ພູໄຟແຫ່ງນຶ່ງໃນພາກກາງຂອງອິນໂດເນເຊຍ ທີ່ໄດ້ພົ່ນຂີ້ເຖົ່າໄຟພ້ອມທັງກ້ອນຫີນ
ແລະຄວັນໄຟຂຶ້ນສູ່ທ້ອງຟ້າມາເວລານຶ່ງສັບປະດານັ້ນ ໄດ້ລະເບີດຂຶ້ນຢ່າງແຮງທີ່ສຸດ
ໃນວັນອາທິດມື້ນີ້ ເຮັດໃຫ້ພວກຊາວບ້ານພາກັນແຕກຕື່ນ ແລ່ນກັບຄືນໄປຍັງບ່ອນ
ພັກເຊົາສຸກເສີນ.
ພວກນັກຊ່ຽວຊານກ່ຽວກັບພູເຂົາໄຟ ກ່າວວ່າ ການລະເບີດຂອງພູໄຟ Mount Lokon
ເທິງເກາະຊູລາເວສີ ໃນພາກເໜືອຂອງປະເທດ ໄດ້ສົ່ງຂີ້ເຖົ່າໄຟແລະເສດຫີນໄຟຂຶ້ນສູ່
ອາກາດສູງເຖິງ 3500 ແມັດ ແຕ່ບໍ່ມີລາຍງານວ່າ ມີຜູ້ໄດ້ຮັບບາດເຈັບ.
ການລະເບີດຂຶ້ນຫລາຍບັ້ນຂອງພູໄຟດັ່ງກ່າວໃນແລງວັນພະຫັດແລະເຊົ້າວັນສຸກຜ່ານມາ
ນີ້ ໄດ້ເຮັດໃຫ້ແມ່ຍິງຄົນນຶ່ງເສຍຊີວິດຍ້ອນຫົວໃຈວາຍ ໃນຂະນະທີ່ນາງແລ່ນຫລົບໜີຈາກ
ການລະເບີດຂອງພູໄຟນັ້ນ.
ຂົງເຂດດັ່ງກ່າວໄດ້ຢູ່ໃນທ່າຕຽມພ້ອມໃນລະດັບສູງສຸດມາຕັ້ງແຕ່ມື້ວັນຈັນຜ່ານມາ ເວລາ
ທາງການອິນໂດເນເຊຍເລີ້ມອົບພະຍົບຊາວບ້ານອອກໄປຈາກເສ້ນທາງປິວຂອງຄວັນ
ແລະຂີ້ເຖົ່າໄຟນັ້ນ. ມາຮອດປັດຈຸບັນນີ້ ມີປະຊາຊົນປະມານ 2500 ຄົນໃນຈໍານວນຊາວ
ບ້ານ 28 ພັນຄົນ ທີ່ອາໄສຢູ່ຕາມເຈີ້ຍພູທີ່ເປັນພື້ນທີ່ດິນອຸດົມສົມບູນນັ້ນ ໄດ້ຍົກຍ້າຍ
ອອກຈາກຂົງເຂດນີ້ໄປແລ້ວ.
ພູໄຟ Mount Lokon ເປັນນຶ່ງໃນບັນດາພູເຂົາໄຟທີ່ລະເບີດຂຶ້ນຢ່າງແຂງແຮງທີ່ສຸດໃນ
ອິນໂດເນເຊຍ. ເທື່ອຫລ້າສຸດທີ່ພູໄຟນີ້ໄດ້ລະເບີດຂຶ້ນແມ່ນໃນປີ 1991 ຊຶ່ງໄດ້ເຮັດໃຫ້
ຄົນເດີນປ່າຊາວ Switzerland ຄົນນຶ່ງເສຍຊີວິດໄປ.