ທ້າວ ຈິນ (Jin), ສະມາຊິກທີ່ມີອາຍຸຫຼາຍທີ່ສຸດຂອງວົງ K-pop BTS ຍອດນິຍົມ, ໄດ້ຮັບການປົດປະຈຳການຈາກກອງທັບຂອງເກົາຫຼີໃຕ້ໃນວັນພຸດມື້ນີ້ ລຸນຫລັງປະຕິບັດຫນ້າທີ່ມາເປັນເວລາ 18 ເດືອນ, ໂດຍເປັນສະມາຊິກຄົນທໍາອິດຂອງກຸ່ມ ທີ່ສຳເລັດການຮັບໃຊ້ຊາດໃນພາກບັງຄັບ ອັນໄດ້ເຮັດໃຫ້ອາຊີບທາງດົນຕີຂອງພວກເຂົາເຈົ້າຕ້ອງຖືກໂຈະໄວ້, ອີງຕາມລາຍງານຂອງອົງການຂ່າວ Reuters.
ໃນຈໍໂທລະພາບ ສະແດງໃຫ້ເຫັນ ທ້າວ ຈິນ ອາຍຸ 31 ປີ, ນຸ່ງຊຸດເຄື່ອງແບບ ແລະໝວກທະຫານເບີເຣສີດຳ, ສະແດງໃຫ້ເຫັນອາລົມທີ່ອ່ອນໄຫວ ໃນຂະນະທີ່ລາວກອດເພື່ອນຮ່ວມງານຂອງລາວຢູ່ຖານທັບໃນເມືອງ ຢອນຈຽນ (Yeoncheon), ແຂວງ ຈອງກີ (Gyeonggi).
“ຂ້ອຍຮ້ອງໄຫ້ອອກມາໃນລະຫວ່າງງານພິທີ,” ທ້າວ ຈິນ ກ່າວໃນເວລາຕໍ່ມາ ລະຫວ່າງການຖ່າຍທອດສົດ ເຊິ່ງມີຜູ້ເຂົ້າເບິ່ງຫຼາຍກວ່າ 3 ລ້ານວິວໃນເວັບໄຊທ໌ຂອງແຟນເພຈ Weverse.
ທ້າວ ຈິນ ກ່າວຕື່ມ ພ້ອມກັບສະແດງຄວາມຄິດເຖິງ ໄປເຖິງເພື່ອນຮ່ວມງານຂອງລາວຢູ່ທີ່ຖານທັບວ່າ “ແຕ່ມັນກໍມ່ວນຫຼາຍສໍາລັບເວລານຶ່ງປີ ແລະຫົກເດືອນ ທີ່ຜ່ານມາ. ມັນເປັນຄວາມຮູ້ສຶກໂລ່ງອົກໂລ່ງໃຈ ທີ່ຂ້ອຍໄດ້ພົບກັບຫຼາຍໆຄົນທີ່ວິເສດ.”
ຮຸ້ນຂອງ HYBE, ເຊິ່ງເປັນຕົ້ນສັງກັດ ຫຼື ຄ້າຍເພງຂອງ BTS, ເພີ້ມຂຶ້ນ 1.01 ເປີເຊັນ ລະຫວ່າງການຊື້ຂາຍໃນຕອນຕົ້ນ ຂະນະທີ່ດັດຊະນີມາດຕະຖານຂອງ KOSPI ເພີ້ມຂຶ້ນ 0.35 ເປີເຊັນ.
ສື່ມວນຊົນເກົາຫຼີໃຕ້ລາຍງານວ່າ ສະມາຊິກອີກຫຼາຍຄົນຂອງກຸ່ມ 7 ຄົນທີ່ກຳລັງຮັບໃຊ້ຢູ່ທີ່ກອງທັບໃນປັດຈຸບັນນີ້ ໄດ້ຍື່ນຂໍອະນຸຍາດອອກມາເພື່ອສະເຫຼີມສະຫຼອງໂອກາດດັ່ງກ່າວ.
ນຶ່ງໃນພວກເຂົ້າເລົ່ານັ້ນ ແມ່ນນັກແຣັບ ທ້າວ RM, ຜູ້ທີ່ທັກທາຍ ທ້າວ ຈິນ ດ້ວຍ saxophone ເພື່ອຫຼິ້ນເພງ “Danamite” ທີ່ມີຊື່ສຽງຂອງກຸ່ມ.