ຄວາມສິ້ນຫວັງແລະຄວາມອຸກອົກອຸກໃຈ ກຳລັງເພີ້ມຂຶ້ນ ຢູ່ໃນເກາະສຸລາເວສີ ຢູ່ທາງ
ພາກກາງຂອງອິນໂດເນເຊຍ ບ່ອນທີ່ປະຊາຊົນ ຫຼາຍກວ່າ 1,200 ຄົນ ໄດ້ເສຍຊີວິດ
ຍ້ອນແຜ່ນດິນໄຫວ ແລະ ຟອງຍັກສຸນາມິ ໄດ້ຖະຫລົ່ມເກາະດັ່ງ ກ່າວເມື່ອສັບປະດາ
ແລ້ວນີ້.
ລາຍງານຕ່າງໆ ຈາກຈຸດເກີດເຫດ ກ່າວວ່າ ປະຊາຊົນໃນເມືອງປາລູ ເຊິ່ງເປັນ ເມືອງທີ່
ໄດ້ຮັບຜົນກະທົບໜັກທີ່ສຸດ ຈາກໄພພິບັດດັ່ງກ່າວນັ້ນ ແມ່ນກຳລັງພາກັນ ເຂົ້າໄປລັກ
ເອົາເຄື່ອງຂອງຢູ່ຕາມຮ້ານຄ້າຫຼາຍແຫ່ງ ທີ່ຖືກປະຖິ້ມໄວ້ ໃນການຊອກຫາອາຫານ
ແລະນ້ຳສະອາດ ແລະມີຄວາມໂກດແຄ້ນຫຼາຍຂຶ້ນ ໃນແຕ່ລະຊົ່ວໂມງທີ່ຜ່ານໄປ ຍ້ອນ
ການຕອບສະໜອງ ຂອງລັດຖະບານທີ່ຊັກຊ້າ ໃນການນຳສົ່ງເຄື່ອງຊ່ອຍເຫຼືອສຸກເສີນ.
ຊາຍຄົນນຶ່ງ ແບກສິ່່ງຂອງ ທີ່ລາວສາມາດເກັບກູ້ມາໄດ້ ຈາກຊາກຫັກພັງ ຫຼັງຈາກແຜ່ນດິນໄຫວ ຂະໜາດໃຫຍ່ ແລະ ຟອງສຸນາມິ ຢູ່ໃນເມືອງ ປາລູ ຂອງເກາະ ສຸລາເວສີ ໃນພາກກາງຂອງອິນໂດເນເຊຍ, ວັນຈັນ ທີ 1 ຕຸລາ 2018.
ໃນຂະນະດຽວກັນ ພວກທີມກູ້ໄພ ຍັງສືບຕໍ່ຂຸດຄົ້ນຫາຜູ້ລອດຊີວິດ ຢ່າງຂຸ້ນຂ້ຽວ ຢູ່ຕາມ
ຊາກຫັກພັງ ໃນທົ່ວເມືອງປາລູ ແຕ່ຄວາມພະຍາຍາມຂອງພວກເຂົາເຈົ້າ ແມ່ນໄດ້ປະສົບ
ກັບອຸປະສັກ ໂດຍການຂາດແຄນເຄື່ອງຈັກໜັກ. ເຊື່ອກັນວ່າ ມີປະຊາຊົນຢ່າງໜ້ອຍ 50
ຄົນຍັງຕົກຄ້າງຢູ່ໃຕ້ຊາກຫັກພັງ ຂອງໂຮງແຮມ ໂຣອາ ໂຣອາ ພຽງແຫ່ງດຽວເທົ່ານັ້ນ.
ອົງການຄຸ້ມຄອງໄພພິບັດແຫ່ງຊາດ ຂອງອິນໂດເນເຊຍ ໄດ້ປະກາດໃນວັນອັງຄານ ມື້ນີ້
ວ່າ ຈຳນວນຂອງຜູ້ເສຍຊີວິດ ໃນເວລານີ້ ແມ່ນຢູ່ໃນລະດັບ 1,234 ຄົນ ຍ້ອນແຜ່ນດິນ
ໄຫວທີ່ມີຄວາມແຮງ 7.5 ເມື່ອວັນສຸກແລ້ວນີ້ ເຊິ່ງໄດ້ກໍ່ໃຫ້ເກີດຄື້ນຟອງຍັກ ສຸນາມິ ໂດຍ
ມີຄື້ນຟອງສູງເຖິງ 6 ແມັດ. ເຮືອນຊານ ແລະ ຕຶກອາຄານຫຼາຍຫລັງ ຢູ່ໃນເມືອງປາລູ
ໄດ້ຖືກຫັນປ່ຽນກາຍເປັນສິ້ນສ່ວນຫັກພັງກອງໃຫຍ່ໆ ແລະເຮັດໃຫ້ປະຊາຊົນ ຫຼາຍເຖິງ
50,000 ຄົນຕ້ອງຖືກຍົກຍ້າຍອອກຈາກພື້ນທີ່. ຟອງຍັກສຸນາມິ ຍັງໄດ້ພັດທຳລາຍ
ຖະໜົນຫົນທາງຫຼາຍສາຍ ແລະຂົວຫຼາຍແຫ່ງ ຂອງເກາະສຸລາເວສີ ແລະຍັງໄດ້ທຳລາຍ
ສະໜາມບິນ ຂອງເກາະນຳ ເຊິ່ງໄດ້ເຮັດໃຫ້ການພະຍາຍາຈັດສົ່ງສິ່ງຂອງບັນເທົາທຸກ
ຊ້າລົງ ອີກດ້ວຍ. ພົນລະເມືອງ ປະມານ 3,000 ຄົນ ໄດ້ພາກັນຫລັ່ງໄປສະໜາມບິນ ໃນ
ວັນຈັນວານນີ້ ໃນຄວາມຫວັງວ່າ ຈະໄດ້ຂຶ້ນເຮືອບິນຂົນສົ່ງຂອງທະຫານ ຫຼື ເຮືອບິນ
ພານິດ ທີ່ຈະນຳເອົາພວກເຂົາເຈົ້າ ອອກໄປຈາກເກາະດັ່ງກ່າວນີ້.
ປະທານາທິບໍດີ ອິນໂດເນເຊຍ ທ່ານ ໂຈໂກ (ໂຈໂກວີ) ໄປເຖິງເມືອງປາລູ ພາກກາງຂອງເກາະຊູລາເວຊີ ວັນທີ 30 ກັນຍາ 2018.
ບັນດາເຈົ້າໜ້າທີ່ ສຸກເສີນ ຢ້ານວ່າຈຳນວນຂອງຜູ້ເສຍຊີວິດ ຈະເພີ້ມສູງຂຶ້ນ ຂະນະທີ່
ພວກກູ້ໄພເຂົ້າໄປເຖິງ 3 ເມືອງ ທີ່ຢູ່ໃກ້ຄຽງກັບເມືອງປາລູ ທີ່ໄດ້ຖືກຕັດຂາດ ໂດຍໄພ
ພິບັດນັ້ນ. ສາມພື້ນທີ່ດັ່ງກ່າວ ໂດຍລວມແລ້ວ ມີປະຊາຊົນ ທັງໝົດ 1 ລ້ານຄົນ.
ຂົງເຂດນີ້ ໄດ້ຮັບຜົນກະທົບ ຈາກແຜ່ນດິນໄຫວຂະໜາດນ້ອຍຕິດຕາມມາ ຢ່າງໜ້ອຍ
ນຶ່ງຄັ້ງ ໃນວັນອັງຄານມື້ນີ້. ບໍ່ມີລາຍງານຂອງການສູນເສຍຊີວິດແຕ່ຢ່າງໃດ ຫຼື ຄວາມ
ເສຍຫາຍເລີຍ.
ປະທານາທິບໍດີ ໂຈໂກວີ ວີໂດໂດ ໄດ້ອະນຸຍາດໃຫ້ຮັບເອົາຄວາມຊ່ອຍເຫຼືອ ຈາກ
ນານາຊາດ ສຳລັບເກາະສຸລາເວສີ.
ບັນດາເຈົ້າໜ້າທີ່ ກ່າວວ່າ ປະຊາຊົນຫຼາຍຮ້ອຍຄົນ ແມ່ນຢູ່ທີ່ຫາດຊາຍ ໃນ ເມືອງປາລູ
ເພື່ອສະຫຼອງບຸນ ໃນເວລາທີ່ເກີດແຜ່ນດິນໄຫວ ແລະ ຟອງຍັກສຸນາມິ ທີ່ໄດ້ພັດເອົາຫຼາຍ
ຄົນໄປ ຈົນເຖິງແກ່ຊີວິດ.