ມູນນິທິໃຈລາວ ຫລື Jai Lao Foundation ແມ່ນກຳ ເນີດຂຶ້ນມາຈາກແນວຄິດຂອງສອງນ້ອງເອື້ອຍເຊື້ອສາຍລາວ ສັນຊາດອາເມຣິກັນ ສຸກິດຕະ ຫລືຫລ້າ Reagan ກັບ Noelle ສິງຫາຣາດ ທີ່ດຳລົງຊີວິດຢູ່ເຂດເມືອງ San Ramon ລັດແຄລິຟໍເນຍ. ທັງສອງໄດ້ກັບເມືອ ຢາມບ້ານເກີດເມືອງນອນ ທີ່ບ້ານປາກສະພານ ແຂວງສາລະວັນ ຫລັງຈາກບິດາມານດາທີ່ພາລູກໆອົບພະຍົບມາຢູ່ອາເມລິກາ ແຕ່ຊຸມປີ 1980 ນັ້ນ ໄດ້ເສຍຊີວິດໄປແລ້ວ. ໃນການກັບເມືອຢາມບ້ານເພື່ອເຮັດ ບຸນຫາບິດາມານດານີ້ເອງ ໂນແອລກັບຫລ້າ ຈຶ່ງໄດ້ຮູ້ວ່າພວກເພິ່ນໄດ້ກະທຳຄວາມດີໄວ້ຢ່າງຫລວງຫລາຍ ໃນແຕ່ລະປີທີ່ພວກເພີ່ນກັບຄືນ ປະເທດລາວ ໂດຍໄດ້ຊ່ວຍສ້າງສາພັດທະນາບ້ານປາກສະພານ ດ້ວຍການຊ່ອມແປງໂຮງຮຽນແລະວັດວາອາຮາມ ຕະຫລອດທັງຂຸດໜອງລ້ຽງປາໃຫ້ຊາວບ້ານໄດ້ມີບ່ອນໄປຕຶກປາມາລ້ຽງຊີບ ຊຶ່ງຄຸນຄວາມດີຂອງມື້ລາງທ່ານເຄື່ອງຄຳແລະຍານາງໄກສອນ ສິງຫາຣາດນີ້ ໄດ້ເຮັດໃຫ້ຊາວບ້ານປາກສະພານ ເຜື່ອແຜ່ຄວາມຮັກຫອມແລະຮູ້ບຸນຄຸນຂອງເຂົາເຈົ້າ ມາຮອດຫລ້າແລະໂນແອລ ໂດຍໃຫ້ການຕ້ອນຮັບສອງເອື້ອຍນ້ອງແລະຄອບຄົວຢ່າງອົບອຸ່ນ.
ມູນນິທິໃຈລາວ ຊື້ເຄື່ອງໄປມອບໃຫ້ຊາວບ້ານ
ໄມຕີຈິດມິດຕະພາບ ແລະການຕ້ອນຮັບຢ່າງອົບອຸ່ນ ຕະຫລອດທັງສະພາບການເປັນຢູ່ທີ່ທຸກບາກລຳບາກຫລາຍຂອງພວກຊາວບ້ານ ໄດ້ເຮັດໃຫ້ສອງເອື້ອຍນ້ອງຢາກຊ່ວຍເຫລືອພວກເຂົາເຈົ້າແລະສືບຕໍ່ຄຸນຄວາມ ດີທີ່ບິດາມານດາໄດ້ສ້າງໄວ້. ຫລັງຈາກໄດ້ໃຫ້ການຊ່ວຍເຫລືອຊາວບ້ານດ້ວຍເງິນຂອງຕົນເອງແລະປັດໃຈສົມທົບຈາກຍາດພີ່ນ້ອງແລະເພື່ອນມິດໄກ້ຊິດໃນເບື້ອງຕົ້ນ ເຊ່ນວ່າ ເຮັດເດິ່ນຫລີ້ນໃຫ້ໂຮງຮຽນປະຖົມປາກສະພານ ແລະສ້າງຫ້ອງນ້ຳໃຫ້ໂຮງຮຽນມັດທະຍົມແຫ່ງນື່ງແລ້ວ ໂນແອລກັບຫລ້າກໍເລີ່ມມີແຜນ ການຢາກຈະຂະຫຍາຍການຊ່ວຍເຫລືອ ໃຫ້ກ້ວາງອອກໄປອີກ ຈຶ່ງໄດ້ ພາກັນຈັດຕັ້ງມູນນິທິໃຈລາວຂຶ້ນມາໃນປີກາຍນີ້ ໂດຍໄດ້ກວນເອົາໝູ່ ເພື່ອນຈາກທົ່ວປະເທດສະຫະລັດ ເຂົ້າມາຮ່ວມນຳ ແລະພາກັນ ຈັດກິດຈະກຳຫາລາຍໄດ້ກັນຢ່າງຈິງຈັງ ເພື່ອເອົາເງິນໄປຊ່ວຍເຫລືອຊາວບ້ານ ປາກສະພານ ແລະໃນເຂດອື່ນໆ.
ມູນນິທິໃຈລາວ ຊຶ່ງເວລານີ້ເປັນອົງການຈັດຕັ້ງເພື່ອການກຸສົນຢ່າງສົມ ບູນ ໂດຍໄດ້ຮັບອະນຸມັດສະຖານະພາບ 501 ຊີ-3 ແລ້ວ ຊຶ່ງໝາຍຄວາມວ່າຜູ້ບໍລິຈາກເງິນແກ່ມູນນິທິສາມາດຫັກພາສີໄດ້ນັ້ນ ແມ່ນເປັນ ການຈັດຕັ້ງຂອງແມ່ຍິງອາເມລິກັນເຊື້ອສາຍລາວກຸ່ມນຶ່ງ ທີ່ມີຄວາມ ປາດຖະໜາອັນແຮງກ້າ ຢາກຈະຊ່ວຍເຫລືອຄົນລາວຜູ້ທຸກຍາກ. ມູນນິທິໃຈລາວມີຄະນະບໍລິຫານ 8 ຄົນດ້ວຍກັນ ໂຮມທັງ ຫລ້າແລະໂນແອລນຳ. ໃນນັ້ນ ສອງຄົນ ຄື ບຣີແອນນາ ຫລືຈິດ ພົນທອງ ຈາກເມືອງ High Point ລັດ North Carolina ທາງພາກຕາເວັນອອກ ຂອງສະຫະລັດ ກັບສຸລິນ ນໍຣະວົງ ຈາກເມືອງ Puyallup ລັດ Washington ທາງພາກຕາເວັນຕົກສ່ຽງເໜືອ ໄດ້ໃຫ້ສຳພາດກັບວີໂອເອ ທາງໂທລະສັບ ກ່ຽວກັບຜົນງານຂອງໃຈລາວໃນປີຜ່ານມາ ແລະໂຄງການໃນຂັ້ນຕໍ່ໄປ. ແຕ່ກ່ອນອື່ນ ທັງສອງສາວໄດ້ເວົ້າສູ່ຟັງວ່າເປັນ ຫຍັງພວກຕົນຈຶ່ງໄດ້ເຂົ້າມາພົວພັນກັບມູນນິທິໃຈລາວ ຊຶ່ງຈິດ ພົນທອງເວົ້າວ່າ ສຳລັບນາງນັ້ນແມ່ນເພື່ອຢາກສົ່ງເສີມແລະຮັກສາໄວ້ຊຶ່ງວັດທະ ນະທຳປະເພນີຂອງລາວ ແລະຢາກຊ່ວຍເຫລືອປະຊາຊົນຜູ້ທຸກຍາກຢູ່ໃນເຂດຊົນນະບົດຂອງລາວ ທີ່ນາງໄດ້ໄປພົບໄປເຫັນມາດ້ວຍຕາ ໃນຕອນກັບຄືນເມືອຢາມບ້ານ. ຈິດເວົ້າວ່າ ໃນເມື່ອຄົນຊາດອື່ນ ຍັງຊ່ວຍກັນໄດ້ ເປັນຫຍັງຄົນລາວຈຶ່ງຈະເຮັດບໍ່ໄດ້? ສຳລັບສຸລິນເອງກໍຄືກັນ ຄວາມລຳບາກຍາກແຄ້ນຂອງປະຊາຊົນ ໃນເຂດສອກຫລີກຫ່າງໄກ ເຮັດໃຫ້ນາງອີດູຕົນ ປະກອບກັບເລື່ອງລາວທີ່ນາງໄດ້ຍິນມາກ່ຽວກັບ ສະພາບຄອບຄົວທີ່ທຸກຍາກຂອງບິດາແລະສາມີຂອງນາງ ໃນສະໄໝທີ່ຍັງຮຽນໜັງສືຢູ່ປະເທດລາວ ຈື່ງເຮັດນາງຢາກໄປຊ່ວຍເຫລືອປະຊາຊົນ ລາວ. ສຸລິນກັບຈິດ ຈຶ່ງໄດ້ເຂົ້າຮ່ວມກັບໂນແອລແລະສຸກິດຕະ ຊື່ງເປັນໝູ່ກັນຢູ່ແລ້ວນັ້ນ ກໍ່ຕັ້ງມູນນິທິໃຈລາວຂຶ້ນມາ.
ໃຈລາວ ກັບຊາວບ້ານ ທີ່ໄປຊ່ວຍເຫລືອ
ເມື່ອກາງເດືອນພະຈິກ ຫາເດືອນທັນວາ ປີກາຍນີ້ ຄະນະບໍລິຫານໃຈລາວໄດ້ພາກັນເດີນທາງໄປປະເທດລາວ ພ້ອມກັບເສື້ອຜ້າທັງເກົ່າແລະໃໝ່ 12 ຫີບ ໄປມອບໃຫ້ຊາວບ້ານທີ່ປະສົບກັບໄພພາຍຸໃຕ້ຝຸ່ນເກດສະ ໜາໃນເຂດແຂວງສາລະວັນ ພ້ອມກັບສັດລ້ຽງ ເຊ່ນເປັດໄກ່. ນອກນັ້ນ ທາງຄະນະຍັງໄດ້ເອົາປື້ມຮຽນ ເຈ້ຍສໍ ແລະເຄື່ອງຫລີ້ນກິລາ ໄປມອບໃຫ້ໂຮງຮຽນປະຖົມບ້ານປາກສະພານ. ຫລັງຈາກນັ້ນ ຄະນະໃຈລາວກໍ ໄດ້ເດີຍທາງຂຶ້ນເໜືອ ໄປຍັງແຂວງຫລວງພະບາງ ແລະຊື້ຜ້າຫົ່ມ ຈຳນວນ 500 ຜືນ ໄປມອບໃຫ້ປະຊາຊົນໃນໝູ່ບ້ານຫລາຍແຫ່ງ.
ສຳລັບປີ 2010 ນີ້ ຄະນະໃຈລາວມີແຜນການຈະເດີນທາງໄປຮ່ວມໃນ ພິທີວາງສິລາເລີກ ສຳລັບກໍ່ສ້າງໂຮງຮຽນປະຖົມແຫ່ງນຶ່ງທີ່ທາງມູນນິທິ ຈະຊ່ວຍສ້າງຂຶ້ນໃນເມືອງສາລະວັນ ແລະພ້ອມດຽວກັນ ກໍຈະນຳເງິນຈຳນວນຫ້າພັນດອລລ່າໄປມອບໃຫ້ອຳນາດປົກຄອງບ້ານປາກສະພານ ຊຶ່ງເປັນເງິນທີ່ທາງມູນນິທິໄດ້ໃຫ້ຄຳໝັ້ນສັນຍາໄວ້ວ່າ ຈະຊ່ວຍສົມທົບເຂົ້າໃນການສ້າງໂຮງຮຽນປະຖົມຫລັງນຶ່ງ.
ສຳລັບແຜນການໄລຍະຍາວ ໃຈລາວຍັງມີຄວາມໝາຍໝັ້ນທີ່ຈະສ້າງໂຮງຮຽນມັດທະຍົມຫລັງນຶ່ງໃຫ້ແຂວງສາລະວັນ ໄກ້ໆກັບບ້ານປາກສະພານ ຕາມທີ່ສຸກິດຕະກັບໂນແອລໄດ້ຕັ້ງເປົ້າໝາຍໄວ້ໃນເບື້ອງຕົ້ນ ຊຶ່ງກະປະມານວ່າຈະຕ້ອງການເງິນທຶນ ປະມານ 25 ພັນດອລລ່າ.
ເພື່ອຫາເງິນລາຍໄດ້ ມາໄວ້ເປັນທຶນນັ້ນ ມູນນິທີໃຈລາວມີແຜນການ ຈະຈັດງານ Lao Night ຄັງທີສອງຂຶ້ນ ໃນວັນທີ 12 ເດືອນມີຖຸນາຈະມານີ້ ທີ່ຫໍປະຊຸມ San Ramon Convention Center ເມືອງຣາໂມນ ລັດແຄລິຟໍເນຍ ຊຶ່ງຈະມີການສະແດງສິນປະວັດທະນະທຳລາວ ເປັນຕົ້ນການຟ້ອນນາດຕະສິນ ສະແດງ Fashion Show ສະແດງຂວັດໝາກໄມ້ ພ້ອມທັງອາຫານການກິນລາວ ແລະການລື້ນເລີງຕ່າງໆ.
ທາງໃຈລາວຂໍຮຽກຮ້ອງທ່ານທີ່ມີໃຈບຸນສຸນທານ ຢາກຊ່ວຍເຫລືອປະຊາຊົນລາວດ້ວຍກັນ ຈົ່ງໄປຮ່ວມສະໜັບສະໜູນໃນງານນີ້ດ້ວຍ. ແລະທ່ານຜູ້ໃດຢາກຮຽນຮູ້ກ່ຽວກັບໃຈລາວເພິ່ມຕື່ມ ຫລືບໍລິຈາກເງິນ ເຊີນເຂົ້າໄປເບິ່ງເວບໄຊ້ທ໌ຂອງໃຈລາວ ທີ່ jailao.org