ທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວ ວັນພະຫັດ
ມື້ນີ້ ເຮົາຈະພາໄປຟັງການສຳພາດກັບ ທ່ານສູນ ພັນພົງສາ
ເຈົ້າຂອງຮ້ານຂາຍພວງມະໄລ ດອກໄມ້ສົດ ຢູ່ທີ່ນະຄອນໂຮ
ໂນລູລູ ເກາະຮີໂລ ລັດຮາວາຍ. ກ່ອນທີ່ຈະໄດ້ມາເປີດທຸລະກິດ
ເຮັດພວງພວງມະໄລດອກໄມ້ສົດນັ້ນ ໃນເບື້ອງຕົ້ນ ທ່ານສູນ
ໄດ້ພະເນຈອນເຮັດວຽກງານຫລາຍໆຢ່າງຢູ່ໃນແຜ່ນດິນໃຫຍ່
ສະຫະລັດ ກ່ອນຕັດສິນໃຈກັບຄືນມາ ສ້າງຄອບຄົວ ແລະເປີດ
ຮ້ານຂາຍພວງມະໄລ ດອກໄມ້ ຢ່າງເປັນຜົນສຳເລັດ ທີ່ເກາະ
ຮາວາຍ ຊຶ່ງ ກິ່ງສະຫວັນ ຈະນຳເລື້ອງນີ້ມາສະເໜີທ່ານ ໃນ
ອັນດັບຕໍ່ໄປ.
ແຜນທີ່ ບັນດາເກາະຮາວາຍ ທີ່ມະຫາສະມຸດ ປາຊິຟິກ
Your browser doesn’t support HTML5
ຟັງການສຳພາດ ທ່ານສູນ ພັນພົງສາ ເຈົ້າຂອງຮ້ານຂາຍພວງມະໄລ ດອກໄມ້ ທີ່ລັດ ຮາວາຍ
ສະບາຍດີ ທ່ານຜູ້ຟັງທີ່ເຄົາລົບ ວັນເສົາທີ 14 ເດືອນກຸມພາ ຈະມາເຖິງນີ້ ແມ່ນວັນ
Valentine’s Day ຫລື ວັນແຫ່ງຄວາມຮັກ ທີ່ປະຊາຄົມໂລກ ຢູ່ໃນຫລາຍໆປະເທດພາ
ກັນກະກຽມສະຫລອງກັນຢ່າງຄຶກຄື້ນ ດ້ວຍການມອບຂອງຂວັນ ແລະມອບດອກໄມ້ ໃຫ້
ຜູ້ເປັນທີ່ຮັກຂອງຕົນ ເພາະສະນັ້ນ ລາຍການຊີວິດຊາວລາວ ມື້ນີ້ຈະນຳສະເໜີທ່ານ ກ່ຽວກັບຊີວິດຄວາມເປັນມາຂອງ ທ່ານສູນ ພັນພົງສາ ເຈົ້າຂອງຮ້ານຂາຍພວງມະໄລດອກໄມ້ສົດ ທີ່ນະຄອນ Honolulu ເກາະ Oahu ລັດ Hawaii ຊຶ່ງແຕ່ລະປີ ກ່ອນວັນແຫ່ງຄວາມ
ຮັກ ຈະມາເຖິງ ຮ້ານຂາຍດອກໄມ້ຂອງທ່ານສູນ ແມ່ນຕ້ອງໄດ້ກະກຽມ ຮ້ອຍພວງໄລດອກ
ໄມ້ສົດ ຫລາຍໆພັນພວງ ເພື່ອສົ່ງອອກຂາຍຕາມຕະຫລາດ ຮ້ານຄ້າ ແລະລໍຖ້າກຽມພ້ອມ
ໃຫ້ບັນດາຜູ້ທີ່ມີຄວາມຮັກທັງຫລາຍ ຊື້ໄປມອບໃຫ້ຄົນຮັກຂອງຕົນ. ແຕ່ກ່ອນອຶ່ນ ເຮົາມາ
ເຂົ້າໃຈເຖິງຊີວິດ ການພະຈົນໄພ ຄວາມສູ້ທົນ ມານະອົດທົນ ທີ່ໄດ້ນຳພາ ທ່ານສູນ ມາ
ເປັນນັກທຸລະກິດຂາຍດອກໄມ້ ແລະຜະລິດພວງມະໄລ ວັນແຫ່ງຄວາມຮັກ ຈົນປະສົບ
ຜົນສຳເລັດ.
ທ່ານສູນ ພັນພົງສາ ເກີດເມື່ອປີ 1963 ທີ່ເມືອງແປກ ແຂວງຊຽງຂວາງ ເປັນ ລູກຊາຍຄົນ
ທີ 5 ຂອງຄອບຄົວທັງໝົດ 12 ຄົນ. ໃນປີ 1970 ຄອບຄົວໄດ້ອົບພະຍົບຫລົບໄພຈາກສົງຄາມ ໄປຢູ່ບ້ານດົງໝາກຮຽວ ແຂວງວຽງຈັນ ທ່ານສູນ ເລົ່າຊີວິດເບື້ອງຕົ້ນສູ່ ວີໂອເອ ຟັງດັ່ງນີ້ :
ພວງມະໄລດອກສາມປີ ສີຂາວ ແລະສີແດງ
Your browser doesn’t support HTML5
ຟັງການສຳພາດ ທ່ານສູນ ພັນພົງສາ 1
ຕົກມາເຖິງປີ 1978 ພາຍໃຕ້ຄວາມເຄັ່ງຕືງແຕກຕຶ່ນຢ້ານກົວ ລະບອບການປົກຄອງໃໝ່
ທ່ານສູນ ຊຶ່ງເວລານັ້ນອາຍຸ 16 ປີ ໄດ້ລັກລອຍຂາມນ້ຳຂອງ ເຂົ້າໄປຢູ່ ສູນອົບພະຍົບ
ໜອງຄາຍ ປະເທດໄທ ເໝືອນດັ່ງປະຊາກອນລາວຫລາຍແສນຄົນ ແລະໄດ້ສົມທົບຢູ່ກັບ
ພີ່ນ້ອງ ກ່ອນຕິດຕາມເຂົ້າມາຕັ້ງຖິ່ນຖານຢູ່ ນະຄອນ Honolulu ລັດ Hawaii ຊຶ່ງ ທ່ານ
ສູນ ໄດ້ເລົ່າຊີວິດບັ້ນນີ້ວ່າ :
ພວງດອກຈຳປາ
Your browser doesn’t support HTML5
ຟັງການສຳພາດ ທ່ານສູນ ພັນພົງສາ 2
ໃນຕອນທ່ານສູນ ມີອາຍຸໄດ້ 18 ປີນັ້ນ ຕາມກົດໝາຍຂອງ ສະຫະລັດ ແລ້ວ ແມ່ນເປັນຜູ້ ເຖິງກະສຽນ ມີສິດສ່ວນໂຕຂອງຄວາມເປັນຜູ້ໃຫຍ່ຫລາຍຢ່າງ ແລະຕ້ອງ ໄດ້ຮີບຮ້ອນຮຽນ ພາສາອັງກິດ ເພື່ອປະກອບອາຊີບ. ທ່ານສູນ ໄດ້ເລົ່າຕໍ່ໄປວ່າ :
ດອກຂີງ
Your browser doesn’t support HTML5
ຟັງການສຳພາດ ທ່ານສູນ ພັນພົງສາ 3
ຫລັງຈາກໄດ້ໃຊ້ຊີວິດເຮັດວຽກຢູ່ນະຄອນ Honolulu ເປັນເວລາສາມປີປາຍ ຄວາມໜຸ່ມແໜ້ນ ຄວາມເປັນຊາຍໂສດ ໄດ້ເຮັດໃຫ້ ທ່ານສູນ ຢາກໄປພະຈົນໄພສ່ຽງໂຊກຊາຕາ ຈຶ່ງໄດ້ຂ້າມມະຫາສະມຸດປາຊິຟິກ ມາຊອກເຮັດວຽກກັບໝູ່ເພື່ອນ ຢູ່ໃນແຜ່ນດິນໃຫຍ່ ອາເມ ຣິກາ ໂດຍບໍ່ມີຈຸດໝາຍປາຍທາງອັນແນ່ນອນ. ທ່ານສູນ ໄດ້ເລີ້ມຈາກທິດຕາເວັນຕົກທີ່ ລັດ California ໄປຫາລັດ Texas ຈົນຮອດ ລັດ Massachusetts ຢູ່ທາງທິດຕາເວັນອອກສຽງເໜືອຂອງ ສະຫະລັດ. ທ່ານສູນ ໄດ້ເລົ່າເຖິງຊິວິດທີ່ໜ້າສົນໃຈບັ້ນນີ້ສູ່ ວີໂອເອ ຟັງອີກວ່າ :
ພວງມະໄລ ຢູ່ແຄມຫາດຊາຍທະເລ
Your browser doesn’t support HTML5
ຟັງການສຳພາດ ທ່ານສູນ ພັນພົງສາ 4
ຫລັງຈາກ ທ່ານສູນ ໄດ້ພະຈົນໄພ ຢູ່ເປັນເວລາຫລາຍປີ ໄດ້ເຫັນພູມລຳເນົາ ຊີວິດການເປັນຢູ່ໃນແຜ່ນດິນໃຫຍ່ ທີ່ມີຄວາມແຕກຕ່າງກັນຈາກແຕ່ລະບ່ອນ ໃນທີ່ສຸດກໍໄດ້ຕັດສິນໃຈກັບຕ່າວຄືນໄປຕັ້ງຊີວິດ ສ້າງຄອບຄົວ ເຮັດທຸລະກິດຢູ່ ນະຄອນ Honolulu ແລະໄດ້ເລົ່າຊີວິດບັ້ນສຸດທ້າຍນີ້ວ່າ :
ທ່ານສູູນ ພັນພົງສາ ກັບຄືນມາ ເກາະຮາວາຍ
Your browser doesn’t support HTML5
ຟັງການສຳພາດ ທ່ານສູນ 5
ຮີດຄອງປະເພນີ ຄວາມໝາຍຂອງການມອບພວງມະໄລ ດອກໄມ້ສົດ ຂອງຊາວເກາະ Hawaii ໃຫ້ແກ່ກັນນັ້ນ ຄ້າຍຄືກັນກັບ ພິທີບາສີສູ່ຂວັນ ອັນເປັນປະເພນີລາວ ໂດຍສະເພາະ ຢູ່ເວລາສຳຄັນຂອງຊີວິດ ເຊັນວ່າ ເກີດລູກໃໝ່ ຫາຍຈາກການເຈັບປ່ວຍ ແຕ່ງດອງ ເລື່ອນຊັ້ນ ເດີນທາງ ແລະຕ້ອນຮັບແຂກ ແລະຢູ່ໃນໂອກາດອັນສຳຄັນອຶ່ນໆ ຊຶ່ງ ທ່ານສູນ ໄດ້ອະທິບາຍສູ່ຟັງດັ່ງນີ້ :
ປະເພນີ ການມອບພວງມະໄລ ຂອງຊາວເກາະຮາວາຍ
Your browser doesn’t support HTML5
ຟັງການສຳພາດ ທ່ານສູນ ພັນພົງສາ 6
Valentine’s Day ຫລື “ວັນແຫ່ງຄວາມຮັກ” ແມ່ນສະຫລອງກັນຢູ່ໃນທົ່ວໂລກ ບໍ່ສະເພາະ
ແຕ່ໃນລະຫວ່າງໜຸ່ມສາວ ຄູ່ຮັກ ຫລືສາມີພັນລະຍາເທົ່ານັ້ນ ແລະຍັງເປັນປະເພນີນຶ່ງທີ່
ເດັກນ້ອຍໂຮງຮຽນປະຖົມເຂົາປະຕິບັດກັນ ດ້ວຍການສົ່ງບັດ ວາເລນທາຍ ໃຫ້ນາຍຄູ ໝູ່ຄູ່
ໃນຫ້ອງ ແລະພໍ່ແມ່ພີ່ນ້ອງ. ໃນບັດກໍຈະມີຂໍ້ຄວາມສະແດງເຖິງຄວາມຮັກຫອມ ທຳນອງວ່າ
“You are my Valentine ຫລື ເຈົ້າເປັນສຸດທີ່ຮັກຂອງຂ້ອຍ” ຫລືຖາມວ່າ “Will you be
my Valentine? ແປວ່າ ເຈົ້າຈະເປັນສຸດທີ່ຮັກຂອງຂ້ອຍໄດ້ບໍ່?”
ນອກຈາກນັ້ນແລ້ວ ບັນດາຄູ່ບ່າວສາວ ຜົວເມຍ ໝູ່ເພື່ອນ ຍັງພາກັນອອກໄປກິນເຂົ້າແລງ
ຢູ່ຕາມຮ້ານອາຫານຕ່າງໆ. ຜູ້ຊາຍຈະຊື້ດອກໄມ້ ຫລື chocolate ໃຫ້ຄູ່ຮັກ ເພາະສະນັ້ນ
ເວລານີ້ຈະເຫັນບັນຍາກາດ ທີ່ເຕັມໄປດ້ວຍສີແດງ ໂດຍສະເພາະດອກກຸຫລາບ ວາງຂາຍ
ເປັນມັດ ຫລືຕົກແຕ່ງຢ່າງງົດງາມຢູ່ຕາມຕະຫລາດ ແລະຮ້ານອາຫານກໍຕ້ອງໄດ້ຖືກຈອງໄວ້ກ່ອນລ່ວງໜ້າຫລາຍອາທິດ.
ອ້າງອີງຕາມບັນທຶກຄົ້ນຄວ້າ ຄວາມເປັນມາຂອງ ວາເລນທາຍ ນັ້ນ ແມ່ນເລີ້ມຂື້ນຢູ່ໃນ ສັດ
ຕະວັດ ທີ ສາມ ຈາກ ຄຸນພໍ່ສາສະໜາ ຄາໂທລິກ ຊື່ວ່າ Valentine. ເວລານັ້ນແມ່ນສະໄໝ
ອານາຈັກກຸງໂຣມ ພາຍໃຕ້ຈັກກະພັດ Claudius II ທີ່ຊົງເຫັນວ່າ ພວກຊາຍໂສດ ທີ່ເປັນ
ທະຫານ ມີສະມັດຖະພາບດີກ່ອນ ພວກຜູ້ຊາຍທີ່ແຕ່ງງານແລ້ວ. ດ້ວຍເຫດນີ້ ຈັກກະພັດ
Claudius II ຈຶ່ງໄດ້ອອກກົດໝາຍຫ້າມບໍ່ໃຫ້ຊາຍໂສດແຕ່ງງານ ແຕ່ວ່າ ຄຸນພໍ່ Valentine
ເຫັນວ່າບໍ່ມີຄວາມທ່ຽງທຳ ທ່ານ ຈຶ່ງໄດ້ລັກແຕ່ງງານໃຫ້ ແກ່ພວກໜຸ່ມສາວ ທີມັກຮັກກັນ
ຢ່າງລັບໆ ຫລັງຈາກ ຈັກກະພັດ Claudius ຮູ້ເລື້ອງກໍໄດ້ຖືກສັ່ງໃຫ້ປະຫານຊີວິດ ຄຸນພໍ່
Valentine ແລະຕໍ່ມາຈຶ່ງມີການຕັ້ງ ວັນແຫ່ງຄວາມຮັກ ຂື້ນມາ ເພື່ອໃຫ້ກຽດແກ່ ຄຸນພໍ່
Valentine. ບັດນີ້ ເຮົາຫັນມາຟັງທ່ານສູນ ເລົ່າກ່ຽວກັບວຽກງານຮ້ອຍພວງມະໄລດອກໄມ້. ທຸກໆປີກ່ອນໜ້າ ວັນແຫ່ງຄວາມຮັກ ຈະມາເຖິງ ຮ້ານຂາຍພວງມະໄລຂອງ ທ່ານສູນ ຕ້ອງໄດ້ເລີ້ມກະກຽມໄວ້ເປັນອາທິດ.
ສາມສາວງາມ ເກາະຮາວາຍ
Your browser doesn’t support HTML5
ຟັງການສຳພາດ ທ່ານສູນ ພັນພົງສາ 7
ນັ້ນແມ່ນ ລາຍການຊິວິດຊາວລາວ ກ່ຽວກັບຄວາມເປັນມາຂອງ ທ່ານສູນ ພັນພົງສາ ທີ່ໄດ້
ປະສົບຜົນສຳເລັດການເຮັດທຸລະກິດ ຮ້ານຂາຍພວງມະໄລ ດອກໄມ້ ທີ່ນະຄອນ Hono-
lulu ລັດ Hawaii. ກ່ອນຈາກກັນໄປວັນນີ້ ຂ້າພະເຈົ້າ ພ້ອມດ້ວຍຄະນະຈັດທຳ ວີໂອເອ
ພະແນກພາສາລາວ ຂໍຝາກເພງ Valentine ນີ້ໃຫ້ແກ່ທຸກໆທ່ານ ພ້ອມດ້ວຍຄົນຮັກສຸກສົດຊື່ນສົມຫວັງ ຈົ່ງເກີດຂື້ນແກ່ທຸກໆທ່ານ Happy Valentine.