ກຸ່ມລັດອິສລາມ ໄດ້ເປີດສາກ ບຸກໂຈມຕີຄັ້ງໃໝ່ ຕໍ່ເມືອງ Kobani
ເຊິ່ງເປັນເມືອງທີ່ຄຸ້ມຄອງໂດຍຊາວເຄີດ ຕັ້ງຢູ່ຕິດກັບຊາຍແດນ
ຊີເຣຍ ອັນເປັນນຶ່ງໃນສາມຈຸດທີ່ສຳຄັນ ທີ່ມີລາຍງານວ່າ ກຸ່ມລັດ
ອິສລາມໄດ້ ເປີດສາກໂຈມຕີ ໃນທົ່ວປະເທດ ໃນວັນພະຫັດມື້ນີ້.
ການໂຈມຕີດັ່ງກ່າວ ໄດ້ເລີ້ມຕົ້ນຂຶ້ນ ດ້ວຍການວາງລະເບີດ
ສະຫລະຊີບ ເມື່ອຕອນເຊົ້າວັນພະຫັດມື້ນີ້ ຢູ່ໃກ້ກັບດ່ານຂ້າມ
ຊາຍແດນຂອງເມືອງ Kobani ໄປຍັງປະເທດເທີກີ ອິງຕາມ
ອົງການສິ້ງຊອມສິດທິມະນຸດໃນຊີເຣຍ ທີ່ກ່າວວ່າ ຫຼາຍສິບຄົນ
ຖືກຂ້າຕາຍ ຫຼື ໄດ້ຮັບບາດເຈັບໃນການຕໍ່ສູ້ກັນ.
ແຜນທີ່ ສະແດງໃຫ້ເຫັນ ຈຸດທີ່ຕັ້ງຂອງເມືອງຕ່າງໆ ໃນຊີເຣຍ
ອົງການດັ່ງກ່າວ ທີ່ມີຫ້ອງການຕັ້ງຢູ່ປະເທດອັງກິດ ກ່າວໃນເວລາຕໍ່ມາ ວ່າ ພວກນັກຕໍ່ສູ້
ລັດອິສລາມ ໄດ້ສັງຫານ ພົນລະເຮືອນຊາວເຄີດຢ່າງນ້ອຍ 20 ຄົນ ລວມທັງພວກຜູ້ຍິງ
ແລະ ເດັກນ້ອຍ ຢູ່ໃນເມືອງ Barkh Butan ບໍ່ໄກປານໃດຈາກເມືອງ Kobani ໄປທາງ
ທິດໃຕ້.
ພວກນັກຕໍ່ສູ້ຊາວ ເຄີດ ທີ່ໄດ້ຮັບການສະໜັບສະໜຸນໂດຍການໂຈມຕີທາງອາກາດ ພາຍໃຕ້ ການນຳພາໂດຍສະຫະລັດ ໄດ້ເຂົ້າຍຶດເອົາເມືອງ Kobani ໃນເດືອນມັງກອນປີນີ້ ຫຼັງຈາກທີ່ໄດ້ປະທະກັບກອງກຳລັງລັດອິສລາມ ເປັນເວລາຫຼາຍໆເດືອນ. ມີການມອງ
ກັນວ່າ ມັນເປັນໄຊຊະ ນະທີ່ສຳຄັນ ແລະເປັນສັນຍາລັກ ໃນການຕໍ່ສູ້ຕ້ານພວກລັດອິສລາມ.
ລົດຄັນນຶ່ງແລ່ນຜ່ານເຂດທີ່ຖືກທຳລາຍ ໃນລະຫວ່າງ ການສູ້ລົບ ລະຫວ່າງ ກອງກຳລັງຊາວເຄີດ ທີ່ໜຸນຫຼັງໂດຍ ສະຫະລັດ ແລະ ພວກນັກຕໍ່ສູ້ລັດອິສລາມ ໃນເມືອງ Kobani ຢູ່ທາງທິເໜືອຂອງຊີເຣຍ, ວັນທີ 18 ເມສາ 2015.
ນອກນັ້ນ ໃນວັນພະຫັດມື້ນີ້ ອົງການສິ້ງຊອມສິດທິມະນຸດດັ່ງກ່າວ ຍັງໄດ້ ລາຍງານວ່າ
ກອງກຳລັງກຸ່ມລັດອິສລາມ ໄດ້ຍຶດເອົາ 2 ຄຸ້ມ ໃນເມືອງ Hasaka ຢູ່ທາງພາກຕາເວັນອອກ ສຽງເໜືອ ຈາກກອງກຳລັງລັດຖະບານ. ແຫຼ່ງຂ່າວກອງທັບຊີເຣຍ ໄດ້ປະຕິເສດຕໍ່ລາຍງານດັ່ງກ່າວ ແລະກ່າວວ່າ ກອງກຳລັງລັດຖະບານ ໄດ້ຂັບໄລ່ ການໂຈມຕີ
ຂອງພວກນັກຕໍ່ສູ້ສົງຄາມສັກສິດ ອິງຕາມອົງການຂ່າວ Reuters.
ໃນຂະນະດຽວກັນນັ້ນ ແນວໂຮມຂອງພວກກະບົດທີ່ເອີ້ນວ່າ ພັນທະມິດໃນເຂດພາກໃຕ້
ໄດ້ໂຈມຕີ ທີ່ໝັ້ນຂອງລັດຖະບານຫຼາຍໆແຫ່ງ ໃນວັນພະຫັດມື້ນີ້ ໃນເມືອງ Daraa ຢູ່ທາງ
ພາກໃຕ້ ໃນອັນທີ່ປາກົດວ່າ ເປັນການບຸກໂຈມຕີ ທີ່ໄດ້ມີການໃຫ້ຄຳໝັ້ນສັນຍາໄວ້ ເປັນ
ເວລາດົນນານມາແລ້ວ.