ທ່ານພັນ ຄີມູນ ເລຂາທິການໃຫຍ່ອົງການສະຫະປະຊາ
ຊາດໄດ້ປະຕິເສດ ຕໍ່ຄໍາຮຽກຮ້ອງຂອງຜູ້ນໍາທີ່ມີບັນຫາ
ຂອງໄອວໍຣີ ໂຄສ ທ່ານ Laurent Gbagbo ທີ່ທວງໃຫ້
ກໍາລັງຮັກສາສັນຕິພາບຂອງສະຫະປະຊາຊາດ ຖອນອອກ ໄປຈາກ Ivory Coast.
ທ່ານ ພັນຄີມູນ ກ່າວໃນຖະແຫລງການສະບັບນຶ່ງວ່າ
ພາລະກິດຂອງອົງການສະຫະປະຊາຊາດ ແມ່ນຈະຕ້ອງ
ເຮັດໃຫ້ສໍາເລັດ ພາລະໜ້າທີ່ທີ່ໄດ້ຮັບມອບໝາຍມາແລະ
ສືບຕໍ່ຕິດຕາມເບິ່ງແລະບັນທຶກ ການຝ່າຝືນສິດທິມະນຸດ
ຕ່າງໆ ການຍຸຍົງໃຫ້ມີຄວາມກຽດຊັງກັນ ແລະການກໍ່ຄວາມຮຸນແຮງ ຫລືການໂຈມຕີຕໍ່
ກໍາລັງຮັກສາສັນຕິພາບຂອງອົງການສະຫະປະຊາຊາດນັ້ນ.
ໃນວັນເສົາວານນີ້ ທ່ານ Gbagbo ໄດ້ສັ່ງໃຫ້ກໍາລັງຮັກສາສັນຕິພາບຕ່າງປະເທດ ອອກໄປຈາກປະເທດທີ່ຕັ້ງຢູ່ໃນພາກຕາເວັນຕົກຂອງອາຟຣິການັ້ນ ໂດຍກ່າວຫາ ເຂົາເຈົ້າວ່າ ໃຫ້ການໜຸນຫລັງພວກຕໍ່ສູ້ທີ່ສະໜັບສະໜຸນທ່ານ Alassane Ouattara ທີ່ເປັນຄູ່ແຂ່ງ ຂອງທ່ານ.
ທ່ານ Ouattara ຖືກຮັບຮູ້ໂດຍພວກກຸ່ມຈັດຕັ້ງນາໆຊາດ ວ່າເປັນຜູ້ໄດ້ຮັບໄຊຊະນະໃນ ການເລືອກຕັ້ງປະທານາທິບໍດີ ໃນເດືອນຜ່ານມາ ແຕ່ທ່ານ Gbagbo ບໍ່ຍອມລົງຈາກ ຕໍາແໜ່ງ.