ທາງການລາວ ຈະແກ້ໄຂລັດຖະທຳມະນູນການປົກຄອງທັງສະບັບໃຫ້ສຳເລັດ ໃນປີ 2025, ພາຍໃຕ້ເປົ້າໝາຍເພື່ອຮັບປະກັນ ແລະເສີມສ້າງສະຖຽນລະພາບທາງການເມືອງຂອງພັກໃຫ້ແຂງແກ່ນ.
Your browser doesn’t support HTML5
ທາງການລາວ ຈະແກ້ໄຂລັດຖະທຳມະນູນ ການປົກຄອງທັງສະບັບ ໃຫ້ສຳເລັດ ໃນປີ 2025
ສະມາຊິກສະພາແຫ່ງຊາດລາວເປີດເຜີຍວ່າ ຄະນະປະທານສະພາແຫ່ງຊາດລາວ ໄດ້ມອບໝາຍໃຫ້ຄະນະກໍາມາທິການກົດໝາຍ ເປັນພາກສ່ວນຮັບຜິດຊອບໃນການສືກສາ ຄົ້ນຄວ້າ ແລະ ປະສານງານໃນການແກ້ໄຂລັດຖະທຳມະນູນການປົກຄອງໃຫ້ສຳເລັດທຸກສະບັບ ເພື່ອຍື່ນສະເໜີໃຫ້ສະພາແຫ່ງຊາດຮັບຮອງເອົາ ແລະປະກາດໃຊ້ຢ່າງເປັນທາງການໃຫ້ໄດ້ພາຍໃນປີ 2025 ໂດຍມີເປົ້າໝາຍທີ່ສໍາຄັນເພື່ອເປັນການຮັບປະກັນ ແລະເສີມສ້າງສະຖຽນລະພາບທາງການເມືອງຂອງຊາດ ພາຍໃຕ້ການນຳພາອັນເຂັ້ມແຂງຂອງພັກປະຊາຊົນປະຕິວັດລາວຕໍ່ໄປຢ່າງຍາວນານ ແລະ ສອດຄ່ອງກັບສະພາບຕົວຈິງໃນປັດຈຸບັນ ແລະອະນາຄົດ. ດັ່ງທີ່ສະມາຊິກ ສະພາແຫ່ງຊາດລາວໃຫ້ການຢືນຢັນວ່າ:
“ເວລາທີ່ກຳນົດລັດຖະທຳມະນູນປີ 2015 ຫັ່ນ ແມ່ນຢູ່ໃນໄລຍະຂອງການຈັດຕັ້ງປະຕິບັດແນວທາງປ່ຽນແປງໃໝ່ຂອງພັກໃນໄລຍະນັ້ນ. ເຊິ່ງມາຮອດປັດຈຸບັນນີ້ເຫັນວ່າ ຄວາມຮຽກຮ້ອງຕ້ອງການໜ້າທີ່ການເມືອງຂອງປະເທດພວກເຮົາ ໄດ້ສູງຂື້ນກວ່າເກ່າ ເປັນຕົ້ນແມ່ນການພັດທະນາເສດຖະກິດ ແລະສັງຄົມ ໃນຍຸກການເຊື່ອມໂຍງ ຍຸກ 4.0 ເຊິ່ງເປັນຍຸກທີ່ພວກເຮົາຕ້ອງຍົກສູງລະດັບການພັດທະນາທາງເສດຖະກິດ-ສັງຄົມໃຫ້ສູງຂື້ນ. ອັນນີ້ ແມ່ນບັນຫາສຳຄັນ.”
ທັ້ງນີ້ ໂດຍເນື້ອໃນສຳຄັນທີ່ຈະຖືກບັນຫຍັດເຂົ້າໃນລັດຖະທຳມະນູນສະບັບໃຫມ່ຂອງລາວນີ້ ຍັງຈະລວມບັນດາຂໍ້ກຳນົດກ່ຽວກັບເປົ້າໝາຍຂອງການພັດທະນາປະເທດໃນໄລຍະໃໝ່. ການພັດທະນາລະບົບເສດຖະກິດທີ່ເປັນເຈົ້າຕົນເອງ ແລະ ປະຕິຮູບໂຄງສ້າງອຳນາດທາງການເມືອງຂອງພັກ-ລັດ ທີ່ຕອບສະໜອງໄດ້ເທົ່າທັນກັບສະພາບການ ທັ້ງພາຍໃນ ແລະຕ່າງປະເທດ, ດັ່ງທີ່ ທ່ານຈະເລິນ ເຢຍປາວເຮີ, ຮອງປະທານສະພາແຫ່ງຊາດ ຖະແຫຼງຍືນຍັນວ່າ:
“ການປັບປຸງລັດຖະທຳມະນູນແຫ່ງ ສປປ ລາວ ຄັ້ງນີ້ ແມ່ນແນໃສ່ ອັນທີ່ 1 ເພື່ອສືບຕໍ່ຜັນຂະຫຍາຍແນວທາງປ່ຽນແປງໃຫມ່ຢ່າງຮອບດ້ານ ມີຫຼັກການຂອງພັກ, ເປັນຕົ້ນ ແມ່ນມະຕິຂອງຄະນະບໍລິຫານງານສູນກາງພັກວ່າດ້ວຍການສ້າງເສດຖະກິດເອກກະລາດ ເປັນເຈົ້າຕົນເອງໃນໄລຍະໃຫມ່, ອັນທີ 2ການປັບປຸງບາງບົດບັນຍັດທີ່ກ່ຽວກັບລະບົບອຳນາດແຫ່ງລັດຂັ້ນຕ່າງໆ ໃຫ້ສອດຄ່ອງກັບໜ້າທີ່ການເມືອງຂອງພັກ ແລະລັດໃນໄລຍະໃໝ່, ອັນທີ 3 ລັດຖະທຳມະນູນສະບັບໃໝ່ ຕ້ອງສອດຄ່ອງກັບເນື້ອໃນພື້ນຖານຂອງໂຄງການການເມືອງຂອງພັກເຮົາໃນໄລຍະຕໍ່ໜ້າ.”
ແຕ່ແນວໃດກໍ່ຕາມ, ບັນຫາສຳຄັນທີ່ສຸດທີ່ປະຊາຊົນລາວບັນດາເຜົ່າໄດ້ສະແດງຄວາມຮຽກຮ້ອງຕ້ອງການໃຫ້ດຳເນິນການແກ້ໄຂ ແລະປັບປຸງຢ່າງຮີບດ່ວນທີ່ສຸດໃນເວລານີ້ ແມ່ນການຕັດສິນຄະດີຕ່າງໆ ໂດຍຄະນະຜູ້ພິພາກສາສານ ແລະການປະຕິບັດໜ້າທີ່ຂອງພະນັກງານສານທຸກຂັ້ນໃນທົ່ວປະເທດໃຫ້ມີຄວາມໂປ່ງໃສ ແລະຍຸຕິທຳຢ່າງແທ້ຈິງ ເຊິ່ງມາດຕະການນຶ່ງທີ່ສາມາດປະຕິບັດໄດ້ທັນທີກໍ່ຄື ການກວດກາສາຍສຳພັນລະຫວ່າງຜູ້ພິພາກສາສານ ແລະພະນັກງານສານ ກັບຄູ່ຄວາມໃນຄະດີຕ່າງໆ, ລວມທັງການກວດກາຄໍາຮ້ອງຂອງຄູ່ຄວາມໃນຄະດີທີ່ກ່ຽວກັບການຄັດຄ້ານການແຕ່ງຕັ້ງຜູ້ພິພາກສາສານ ແລະພະນັກງານສານ ທີ່ຮັບຜິດຊອບໃນຄະດີຕ່າງໆດ້ວຍນັ້ນ ເພາະຖືວ່າ ເປັນມາດຕະການສຳຄັນເພື່ອປ້ອງກັນບໍ່ໃຫ້ມີການພົວພັນກັນໃນທຸກຄະດີ. ເຊິ່ງຍັງບໍ່ທັນໄດ້ປະຕິບັດຕົວຈິງເທື່ອ ຈຶ່ງເຮັດໃຫ້ປະຊາຊົນບໍ່ເຊື່ອໝັ້ນຕໍ່ລະບົບສານຍຸຕິທຳຂອງລາວນັ່ນເອງ.
ທັງນີ້ ປະຊາຊົນລາວໄດ້ພາກັນຕັ້ງຄຳຖາມຕໍ່ການປະຕິບັດໜ້າທີ່ຂອງຜູ້ພິພາກສາ ແລະເຈົ້າໜ້າທີ່ສານທຸກຂັ້ນເພິ່ມຂື້ນນັບມື້. ໂດຍສະເພາະ ແມ່ນຄວາມຄວາມສົງໃສກ່ຽວກັບການຕັດສິນ ແລະການດໍາເນີນຄະດີທີ່ບໍ່ໂປ່ງໃສ ແລະບໍ່ຍຸຕິທໍາ ລວມເຖິງການຈັດຕັ້ງປະຕິບັດຂະບວນການດ້ານຕຸລາການທີ່ບໍ່ມີປະສິດທິພາບ ແລະ ບໍ່ໄດ້ມາດຕະຖານສາກົນ, ສ່ວນພະນັກງານໄອຍະການ ກໍບໍ່ມີຄຸນນະພາບ ແລະປະຕິບັດໜ້າທີ່ບໍ່ໂປ່ງໃສ. ໂດຍເຫັນໄດ້ຈາກການທີ່ສາມາດບັງຄັບຄະດີຕາມການຕັດສິນຂອງສານໄດ້ພຽງ 5,47 ເປີເຊັນ ຂອງຄະດີອາຍາຈຳນວນທັງໝົດ 39,484 ຄະດີ, ແລະ 11,8 ເປີເຊັນ ຂອງຄະດີແພ່ງຈຳນວນທັງໝົດ 11,405 ຄະດີ ໃນໄລຍະ 1 ປີທີ່ຜ່ານມານີ້.