ສະຫະລັດກຳລັງແນເປົ້າໝາຍໃສ່ຄະນະປະຕິບັດງານຂອງກຸ່ມກໍ່ການຮ້າຍລັດອິສລາມທີ່ຄິດກັນວ່າ ເປັນຜູ້ມີບົດບາດສຳຄັນ ໃນການໂຈມຕີກໍ່ການຮ້າຍທີ່ນະຄອນປາຣີແລະແບລ ຢ້ຽມ.
ກະຊວງການຕ່າງປະເທດສະຫະລັດ ໃນວັນອັງຄານວານນີ້ ໄດ້ທຳການລົງໂທດ ຕໍ່ທ້າວ Abdelilah Himich ຄົນຝຣັ່ງເຊື້ອສາຍໂມຣັອກໂກ ທີ່ເຊື່ອກັນວ່າມີຖານປະຕິບັດງານຢູ່ ຊີເຣຍ.
ທ້າວ Himich ຊຶ່ງຮູ້ກັນ ໃນອີກຊື່ນຶ່ງວ່າ Abu Sulayman al-Firansi ເປັນຜູ້ກໍ່ຕັ້ງກອງ ພັນ Tariq Ibn Ziyad ຊຶ່ງເປັນກອງກຳລັງ ທີ່ປະກອບດ້ວຍພວກນັກລົບຕ່າງປະເທດທີ່ມາຈາກຢູໂຣບຫຼາຍເຖິງ 300 ຄົນທີ່ທຳການເຄື່ອນໄຫວຢູ່ໃນອີຣັກ ຊີເຣຍແລະແຫ່ງອື່ນໆ.
ຕຳຫຼວດໃນຊຸດປາບຈະລາຈົນ ຢູ່ໃນພິທີ ໄວ້ອາໄລ ໃຫ້ພວກເຄາະຮ້າຍ ຢູ່ບຣັສເຊິລ
ນອກນັ້ນ ກະຊວງການຕ່າງປະເທດ ຍັງໄດ້ລະບຸວ່າ ທ້າວ Himich ເປັນບຸກຄົນສຳຄັນໃນການໂຈມຕີຂອງພວກກໍ່ການຮ້າຍຢູ່ນະຄອນປາຣີເມື່ອເດືອນພະຈິກປີ 2015 ທີ່ເຮັດໃຫ້ມີຜູ້ເສຍຊີວິດ 130 ຄົນ ພ້ອມທັງການວາງລະເບີດ ຢູ່ນະຄອນ Brussels ໃນເດືອນມີນາປີ 2016 ທີ່ເຮັດໃຫ້ 32 ຄົນເສຍຊີວິດໄປນັ້ນ.
ໃນເດືອນຕຸລາຜ່ານມານີ້ ເຈົ້າໜ້າທີ່ຈາກໜ່ວຍປາບປາມພວກກໍ່ການຮ້າຍຂອງສະຫະລັດ ໄດ້ກ່າວຕໍ່ອົງການຂ່າວ ProPublica ວ່າ ທ້າວ Himich ມີບົດບາດສຳຄັນໃນການໂຈມຕີເຫຼົ່ານັ້ນ.
ເຈົ້າໜ້າທີ່ຄົນນີ້ເວົ້າວ່າ “ພວກເຮົາເຊື່ອວ່າລາວແມ່ນບຸກຄົນສຳຄັນທີ່ພົວພັນໃນການໂຈມຕີຢູ່ປາຣີ ແລະ Brussels ລາວເປັນຜູ້ວາງແຜນ ດ້ານພື້ນຖານໂຄງລ່າງ.”
ພວກລັດອິສລາມຫຼາຍໆຄົນທີ່ໂຕນເຂົ້າມາສວາມີພັກຍັງໄດ້ລະບຸວ່າ ທ້າວ Himich ເປັນຫົວໜ້າໜ່ວຍປະຕິບັດງານຂອງກຸ່ມລັດອິສລາມໃນຢູໂຣບ.
ອີງຕາມ ໂຄງການຕໍ່ຕ້ານ ພວກກໍ່ການຮ້າຍ ທ້າວ Himich ເຄີຍເປັນທະຫານ Foreign Legion ຂອງຝຣັ່ງໃນປີ 2008 ແລະໄປຮັບໃຊ້ ຢູ່ໃນອັຟການິສຖານ ກ່ອນທີ່ຈະໂຕນໜີ ໃນເວລາສອງປີຕໍ່ມາ.
ນອກນັ້ນ ກະຊວງການຕ່າງປະເທດສະຫະລັດຍັງໄດ້ລົງໂທດເຈົ້າໜ້າທີ່ກຸ່ມລັດອິສລາມອີກ 2 ຄົນຄືທ້າວ Abdullah Ahmed al-Meshedani ແລະທ້າວ Basil Hassan.