ຄະນະເຈລະຈາຂອງສະຫະລັດ ແລະອີຣ່ານ ມີກຳນົດທີ່ຈະສືບຕໍ່
ການເຈລະຈາຫາລືຮອບສຸດທ້າຍ ກ່ຽວກັບໂຄງການນິວເຄລຍ
ຂອງອີຣ່ານ ໃນວັນສຸກມື້ນີ້ ໃນຂະນະທີ່ເສັ້ນຕາຍທີ່ໄດ້ກຳນົດໄວ້
ຄືວັນທີ 31 ມີນາ ເພື່ອໃຫ້ບັນລຸຂອບຂອງຂໍ້ຕົກລົງນັ້ນ ແມ່ນຫຍັບ
ໃກ້ເຂົ້າມາຕື່ມອີກ.
ລັດຖະມົນຕີຕ່າງປະເທດສະຫະລັດ ທ່ານ John Kerry ໄດ້ພົບ
ປະກັບ ລັດຖະມົນຕີຕ່າງປະເທດອີຣ່ານ ທ່ານ Javad Zarif ຢູ່ທີ່
ເມືອງ Lausanne ປະເທດສະວິສເຊີແລນ ໃນວັນພະຫັດວານນີ້
ຊຶ່ງທັງສອງຝ່າຍໄດ້ສະແດງຄວາມຫວັງໄປໃນແງ່ດີ ທີ່ວ່າ ຂໍ້ຕົກລົງ
ນີ້ສາມາດບັນລຸກັນໄດ້.
ບັນດານັກການທູດອາວຸໂສ ຈາກອັນທີ່ເອີ້ນວ່າກຸ່ມປະເທດ P5+1 ທີ່ມີສ່ວນຮ່ວມ ໃນ
ການເຈລະຈານັ້ນ ແມ່ນຄາດກັນວ່າ ຈະເຂົ້າຮ່ວມ ກັບຄູ່ຕຳແຫນ່ງຝ່າຍອີຣ່ານ ແລະ
ສະຫະລັດໃນໄວໆນີ້ ຂະນະທີ່ການແກ້ໄຂທາງການທູດກຳລັງຂຸ້ນຂ້ຽວຂຶ້ນ ກ່ອນໜ້າ
ວັນເສັ້ນຕາຍມາເຖິງ.
ໃນວັນພະຫັດວານນີ້ ປະທານາທິບໍດີອີຣ່ານ ທ່ານ Hassan Rouhani ກ່າວວ່າ ທ່ານ
ໄດ້ສົ່ງຈົດໝາຍໄປໃຫ້ຜູ້ນຳ 6 ປະເທດມະ ຫາອຳນາດຂອງໂລກ “ໂດຍອະທິບາຍເຖິງ
ທ່າທີຂອງອີຣ່ານ ກ່ຽວກັບບັນຫາດ້ານຂອງນິວເຄລຍ ແລະ ການເຄື່ອນໄຫວ
ຫຼ້າສຸດຕ່າງໆ” ທີ່ເກີດຂຶ້ນໃນການເຈລະຈາກັນນັ້ນ. ບັນດາເຈົ້າໜ້າທີ່ສະຫະລັດ ໃຫ້
ການຢືນຢັນວ່າ ໄດ້ຮັບຈົດໝາຍດັ່ງກ່າວ ແຕ່ບໍ່ໄດ້ເປີດເຜີຍ ເນື້ອໄນຂອງຈົດໝາຍນັ້ນ
ໃຫ້ຊາບ.
ທ່ານ Rouhani ຍັງໄດ້ກ່າວຖະແຫລງຜ່ານທາງ Twitter ວ່າ ທ່ານໄດ້ໂອ້ລົມກັບຜູ້ນຳ
ຂອງຈີນ ຣັດເຊຍ ຝຣັ່ງ ແລະ ອັງກິດ ໂດຍກ່າວຢ້ຳວ່າ ການລົງໂທດແບບ “ບໍ່ຍຸດຕິທຳ”
ທັງໝົດ ຕໍ່ອີຣ່ານນັ້ນ ຕ້ອງໄດ້ຖືກຍົກເລີກ.
ອີຣ່ານຢາກໃຫ້ຍົກເລີກການລົງໂທດຕ່າງໆຂອງນາໆຊາດ ຕໍ່ປະເທດຕົນ ໃນທັນທີ ໃນ
ຖານະທີ່ເປັນພາກສ່ວນນຶ່ງ ຂອງຂໍ້ຕົກລົງ ແຕ່ຂະນະດຽວກັນ ສະຫະລັດ ແລະ ປະເທດ
ອື່ນໆ ກ່າວວ່າ ການລົງໂທດເຫຼົ່ານັ້ນ ຄວນຈະຖືກຍົກເລີກເປັນຂັ້ນໆໄປ.
Your browser doesn’t support HTML5
Iran Nuclear Talk