ກອງທັບອິສຣາແອລ ກ່າວໃນວັນພະຫັດມື້ນີ້ວ່າ ຕົນໄດ້ທໍາການໂຈມຕີທາງພາກ ພື້ນດິນໃນເຂດກາຊາ ບ່ອນທີ່ກອງກຳລັງອິສຣາແອລ ໄດ້ທໍາການໂຈມຕີທາງອາ ກາດທີ່ແນເປົ້າໃສ່ພວກຫົວຮຸນແຮງຮາມາສ ເປັນເວລາເກືອບ 3 ອາທິດແລ້ວ.
ກອງກຳລັງປ້ອງກັນປະເທດອິສຣາແອລ ຫຼື IDF ກ່າວວ່າລົດຖັງ ແລະທະຫານລາບຂອງຕົນ “ໄດ້ໂຈມຕີບັນດາໜ່ວຍກໍ່ການຮ້າຍ, ພື້ນຖານໂຄງລ່າງ ແລະ ຖານຍິງລູກສອນໄຟຕ້ານລົດຖັງຈຳນວນຫຼາຍ” ກ່ອນທີ່ຈະເດີນທາງກັບຄືນໄປຍັງດິນແດນ ອິສຣາແອລ.
IDF ກ່າວວ່າ ການປະຕິບັດການດັ່ງກ່າວແມ່ນເພື່ອກະກຽມ "ສຳລັບການສູ້ລົບໃນໄລຍະຕໍ່ໄປ."
ບັນດາເຈົ້າໜ້າທີ່ອິສຣາແອລ ໄດ້ໃຫ້ຄຳໝັ້ນສັນຍາວ່າຈະຮັບປະກັນໃຫ້ກຸ່ມ ຮາມາສ ບໍ່ສາມາດທຳການໂຈມຕີທີ່ເປັນໄພຂົ່ມຂູ່ຕໍ່ອິສຣາແອລ ໄດ້ອີກຕໍ່ໄປ ຫລັງຈາກການໂຈມຕີໃນວັນທີ 7 ຕຸລາ ຂອງກຸ່ມຫົວຮຸນແຮງ ທີ່ໄດ້ສັງຫານປະມານ 1,400 ຄົນ.
ກອງທັບອິສຣາແອລໄດ້ຮຽກຕົວທະຫານກອງໜຸນ 300,000 ຄົນ ແລະຕັ້ງກອງທະຫານຢູ່ໃກ້ຊາຍແດນເຂດກາຊາ ກ່ອນການໂຈມຕີທາງພາກພື້ນທີ່ຄາດການໄວ້.
ນາຍົກລັດຖະມົນຕີອິສຣາແອລ ທ່ານເບັນຈາມິນ ເນຕັນຢາຮູ ກ່າວໃນຖະແຫຼງ ການທາງໂທລະພາບໃນວັນພຸດວານນີ້ວ່າ ອິສຣາແອລກຳລັງ “ກະກຽມການ ບຸກໂຈມຕີທາງບົກ. ຂ້າພະເຈົ້າຈະບໍ່ລົງລາຍລະອຽດວ່າເມື່ອໃດ, ແນວໃດ ຫຼືຈັກຄັ້ງ.”
ປະທານາທິບໍດີສະຫະລັດ ທ່ານໂຈ ໄບເດັນ ສະແດງການສະໜັບສະໜຸນໃນວັນພຸດວານນີ້ ໃນສິ່ງທີ່ຕອນນີ້ເບິ່ງຄືວ່າ ເປັນເປົ້າໝາຍທີ່ຫ່າງໄກ - ເຊ່ິງກໍ່ຄື ຄວາມປາຖະໜາທີ່ສະຫະລັດ ໄດ້ສະແຫວງຫາມາເປັນເວລາດົນນານ ສຳລັບລັດອິສຣາແອລ ແລະ ປາແລັສໄຕນ໌ ທີ່ແຍກຈາກັນ ແລະເປັນເອກະລາດ.
ທ່ານໄບເດັນ ກ່າວໃນກອງປະຊຸມຖະແຫຼງຂ່າວຢູ່ທຳນຽບຂາວວ່າ “ຄວາມມຸ່ງມາດປາດຖະໜາຂອງຊາວ ປາແລັສໄຕນ໌ ບໍ່ສາມາດຖືກລະເລີຍ. ຊາວອິສຣາແອລ ແລະ ປາແລັສໄຕນ໌ ຢ່າງສະເໝີພາບກັນ ສົມຄວນທີ່ຈະຢູ່ຄຽງຂ້າງ ກັນຢ່າງປອດໄພ, ມີກຽດສັກສີ ແລະສັນຕິ.”