ລັດຖະບານລາວຈະພິຈາຣະນາການເພີ້ມອັດຕາຄ່າຈ້າງຂັ້ນຕ່ຳໃຫ້ສອດຄ່ອງກັບສະພາບການຕົວຈິງ ໃນໄວໆນີ້. ສ່ວນແຮງງານລາວກໍຍັງເດີນທາງໄປເຮັດວຽກຢູ່ຕ່າງປະເທດ ເພີ້ມຂຶ້ນເລື່ອຍໆ. ຊົງຣິດ ໂພນເງິນ ມີລາຍງານກ່ຽວກັບເລື້ອງນີ້ ຈາກບາງກອກ.
Your browser doesn’t support HTML5
ລັດຖະບານລາວ ຈະພິຈາລະນາຂຶ້ນອັດຕາຄ່າຈ້າງຂັ້ນຕໍ່າ ໃນໄວໆນີ້ ໃນຂະນະທີ່ແຮງງານລາວ ຍັງພາກັນເດີນທາງໄປເຮັດວຽກຢູ່ຕ່າງປະເທດຫຼາຍຂຶ້ນ
ນັກທຸລະກິດລາວໃນສະພາການຄ້າ ແລະອຸດສາຫະກຳແຫ່ງຊາດ ເປີດເຜີຍວ່າ ພາກທຸລະກິດເອກະຊົນໃນລາວ ຍັງຈະປະເຊີນກັບບັນຫາການຂາດແຄນແຮງງານທີ່ຮຸນແຮງຂຶ້ນ. ທັງນີ້ ກໍຍ້ອນວ່າ ຄົນງານລາວ ສ່ວນໃຫຍ່ ຍັງເດີນທາງ ໄປເຮັດວຽກ ຢູ່ຕ່າງປະເທດ ເພີ້ມຂຶ້ນເລື້ອຍໆ ໂດຍສະເພາະ ປະເທດໄທ ແລະ ເກົາຫລີໃຕ້. ເປັນຈຸດໝາຍປາຍທາງທີ່ຄົນງານລາວເດີນທາງໄປຫາວຽກເຮັດຫລາຍທີ່ສຸດ. ເພາະອັດຕາຄ່າຈ້າງແມ່ນສູງກວ່າຢູ່ລາວຫຼາຍເທົ່າ. ຈືງເຮັດໃຫ້ແຮງງານລາວມີລາຍຮັບພຽງພໍກັບລາຍຈ່າຍປະຈຳວັນ ແລະ ຍັງສາມາດສົ່ງເງິນກັບໄປລ້ຽງຄອບຄົວຢູ່ລາວໄດ້ອີກດ້ວຍ. ດັງທີ່ນັກທຸລະກິດລາວ ໄດ້ຢືນຢັນວ່າ:
“ເຮັດວຽກຍູ່ພາຍໃນ ສະເລ່ຍຕໍ່ເດືອນໄດ້ພຽງແຕ່ 2-3 ລ້ານ ຫຼື 4-5 ລ້ານກີບເປັນຍ່າງຫຼາຍ ສ່ວນຜູ້ທີ່ໄປເຮັດວຽກຢູ່ຕ່າງປະເທດ ສະເລ່ຍຕໍ່ເດືອນແມ່ນ 7 ລ້ານ – 8 ລ້ານ ຫຼື 10 ລ້ານກີບ ສະເພາະຢູ່ ສາທາລະ ນະລັດເກົາຫຼີ ສະເລ່ຍຕໍ່ເດືອນແມ່ນປະມານ 30 ລ້ານ ຫາ 40 ລ້ານກີບ. ສຳຫລັບເງື່ອນໄຂຂອງຜູ້ທີ່ໄປນັ້ນ ສ່ວນຫລາຍກະແມ່ນຊາວໜຸ່ມທີ່ມີອາຍຸລະຫວ່າງ 25 ຫາ 35 ປີ.”
ສ່ວນທ່ານ ນາງ ໃບຄຳ ຂັດຕິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຖະແຫລງວ່າຄະນະກຳມະການໄຕພາຄີ ທີ່ປະກອບດ້ວຍສະຫະພັນກຳມະບານ ສະພາການຄ້າແລະອຸດສາຫະກຳແຫ່ງຊາດ ແລະ ກະຊວງແຮງງານ ແລະ ສະຫວັດດີການສັງຄົມ ຈະຮ່ວມກັນພິຈາລະນາການຂຶ້ນຄ່າຈ້າງຂັ້ນຕ່ຳໃຫ້ແຮງງານໃນລາວໃນໄວໆນີ້. ແຕ່ຍັງບໍ່ທັນເປັນທີ່ຈະແຈ້ງເທື່ອວ່າຈະເພີ່ມຂຶ້ນຫຼາຍປານໃດ. ເພາະຕ້ອງລໍຖ້າການນຳສະເໜີຂອງແຕ່ລະຝ່າຍໃນອົງການໄຕພາຄີ ດັ່ງທີ່ທ່ານນາງໃບຄຳ ຢືນຢັນວ່າ:
“ກ່ຽວກັບການພິຈາລະນາເພີ່ມຄ່າແຮງງານຂັ້ນຕ່ຳ ພວກເຮົາໄດ້ມີຄວາມພະຍາຍາມຫລາຍໃນການເຮັດວຽກກັບອົງການໄຕພາຄີ ເຊິ່ງແມ່ນ ອົງການຜູ້ຕ່າງຫນ້າຂອງຜູ້ອອກແຮງງານແລະ ອົງການຕ່າງຂອງຜູ້ໃຊ້ແຮງງານ ສະພາການຄ້າແລະ ອຸດສາຫະ ກຳແຫ່ງຊາດ ແລະ ສະຫະພັນກຳມະບານລາວຂັ້ນສູນກາງ ແລະ ມີການປຶກສາຫາລືກັບບັນດາກະຊວງ ແລະ ຂະແຫນງການທີ່ກ່ຽວຂ້ອງ ແລະການປັບຂຶ້ນຄ່າຈ້າງຂັ້ນຕ່ຳນີ້. ພວກເຮາກະຄາດວ່າຈະໄດ້ສະເຫນີຕ່ອລັດຖະບານໃນການຮັບຮອງເອາອັດຕາຄ່າຈ້າງຂັ້ນຕ່ຳໃນອັດຕາໃໝ່ໃນໄວໆນີ້.”
ທັ້ງນີ້ລັດຖະບານໄທກຳລັງພິຈາລະນາແຜນການຂື້ນຄ່າຈ້າງຂັ້ນຕ່ຳເປັນ 400 ບາດ ຕໍ່ມື້ ນັບແຕ່ວັນທີ 1 ຕຸລາ 2024 ເປັນຕົ້ນໄປ, ເຊິ່ງຈະເປັນການເພີ່ມຄ່າຈ້າງໃຫ້ຄົນງານທັງໝົດ ລວມທັງຄົນງານລາວ, ມຽນມາ ແລະ ກຳພູຊາ ທີ່ເຮັດວຽກຢູ່ໃນປະເທດໄທຢ່າງຖືກກົດໝາຍ ນອກຈາກນັ້ນ ຍັງໄດ້ຫຼຸດຄ່າທຳນຽມ VISA ສຳລັບຄົນງານລາວ, ມຽນມາ, ກຳປູເຈຍທີ່ເຮັດວຽກຢູ່ໄທຢ່າງຖືກກົດໝາຍ ຄືໄດ້ຫຼຸດລົງຈາກ 2,000 ບາດ ເຫຼືອພຽງ 500 ບາດເທົ່ານັ້ນ, ຈຶ່ງຄາດວ່າຈະມີຄົນງານລາວ, ມຽນມາ, ກຳປູເຈຍ ເດີນ ທາງໄປເຮັດວຽກຢູ່ໄທຕື່ມອີກ. ໃນນັ້ນລວມທັງຄົນງານລາວດ້ວຍ. ດັ່ງນັ້ນ, ຈືງເຮັດໃຫ້ພາກການຜະລິດໃນລາວປະສົບກັບປັນຫາການຂາດແຄນແຮງງານຫຼາຍກວ່າ 800,000 ຄົນໃນປັດຈຸບັນ.
ສ່ວນທ່ານ ຊະນິນ ຊະລິດສາພົງ, ສະມາຊິກສະພາການຄ້າແຫ່ງຊາດໄທ ຢືນຢັນວ່າອົງການນາຍຈ້າງທີ່ປະກອບດ້ວຍ 92 ສະມາຄົມທີ່ຕາງໜ້າໃຫ້ວິສາຫະກິດຂະໜາດກາງ ແລະ ຂະໜາດນ້ອຍ 15,000 ກວ່າແຫ່ງທີ່ມາຈາກ 76 ແຂວງໃນທົ່ວປະເທດໄທ ໄດ້ຍື່ນຈົດໝາຍເຖິງລັດຖະມົນຕີວ່າການກະຊວງແຮງງານໄທ. ເພື່ອສະແດງຄວາມຄັດຄ້ານຕໍ່ແຜນການຂອງລັດຖະບານໄທທີ່ຈະເພີ່ມອັດຕາຄ່າແຮງງານຕ່ຳຢູ່ໄທຈາກ 345 ບາດເປັນ 400 ບາດຕໍ່ວັນແຕ່ວັນທີ 1 ຕຸລາ 2024 ເປັນຕົ້ນໄປ. ດ້ວຍເຫດຜົນວ່າ ການຂຶ້ນອັດຕາຄ່າຈ້າງຂັ້ນຕ່ຳຈະສົ່ງຜົນກະທົບຢ່າງໜັກໜ່ວງຕໍ່ຜູ້ປະກອບການ SME ໃນໄທ. ເນື່ອງຈາກວ່າມັນຈະເພີ່ມຄ່າໃຊ້ຈ່າຍໃນການຜະລິດຜະລິດຕະພັນ. ພ້ອມກັນນັ້ນ, ລາຍຮັບຂອງຜູ້ປະກອບການ SME ຍັງບໍ່ທັນເພີ່ມຂຶ້ນເລີຍ. ຜົນໄດ້ຮັບແມ່ນຕ້ອງປະເຊີນໜ້າກັບສະພາບການສູນເສຍ ແລະ ໃນທີ່ສຸດແມ່ນຕ້ອງຍຸດກິດຈະການ.