ປະເທດ Kyrgyztan ຈັດການລົງປະຊາມະຕິ ກ່ຽວກັບລັດຖະທຳມະ ນູນຂຶ້ນໃນວັນອາທິດນີ້ ທ່າມກາງຄວາມຢ້ານກົວວ່າ ການລົງປະຊາມະ ຕິໃນມື້ນີ້ ອາດສາມາດກໍ່ໃຫ້ເກີດການປະທະກັນອີກເທື່ອໃໝ່ລະຫວ່າງ ພວກຊົນເຜົ່າ Kyrgyz ກັບຊົນເຜົ່າ Uzbek ກໍໄດ້ ໃນພາກໃຕ້ຂອງປະເທດ.
ຜູ້ນຳຊົ່ວຄາວຂອງ Kyrgyztan ທ່ານນາງ Roza Otunbayeva ທີ່ຂຶ້ນກຳອຳນາດລຸນຫລັງການລຸກຮືຂຶ້ນຂອງມະຫາຊົນ ເມື່ອວັນທີ 7 ເມສາຜ່ານມາ ທີ່ໄດ້ໂຄ່ນລົ້ມປະທານາທິບໍດີ Kurmanbek Bakiyev ແລະສົ່ງຜົນໃຫ້ມີຜູ້ເສຍຊີວິດໄປ 85 ຄົນນັ້ນ ໄດ້ປະຕິເສດທີ່ຈະເລື່ອນການລົງປະຊາມະຕິອອກໄປ.
ມີການຮັກສາຄວາມປອດໄພຢ່າງເຄ່ງຄັດໃນທົ່ວນະຄອນຫລວງ Bishkek ແລະໃນເມືອງ Osh ກັບ Jalalabad ທາງພາກໃຕ້ຂອງປະເທດ ບ່ອນທີ່ໄດ້ເກີດຄວາມຮຸນແຮງລະຫວ່າງຊົນເຜົ່າຂຶ້ນ ເມື່ອວັນທີ 10 ເດືອນມີຖຸນານີ້ ຍັງຜົນໃຫ້ມີຄົນຕາຍຢ່າງນ້ອຍ 275 ຄົນ. ເຈົ້າ ໜ້າທີ່ບາງຄົນໄດ້ໃຫ້ໂຕເລກຄົນຕາຍວ່າ ມີຫລາຍຮອດ 2,000 ຄົນ.
ປະຊາຊົນຈຳນວນຫລາຍໃນພາກໃຕ້ຍັງຈົ່ງຮັກພັກດີ ຕໍ່ທ່ານ Bakiyev ປະທານາທິບໍດີທີ່ຖືກໂຄ່ນລົ້ມ ຊຶ່ງເວລານີ້ດຳລົງຊີວິດຢູ່ໃນປະເທດ Belarus.
ການລົງປະຊາມະຕິໃນມື້ນີ້ ຊຶ່ງໄດ້ຮັບການສະໜັບສະໜູນຈາກສະຫະ ລັດແລະຣັດເຊຍ ແມ່ນມີເປົ້າໝາຍເພື່ອຫລຸດຜ່ອນອຳນາດຂອງປະທານາທິບໍດີລົງ ແລະມອບອຳນາດໃຫ້ແກ່ສະພາ ທີ່ໄດ້ຖືກເລືອກຕັ້ງເອົາແບບປະຊາທິປະໃຕນັ້ນ ຫລາຍຂຶ້ນ.
ຄາດກັນວ່າຈະຮູ້ຜົນການລົງປະຊາມະຕິ ໃນວັນຈັນມື້ອື່ນນີ້.