ເຈົ້າຂອງກໍາປັ່ນໂດຍສານ Costa Concordia ຂອງອີຕາລີ ທີ່ແລ່ນໄປຕໍາ ແລະຄາ
ໂຫງ່ນຫິນໃນວັນສຸກຜ່ານມາ ສົ່ງຜົນໃຫ້ພວກຄົນໂດຍສານເສຍຊີວິດໄປແລ້ວຢ່າງໜ້ອຍ
6 ຄົນນັ້ນ ກ່າວວ່າ ກັບຕັນກໍາປັ່ນໄດ້ທໍາການຕັດສິນໃຈຢ່າງຜິດພາດຫລາຍຢ່າງ.
ບໍລິສັດເດີນເຮືອ Crosta Crociere ກ່າວໃນວັນອາທິດວານນີ້ວ່າ ກັບຕັນໄດ້ນໍາເຮືອ
ເຂົ້າໄປໃກ້ຝັ່ງໂພດ ແລະໃນລະຫວ່າງເກີດເຫດສຸກເສີນນັ້ນໄດ້ທໍາການຕັດສິນໃຈທີ່ບໍ່
ໄດ້ປະຕິບັດຕາມຂັ້ນຕອນຂອງລະບຽບການຂອງບໍລິສັດ ທີ່ວາງໄວ້ຕາມມາດຕະຖານ
ສາກົນນັ້ນ. ບໍລິສັດບໍ່ໄດ້ບອກໃຫ້ຮູ້ຢ່າງເຈະຈົງກ່ຽວກັບບາດກ້າວຕ່າງໆທີ່ກັບຕັນ
Francesco Schettino ບໍ່ໄດ້ປະຕິບັດຕາມນັ້ນ.
ເວລານີ້ ກັບຕັນຄົນນີ້ກໍາລັງຖືກຂັງຢູໃນຄຸກ ປະເຊີນກັບຂໍ້ຫາຖານທໍາການຄາດຕະກໍາ
ຍ້ອນໄດ້ແລ່ນເຮືອນອກເສ້ນທາງເດີນ ແລະປະລະເຮືອ ໃນຂະນະທີ່ພວກໂດຍສານພາ
ກັນດິ້ນຮົນເພື່ອຊອກຫາບ່ອນປອດໄພຢູ່ນັ້ນ.
ບັນດາເຈົ້າໜ້າທີ່ສອບສວນສືບສວນ ໄດ້ເລີ້ມທໍາການວິໄຈເບິ່ງເຄື່ອງອັດສຽງຂໍ້ມູນຂອງ
ເຮືອໂດຍສານລໍານີ້ແລ້ວ ຊຶ່ງເຄື່ອງອັດສຽງນີ້ໄດ້ບັນທຶກສຽງ ແລະຂໍ້ມູນຕ່າງໆກ່ຽວກັບ
ການເຄື່ອນໄຫວຂອງເຮືອກ່ອນເກີດອຸບັດເຫດນັ້ນ.
ສົບຂອງຜູ້ເສຍຊີວິດຄົນທີ 6 ໄດ້ຖືກພົບເຫັນໃນຕອນເຊົ້າໆວັນຈັນມື້ນີ້ ຊຶ່ງບັດນີ້ເຮັດໃຫ້
ມີຢ່າງໜ້ອຍ 14 ຄົນ ຍັງຫາຍສາບສູນຢູ່ ທີ່ຮວມທັງພວກລູກເຮືອຫລາຍຄົນນໍາ.
ມີຄົນໂດຍສານພ້ອມດ້ວຍລູກເຮືອທັງໝົດຈໍານວນຫລາຍກວ່າ 4 ພັນ ຄົນຢູ່ໃນເຮືອໂດຍ
ສານທ່ອງທ່ຽວລໍານີ້ ເວລາແລ່ນໄປຕໍາແລະຄາໂຫງ່ນຫິນ ໃນຕອນແລງວັນສຸກຜ່ານມາ
ຢູ່ນອກຝັ່ງທະເລໃນພາກເໜືອຂອງອີຕາລີແລ້ວຫງ່ຽງຫລົ້ມລົງ ຍ້ອນນໍ້າໄຫລເຂົ້າເຮືອ
ທາງຮູໃຫຍ່ ບ່ອນທີ່ໄປຕໍາເອົາໂຫງ່ນຫິນນັ້ນ. ພວກທີ່ລອດຊີວິດບັນລະຍາຍເຖິງເຫດການ
ທີ່ວຸ້ນວາຍແລະໜ້າຢ້ານກົວ ຊຶ່ງບາງຄົນກ່າວວ່າ ບໍ່ມີການຈັດຕັ້ງໃດໆເລີຍ.
ໃນຂະນະດຽວກັນ ມີຫລາຍຄົນພາກັນໂຕນອອກຈາກເຮືອລົງໃສ່ນໍ້າທະເລ ທີ່ເຢັນເປັນນໍ້າ
ກ້ອນ ແລະລອຍເຂົ້າຫາຝັ່ງ.