ອິສຣາແອລ ແລະ ກຸ່ມ ເຮັສບອລລາ ໄດ້ຍິງປືນໃສ່ກັນຂ້າມເຂດຊາຍແດນຄັ້ງໃໝ່, ໃນຂະນະທີ່ຄວາມຢ້ານກົວກ່ຽວກັບຄວາມຂັດແຍ້ງໃນພາກພື້ນຈະຂະຫຍາຍໂຕຂຶ້ນ ຫຼັງຈາກ ອິສຣາແອລ ໄດ້ເປີດເຜີຍແຜນການທີ່ໄດ້ຮັບອະນຸຍາດສຳລັບການໂຈມຕີ ເລບານອນ ແລະ ພວກຫົວຮຸນແຮງທີ່ໄດ້ຮັບການໜູນຫຼັງໂດຍ ອີຣ່ານ ໄດ້ລະດົມຍິງຈະຫຼວດໃສ່ສັດຕູຂອງພວກເຂົາ.
ກຸ່ມເຮັສບອລລາ ກ່າວວ່າ ພວກເຂົາໄດ້ຍິງຈະຫຼວດຫຼາຍສິບລູກເຂົ້າໄປບໍລິເວນພາກເໜືອຂອງ ອິສຣາແອລ ໃນວັນພະຫັດວານນີ້ ສໍາລັບການແກ້ແຄ້ນກ່ຽ%ກັບການໂຈມຕີທາງອາກາດທີ່ຮ້າຍແຮງໃນພາກໃຕ້ຂອງເລບານອນ ທີ່ອິສຣາແອລ ກ່າວວ່າ ສັງຫານຶ່ງໃນຜູ້ປະຕິບັດການຂອງກຸ່ມນັ້ນ. ກຸ່ມເຮັສບອລລາ ຍັງອ້າງວ່າ ໄດ້ທຳການໂຈມຕີອື່ນໆອີກຫຼາຍຄັ້ງໃສ່ກອງທະຫານ ອິສຣາແອລ ແລະ ຕຳແໜ່ງຂອງພວກເຂົາເຈົ້າຕະຫຼອດວັນດັ່ງກ່າວ.
ກອງທັບ ອິສຣາແອລ ກ່າວວ່າ ເຮືອບິນລົບຂອງພວກເຂົາເຈົ້າໄດ້ໂຈມຕີສາງເກັບອາວຸດສອງແຫ່ງ ແລະ ສະຖານທີ່ອື່ນໆຂອງກຸ່ມເຮັສບອລລາ, ແລະກ່າວວ່າ ພວກເຂົາເຈົ້າໄດ້ຍິງປືນໃຫຍ່ “ເພື່ອຂັບໄລ່ຕໍ່ໄພຂົ່ມຂູ່ໃນຫຼາຍຂົງເຂດຢູ່ບໍລິເວນພາກໃຕ້ຂອງ ເລບານອນ.”
ບໍ່ດົນກ່ອນເວລາທ່ຽງຄືນ, ກອງທັບບົກກ່າວວ່າ ພວກເຂົາເຈົ້າ “ໄດ້ສະກັດກັ້ນເປົ້າໝາຍຕ້ອງສົງໃສທາງອາກາດ ທີ່ຂ້າມມາຈາກ ເລບານອນ ຢ່າງປະສົບຄວາມສຳເລັດ.”
ໃນຕອນເຊົ້າວັນສຸກມື້ນີ້, ສື່ມວນຊົນ ເລບານອນ ໄດ້ລາຍງານການໂຈມຕີຄັ້ງໃໝ່ຂອງ ອິສຣາແອລ ໃນພາກໃຕ້ຂອງປະເທດ.
ບັນດາຜູ້ຊ່ຽວຊານແມ່ນບໍ່ເຫັນພ້ອມກັນກ່ຽວກັບໂອກາດຂອງສົງຄາມທີ່ກວ້າງຂວາງກວ່າເກົ່າ ໃນເກືອບ 9 ເດືອນຂອງການຕໍ່ສູ້ເພື່ອກຳຈັດກຸ່ມ ຮາມາສ ທີ່ເປັນພັນທະມິດຂອງກຸ່ມເຮັສບອລລາ, ເຊິ່ງແມ່ນກຸ່ມຫົວຮຸນແຮງ ປາແລັສໄຕນ ຢູ່ໃນຂົງເຂດກາຊາ.
ກຸ່ມເຮັສບອລລາ ແລະ ກອງກຳລັງ ອິສຣາແອລ ໄດ້ຍິງປືນໃສ່ກັນເກືອບທຸກມື້ນັບຕັ້ງແຕ່ການໂຈມຕີເມື່ອວັນທີ 7 ຕຸລາໂດຍກຸ່ມຮາມາສ ໃນບໍລິເວນພາກໃຕ້ຂອງ ອິສຣາແອລ ຈົນກໍ່ໃຫ້ເກີດສົງຄາມ ກາຊາ, ແລະ ການເຈລະຈາທີ່ດຸເດືອດໄດ້ຮຸນແຮງຂຶ້ນພ້ອມກັບການໂຈມຕີຕ່າງໆ.