ່າ ຖ້າຫາກນັກທ່ອງທ່ຽວຈີນເລີ່ມກັບຄືນມາ ລາວກໍຈະໄດ້ເງິນຕາຕ່າງປະເທດ ແລ້ວກໍມີການນຳໃຊ້ທາງລົດໄຟ ທາງດ່ວນຫຼືອື່ນໆອີກຫຼາຍຢ່າງ ມັນກໍຈະເຮັດໃຫ້ລາວກາຍເປັນປະເທດທີ່ຄ່າຂົນສົ່ງສິນຄ້າ Logistic ຫຼຸດລົງເທື່ອລະກ້າວ, ມີຄົນຄາດຄະເນວ່າ ຄ່າຂົນສົ່ງຈະຫຼຸດລົງ 50%-60% ແລະການເດີນທາງທາງຖະຫນົນກໍຈະດີຂຶ້ນ ດັ່ງນັ້ນເລື່ອງຂອງຄ່າຂົນສົ່ງ. ມັນຈະເຮັດໃຫ້ສິ່ງຂອງຕ່າງໆ ລາຄາຖືກລົງ ໂດຍລວມແລ້ວ, ຖືວ່າ ປະເທດລາວກໍຕ້ອງອາໄສລົດໄຟໄຟຟ້ານີ້ແຫລະ ເພື່ອເຊື່ອມຕໍ່ກັບຕະຫຼາດທີ່ໃຫຍ່ກໍຄືຈີນແລະອີກບໍ່ດົນລາວເອງ ກໍຈະກາຍເປັນສູນກາງ Logistic ຂອງບັນດາປະເທດທີ່ຢາກສົ່ງສິນຄ້າໄປຈີນ ດັ່ງນັ້ນໃນໄລຍະຍາວແນວທາງນີ້ຈະເກີດຂຶ້ນຢ່າງແນ່ນອນ.”
ແຕ່ຍ່າງໃດກໍ່ຕາມ ການຈັດຕັ້ງປະຕິບັດແຜນພັດທະນາລາວ ໃຫ້ເປັນສູນກາງດ້ານ Logistic ໃນເຂດລຸ່ມແມ່ນໍ້າຂອງນັ້ນຍັງປະສົບກັບບັນຫາຊັກຊ້າ ໂດຍສະເພາະແມ່ນໂຄງການ Vientiane Logistic Park ທີ່ຈະຮອງຮັບການຂົນສົ່ງສິນຄ້າໂດຍທາງລົດໄຟ ລາວ-ຈີນ ທີ່ໄດ້ເວນຄືນທີ່ດິນຂອງປະຊາຊົນລາວ ນັບແຕ່ປີ 2019 ເປັນຕົ້ນມາແລ້ວກໍຕາມ ແຕ່ກໍປະກົດວ່າ ບໍລິສັດທີ່ລົງທຶນໃນໂຄງການດັ່ງກ່າວນີ້ ໄດ້ຈ່າຍຄ່າຊົດເຊີຍທີ່ດິນ ແລະສິ່ງປຸກສ້າງໃຫ້ປະຊາຊົນທີ່ໄດ້ຮັບຜົນກະທົບໄດ້ພຽງແຕ່ 19 ລາຍເທົ່ານັ້ນ ໃນຈໍານວນທັງໝົດ 89 ລາຍ ທີ່ໄດ້ຮັບຜົນກະທົບ ທັງຍັງໄດ້ມີການປັບຫຼຸດຄ່າຊົດເຊົຍລົງອີກດ້ວຍ ເຖິງແມ່ນວ່າ ຄ່າເວນຄືນທີ່ຈ່າຍໃຫ້ຜູ້ໄດ້ຮັບຜົນກະທົບນັ້ນ ຈະຕໍ່າກວ່າລາຄາທີ່ດິນທີ່ຊື້ຂາຍຕົວຈິງຢູ່ແລ້ວກໍຕາມ.
ສ່ວນໂຄງການທາງລົດໄຟ ລາວ-ຈີນ ໃນລາວ ໄດ້ກະທົບຕໍ່ປະຊາຊົນ 8,139 ຄອບຄົວ ໃນນັ້ນ ໄດ້ຈ່າຍຄ່າຊົດເຊີຍແລ້ວ 7,306 ຄອບຄົວ ຄິດເປັນມູນຄ່າລວມ 1,530 ກວ່າຕື້ກີບ ແລະ ຍັງເຫລືອ 833 ຄອບຄົວ ທີ່ຍັງບໍ່ທັນຮັບເອົາຄ່າຊົດເຊີຍ ເພາະເຫັນວ່າ ເປັນການຊົດເຊີຍທີ່ຕ່ຳກວ່າຄວາມເປັນຈິງ ໂດຍສະເພາະຢູ່ແຂວງວຽງຈັນ ແລະເຂດນະຄອນຫຼວງວຽງຈັນ ທີ່ຊົດເຊີຍໃນອັດຕາ 15,000-137,000 ກີບຕໍ່ຕາແມັດ ໃນຂະນະທີ່ທີ່ດິນຢູ່ໃນເຂດນະຄອນຫລວງວຽງຈັນ ມີລາຄາຊື້-ຂາຍສູງກວ່າ 6 ລ້ານກີບຕໍ່ຕາແມັດ ເຊິ່ງສູງກວ່າຄ່າຊົດເຊີຍຈາກໂຄງການທາງລົດໄຟເຖິງ 40 ເທົ່າຕັວນັ້ນ.