ໃນລາຍການຊີວິດຊາວລາວ ຂອງ ວີໂອເອ ແລງວັນພະຫັດມື້ນີ້
ເຮົາຈະພາທ່ານໄປພົບກັບ ນາງສາວ ບູຊາ ເທບພະພອນ ອາເມ
ຣິກັນເຊື້ອສາຍລາວ ເກີດຢູ່ໃນ ສະຫະລັດ. ນາງສາວບູຊາ ເປັນ
ນັກສິນລະປິນ ສະໄໝໃໝ່ ທີ່ໃຊ້ສິນລະປະ ການຖ່າຍຮູບ ຮູບ
ແຕ້ມ ການຟ້ອນ ກາບກອນ ແລະການສະແດງຕ່າງໆ ເປັນເຄື່ອງ
ມືຊ່ວຍໃນການປິ່ນປົວຄົນເຈັບ ບໍ່ວ່າຈະເປັນດ້ານຮ່າງກາຍ ແລະດ້ານຈິດໃຈກໍເຊັ່ນກັນ
ເພື່ອບັນເທົາ ຄວາມຫງອຍເຫງົາ ແລະເຈັບປວດຕ່າງໆ ຊຶ່ງ ກິ່ງສະຫວັນ ຈະນຳເລື້ອງນີ້
ມາ ສະເໜີທ່ານໃນອັນດັບຕໍ່ໄປ.
Your browser doesn’t support HTML5
ເຊິນຟັງການສຳພາດ ນາງສາວບູຊາ ເທບພະພອນ ນັກສິນລະປິນປິ່ນປົວໂຣກຈິດ
ສະບາຍດີ ທ່ານຜູ້ຟັງທີ່ເຄົາລົບ ປັດຈຸບັນນີ້ເຮົາຢູ່ໃນສັດຕະວັດ ທີ 21 ທີ່ມີຄວາມກ້າວໜ້າ
ໃນຫລາຍໆດ້ານ ໂດຍສະເພາະທາງດ້ານເທັກໂນໂລຈີ ທີ່ໄດ້ຖືກພັດທະນາມາເປັນໄລ
ຍະໄລຍະ ແລະໃນອີກດ້ານໜຶ່ງນັ້ນກໍຄື ການສຶກສາ ໂດຍສະເພາະ ຢູ່ໃນບັນດາປະເທດ
ອຸດສາຫະກໍາທີ່ຮັ່ງມີ ເຂົາເຈົ້າມີຫລັກສູດການສອນ ແລະການຮຽນດ້ານມະນຸດຊາດ ຢູ່
ຫລາຍໆຂະແໜງ ເຊັ່ນວ່າ ປະຫວັດສາດ ພູມີສາດ ສັງຄົມສາດ ມະນຸດສາດ ແລະສິນລະ
ປະສາດ ເຊັ່ນວ່າການຟ້ອນລຳ ການແຕ້ມ ຂຽນກາບກອນ ການສະແດງ ແລະອື່ນໆ ຊຶ່ງ
ບັນດາ ຫລັກສູດເຫລົ່ານີ້ ບໍ່ຄ່ອຍຖືກພັດທະນາສິດສອນ ແລະບໍ່ນິຍົມຢູ່ໃນບັນດາປະເທດ
ທີ່ກຳລັງພັດທະນາ ທີ່ຍັງເຫັນວ່າ ເປັນວິຊາການຮຽນ ບໍ່ສ້າງລາຍໄດ້ ແລະບໍ່ມີຄວາມກ້າວ ໜ້າ.
ແຕ່ວ່າ ຢູ່ໃນບັນດາປະເທດພັດທະນາ ເຮົາຈະເຫັນມີໂຮງມະຫໍລະສົບຄົບງັນຕ່າງໆ ໂດຍ
ສະເພາະການສ້າງຮູບເງົາ ແລະບັນດານັກສິນລະປິນຜູ້ມີຊື່ສຽງ ທີ່ຄ່າໂຕແພງໆ. ບັດນີ້ເຮົາ
ຫັນມາຮຽນຮູ້ກ່ຽວກັບ ຊາວອາເມຣິກັນເຊື້ອສາຍລາວຄົນນຶ່ງ ຈັກບາດເໜາະທ່ານ. ນາງ
ສາວບູຊາ ເທບພະພອນ ຜູ້ທີ່ໄດ້ສຶກສາຮໍ່າຮຽນດ້ານສິນລະປະ ແລະໄດ້ນຳເອົາຄວາມຮູ້
ຂອງລາວ ມາໃຊ້ໃຫ້ເປັນປະໂຫຍດ ຊ່ວຍປິ່ນປົວພວກຄົນເຈັບປ່ວຍ ເພື່ອໃຫ້ເປັນການ
ຜ່ອນຄາຍ ທັງທາງດ້ານຮ່າງກາຍ ແລະຈິດໃຈ.
ນາງສາວບູຊາ ເກີດຢູ່ໂຮງໝໍ Contra Costa County Medical Center ໃນປີ 1981
ບ່ອນທີ່ນາງເຮັດວຽກຢູ່ໃນປັດຈຸບັນ ທີ່ Bay Area ໃນລັດ California. ບູຊາ ມີຄວາມ
ຮູ້ສຶກມາແຕ່ນ້ອຍວ່າ ນາງມັກສິນລະປະ ໂດຍທີ່ພໍ່ແມ່ບໍ່ໄດ້ແນະນຳ ແລະນາງກໍໄດ້ຕິດ
ຕາມຫາຄວາມໄຝ່ຝັນນີ້ມາຕະຫລອດ. ບູຊາ ກ່າວວ່າ ນາງໄດ້ຖືກຮຽກຮ້ອງຈາກສິ່ງສັກ
ສິດ ວ່າໃຫ້ເປັນຜູ້ນຳເອົາສິນລະປະຕ່າງໆ ມາເປັນເຄື່ອງມືຊ່ວຍປິ່ນປົວພວກຄົນເຈັບຊຶ່ງນາງໄດ້ເລົ່າຄວາມເປັນມາເບຶ້ອງຕົ້ນ ເປັນພາສາລາວສູ່ ວີໂອເອ ຟັງດັ່ງນີ້ :
ຊ້າງໃຫຍ່ ໃນປະເທດລາວ ຖ່າບພາບໂດຍ ນາງສາວບູຊາ ເທບພະພອນ
Your browser doesn’t support HTML5
ເຊິນຟັງການສຳພາດ ນາງສາວບູຊາ ເທບພະພອນ ນັກສິນລະປິນປິ່ນປົວໂຣກຈິດ 1
"ແນ່ນອນ ຂ້ານ້ອຍມັກເມືອງລາວ ກໍເພາະວ່າ ຂ້ານ້ອຍມາຈາກທີ່ນັ້ນ ແລະເຖິງແມ່ນວ່າ
ຂະນ້ອຍຈະບໍ່ໄດ້ເກີດຢູ່ຫັ້ນກໍຕາມ ແຕ່ມັນກໍເປັນບ່ອນມາຂອງພໍ່ແມ່ຂອງຂ້ານ້ອຍ ແລະ
ນັ້ນ ແມ່ນຮາກເຫງົ້າຂອງ ຂ້ານ້ອຍ ແລະຂ້ານ້ອຍໄດ້ມີໂອກາດໄປຢ້ຽມຢາມເມືອງລາວ
ເທຶ່ອທຳອິດໃນປີ 2009 ຂ້ານ້ອຍໄດ້ໄປຢ້ຽມຢາມຫລາຍແຫ່ງ ເຊັ່ນວ່າ ວຽງຈັນ ແລະ
ບ້ານທາດ ເມືອງຊຽງຮ່ອນ ແຂວງໄຊຍະບູລີ ທີ່ເປັນບ້ານເກີດຂອງພໍ່ ທີ່ຢູ່ຕິດກັບຊາຍ
ແດນໄທ."
ບູຊາ ແມ່ນຍິງສາວອາເມຣິກັນເຊື້ອສາຍລາວ ເກີດມາເຫັນສິ່ງແວດລ້ອມ ທີ່ເຕັມໄປດ້ວຍສິນລະປະຕ່າງໆ ທີ່ນະຄອນ San Francisco ເມືອງງົດງາມຂອງ ສະຫະລັດ ແລະເປັນເມືອງ ທີ່ມີປະຊາຄົມຂອງຜູ້ໃຊ້ແນວຄິດ ຢ່າງເສລີໄປກວ່າຫລາຍໆແຫ່ງ ຢູ່ໃນສະຫະລັດ. ບູຊາ ໄດ້ເລົ່າຄວາມນຶກຄິດຕໍ່ໄປອີກວ່າ :
ນາງສາວບູຊາ ແລະເພື່ອນຮວມງານ
Your browser doesn’t support HTML5
ເຊິນຟັງການສຳພາດ ນາງສາວບູຊາ ເທບພະພອນ ນັກສິນລະປິນປິ່ນປົວໂຣກຈິດ 2
“ຂ້າຂ້ອຍ ມັກສິນລະປະການອອກແບບມາແຕ່ໃດໆ ແລະໄດ້ເຂົ້າຮຽນຢູ່ ສະຖາບັນແຟ
ຊັນ ແລະການອອກແບບສິນຄ້າທີ່ ນະຄອນ San Francisco ແລະຂ້ານ້ອຍ ໄດ້ຮຽນ
ວິຊາກ່ຽວກັບການພັດທະນາສິນຄ້າ ທີ່ພົວພັນກັບດ້ານເທັກນິກ ການອອກແບບ ພ້ອມ
ທັງທຸລະກິດການຄ້າ. ຫລັງຈາກຂ້ານ້ອຍຮຽນຈົບແລ້ວ ຂ້ານ້ອຍກໍໄດ້ພົວພັນກັບການຖ່າຍຮູບ ແລະຂ້ານ້ອຍຮູ້ສຶກວ່າ ມີພອນສະຫວັນໃນດ້ານນີ້ ຫລັງຈາກນັ້ນການຖ່າຍຮູບ
ຂອງ ຂ້ານ້ອຍກໍໄດ້ຂະຫຍາຍໂຕອອກ ແລະໄດ້ກາຍມາເປັນນັກຖ່າຍຮູບອາຊີບ. ໃນຂະນະດຽວກັນນັ້ນ ຂ້ານ້ອຍໄດ້ເລີ້ມເຮັດວຽກໃຫ້ແກ່ ທະນາຄານ Wells Fargo ເປັນ
ເວລາ 11 ປີ ແລະຕໍ່ມາໄດ້ຖືກແນະນຳຈາກໝູ່ຄົນໜຶ່ງທີ່ເປັນ ໝໍຝ່າຍຈິດຕະແພດ ເພິ່ນ
ໄດ້ແນະນຳໃຫ້ຂ້ານ້ອຍເຂົ້າມາພົວພັນເຮັດວຽກນຳ ເນຶ່ອງຈາກວ່າ ຂ້ານ້ອຍມີພື້ນຖານ
ການຮຽນດ້ານສິນລະປະ ເພື່ອຈະນຳເອົາຄວາມຮູ້ດ້ານນີ້ ມາໃຊ້ເປັນເຄື່ອງມືຊ່ວຍ ໃນ
ກິດຈະການການປິ່ນປົວ.”
ຢູ່ໃນ ສະຫະລັດ ອາເມຣິກາ ແລະບັນດາປະເທດອຸດສາຫະກຳ ທີ່ອຸດົມຮັ່ງມີ ເຮົາຈະເຫັນ
ວ່າ ບໍ່ມີການລຳອຽງໃນການປິ່ນປົວບັນຫາໂຣກຈິດ ເຂົາເຈົ້າໂອ້ລົມເລື້ອງດັ່ງກ່າວກັນຢ່າງ
ເປີດເຜີຍ ແລະມີຜູ້ຊ່ຽວຊານ ທີ່ເປັນນາຍແພດໃນດ້ານນີ້ໂດຍສະເພາະ. ບູຊາ ໄດ້ເລົ່າວິທີ
ການປິ່ນປົວຕໍ່ໄປອີກວ່າ :
ພາບຖ່າຍ ໃນແນວຄິດຂອງ ນາງສາວບູຊາ ເທບພະພອນ
Your browser doesn’t support HTML5
ເຊິນຟັງການສຳພາດ ນາງສາວບູຊາ ເທບພະພອນ ນັກສິນລະປິນປິ່ນປົວໂຣກຈິດ 3
“ສຳລັບພວກຄົນເຈັບຄົນປ່ວຍ ຮວມທັງຄົນພິການຕ່າງໆທາງດ້ານຮ່າງກາຍ ສະໝອງ
ແລະດ້ານຈິດໃຈ ພວກຂ້ານ້ອຍ ໄດ້ໃຊ້ສິນລະປະທຸກຢ່າງເປັນເຄຶ່ອງມື ເຊັ່ນ ການໃຊ້
ດົນຕີ ຮອ້ງເພງ ກາບກອນ ແຕ້ມຮູບ ແລະຖ່າຍຮູບ ເພື່ອໃຫ້ພວກເຂົາເຈົ້າເລົ່ານັ້ນ ໄດ້
ພົົວພັນ ແລະສຶກສາຮໍ່າຮຽນ. ຂ້ານ້ອຍດີໃຈ ຄືກັນກັບໄດ້ຮັບລາງວັນ ແລະມ່ວນຊື່ນໃນ
ສິ່ງທີ່ຂ້ານ້ອຍເຮັດ ແລະມັກຢ່າງເປັນຊີວິດຈິດໃຈ. ໃນຂະນະດຽວກັນ ຂ້ານ້ອຍກໍໄດ້ມີໂອກາດຊ່ວຍປະຊາຄົມ ເພື່ອໃຫ້ເຂົາເຈົ້າໄດ້ລະບາຍຄວາມຮູ້ສຶກອອກມາ ໃນສິ່ງທີ່
ເຂົາເຈົ້າເຫັນ ແລະຄິດ ແລະນັ້ນແມ່ນສິ່ງທີ່ຂ້ານ້ອຍ ໄດ້ເຫັນຜົນຮັບຄືນມາ. ໂຄງການ
ດັ່ງ ກ່າວນີ້ເປີດໂອກາດໃຫ້ແກ່ບໍ່ສະເພາະ ແຕ່ຄົນເຈັບປ່ວຍ ແຕ່ບໍລິການໃຫ້ແກ່ ບັນ
ດານາຍແພດ ແລະພະນັກງານຕ່າງໆ ທີ່ເຮັດວຽກຢູ່ໂຮງໝໍນຳກັນ ຕະຫຼອດທັງບັນດາ
ສະມາຊິກຂອງສັງຄົມທຸກເຍົາໄວ ແລະຜູ້ມີພື້ນຖານຕ່າງໆ."
ນາງສາວບູຊາ ເທບພະພອນ ປັດຈຸບັນນີ້ອາຍຸ 34 ປິ ຍັງເປັນໂສດ ຍັງດຳເນີນສະແຫວງ
ຫາການຮຽນ ແລະເຮັດວຽກໜັກຢ່າງບໍ່ຢຸດຍັ້ງ ນາງໄດ້ກ່າວສະຫລຸບ ກ່ຽວກັບວິຊາອາຊີບທີ່ນາງຮັກເປັນຊີວິດຈິດໃຈ ແລະມ້ວນທ້າຍດັ່ງນີ້ :
ນາງສາວບູຊາ ອ້ອມລ້ອມໄປດ້ວຍເດັກນ້ອຍນັກຮຽນປະຖົມ ທີ່ບ້ານທາດ ເມືອງຊຽງຮອນ ແຂວງໄຊຍະບຸລີ
Your browser doesn’t support HTML5
ເຊິນຟັງການສຳພາດ ນາງສາວບູຊາ ເທບພະພອນ ນັກສິນລະປິນປິ່ນປົວໂຣກຈິດ 4
“ຂ້ານ້ອຍ ຢາກກ່າວເພີ້ມກ່ຽວກັບ ບັນຍາກາດການປິ່ນປົວ ແລະການສະແດງສິນລະ ປະວ່າ ເປັນສິ່ງສຳຄັນຫລາຍແກ່ໂຣກຈິດ. ເພື່ອທັບມ້າງຄວາມລີ້ລັບທີ່ຍັງຊຸກເຊຶ່ອງໄວ້
ຢູ່ໃນປະເພນີຊາວເອເຊຍ ເພາະສະນັ້ນ ເຮົາຈຶ່ງໃຊ້ສິນລະປະນີ້ ໃຫ້ເປັນເຄຶ່ອງມືທີ່ມີປະ
ໂຫຍດ ເພື່ອໃຫ້ຄົນປ່ວຍ ໄດ້ພັກຜ່ອນຢ່ອນອາລົມ ໂດຍການ ລະບາຍອອກມາຈາກໃຈ
ຈິງ ແລະສິ່ງເລົ່ານີ້ ຈະເຮັດໃຫ້ງ່າຍຂື້ນແກ່ເຂົາເຈົ້າໃນການເຂົ້າຮ່ວມ ເພາະສະນັ້ນ ຂ້ານ້ອຍ ຈຶ່ງເຫັນອົກເຫັນໃຈທີ່ສຸດໃນການປະຕິບັດວຽກງານ. ຂ້ານ້ອຍ ໄດ້ເດີນທາງ
ໄປ ປະເທດໄທ ແລະປະເທດລາວ ແລະໄດ້ເກັບກໍາເອົາພາບຖ່າຍ ອັນເປັນຮູບພາບ
ເຄື່ອງມືທີ່ມີພະລັງອຳນາດກັບມາ ອີກປະການໜຶ່ງກໍຍ້ອນວ່າ ມັນເປັນໄປຕາມຍຸກສະ
ໄໝ ເພື່ອເຊື່ອມຕໍ່ຊ່ອງຫວ່າງ ລະຫວ່າງອາຍຸ ຄວາມແຕກຕ່າງທາງດ້ານວັດທະນາທຳ
ແລະພື້ນຖານແຫ່ງຄວາມເປັນມາ ຊຶ່ງເປັນສິ່ງສຳຄັນທີ່ສຸດໃນການປະຕິບັດງານຂອງ
ຂ້ານ້ອຍ.”
ປັດຈຸບັນນີ້ ນາງສາວບູຊາ ເທບພະພອນ ເຮັດວຽກຢູ່ ໂຮງໝໍ Contra Costa County
Medical Center ບ່ອນທີ່ນາງເກີດ ໃນເຂດ Bay area ຂອງລັດ California.
ເພງທີ່ທ່ານໄດ້ຟັງປະກອບກັບ ການສຳພາດ ນາງສາວບູຊາ ເທບພະພອນ ມີຊື່ວ່າ San Francisco Flower in Your Hair ຮ້ອງໂດຍ Scott Mckenzie ເປັນເພງ ທີ່ມີ ຊື່ງສຽງ ແລະໂດ່ງດັງໃນປີ 1967 ແລະເປັນຂົງເຂດທີ່ບູຊາ ໄດ້ໃຫຍ່ເຕີບໂຕ ສຳເລັດການສືກສາ ແລະປະກອບວິຊາອາຊີບ.