ບັນດາປະເທດໃນເຂດເອເຊຍຕາເວັນອອກສຽງໃຕ້ ໄດ້ຮັກສາຄວາມດຸ່ນດ່ຽງທີ່ບອບບາງ ລະຫວ່າງການຕໍ່ຕ້ານການອ້າງກຳມະສິດ ທີ່ກວ້າງຂວາງຂອງຈີນ ໃນທະເລຈີນໃຕ້ ແລະຂະນະດຽວກັນ ກໍຮັກສາສາຍພົວພັນທາງການຄ້າທີ່ດີ ມາເປັນເວລາດົນນານ. ແຕ່ກໍມີຫລາຍປະເທດ, ລວມທັງອິນໂດເນເຊຍ, ເຊິ່ງໃນຂະນະນີ້ ໄດ້ຢືນຢັດຢ່າງໜັກແໜ້ນຕໍ່ຕ້ານການກ່າວອ້າງເອົາກຳມະສິດດັ່ງກ່າວ. ອາຮາດຽນ ອູທາມາ ຜູ້ສື່ຂ່າວວີໂອເອ ມີລາຍງານກ່ຽວກັບເລື້ອງນີ້ ຈາກຈາກາ ເຊິ່ງອາດນະສັກ ມີລາຍລະອຽດ ມາສະເໜີທ່ານ ໃນອັນດັບຕໍ່ໄປ.
ອິນໂດເນເຊຍໄດ້ອະນຸມັດແຜນການເບື້ອງຕົ້ນໃນການພັດທະນາແຫຼ່ງອາຍແກັສ ທູນາ ບລ໊ອກ ທີ່ຕັ້ງຢູ່ໃນເຂດນ່ານນ້ຳ ນອກໝູ່ເກາະ ນາທູນາ ຂອງຕົນ.
ມັນເປັນພື້ນທີ່ດຽວກັນກັບການຂຸດເຈາະ ໃນທ້າຍປີ 2021 ທີ່ພາໃຫ້ເກີດການປະທ້ວງຈາກຈີນ. ຈາກາຕາໄດ້ຢຸດການສຳຫຼວດໃນເວລານັ້ນ, ແຕ່ ມັນບໍ່ໄດ້ຍົກເລີກ ໃນຂະນະນີ້.
ທ່ານອາລ ອາຣາຟ, ອາຈານສອນຢູ່ມະຫາວິທະຍາໄລ Paramadina ກ່າວວ່າ "ການຂຸດເຈາະອາຍແກັສໃນເຂດ ນາທູນາ ໂດຍອິນໂດເນເຊຍ ແມ່ນສັນຍານທີ່ຊັດເຈນວ່າ ນາທູນາ ແມ່ນອານາເຂດຂອງອິນໂດເນເຊຍ ... ໃນຄວາມຄິດເຫັນຂອງຂ້ອຍ, ອິນໂດເນເຊຍເປັນປະເທດ ທີ່ມີອະທິປະໄຕ ມີສິດທີ່ຈະເຮັດສິ່ງນີ້."
ໝູ່ເກາະ ນາທູນາ, ເຊິ່ງຕັ້ງຢູ່ນອກຝັ່ງທະເລ ບໍນຽວ ຂອງອິນໂດເນເຊຍ, ແມ່ນດິນແດນຂອງອິນໂດເນເຊຍ. ແຕ່ນ່ານນ້ໍາທີ່ຫ່າງອອກໄປ ປະມານ 200 ໄມລ໌, ບ່ອນທີ່ ທູນາ ບລ໊ອກ ຕັ້ງຢູ່ ໃນທະເລ ນາທູນາເຫນືອ, ແມ່ນແຫຼ່ງຂອງຄວາມຂັດແຍ້ງ.
ອິນໂດເນເຊຍ ຖືວ່າມັນຍັງເປັນສ່ວນໜຶ່ງຂອງເຂດເສດຖະກິດຈຳເພາະຂອງຕົນ, ໂດຍອີງຕາມສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ຫຼື UNCLOS.
ແຕ່ຈີນລວມເອົາມັນເຂົ້າ ໃນການອ້າງກຳມະສິດເອົາດິນແດນ ອັນກວ້າງຂວາງຂອງຕົນໃນທະເລຈີນໃຕ້, ການອ້າງກຳມະສິດ ໄດ້ຖືກປະຕິເສດເປັນສ່ວນໃຫຍ່ ໂດຍສານຕັດສິນຊີ້ຂາດຖາວອນ ທີ່ນະຄອນເຮກ ໃນປີ 2016.
ທ່ານ Teuku Faizasyah, ໂຄສົກກະຊວງການຕ່າງປະເທດ ຂອງອິນໂດເນເຊຍ ກ່າວວ່າ "ກ່ຽວກັບການເຄື່ອນໄຫວຂອງອິນໂດເນເຊຍ ໃນເຂດທະເລແຫ່ງຊາດຂອງຕົນ, ເຊິ່ງອີງໃສ່ກົດໝາຍທາງທະເລສາກົນ, ແລະ ຈຸດຢືນຂອງອິນໂດເນເຊຍແມ່ນພວກເຮົາບໍ່ມີຄວາມຂັດແຍ້ງກັບປະເທດໃດກໍ່ຕາມທີ່ອ້າງກຳມະສິດຕໍ່ດິນແດນເຂດທະເລຈີນໃຕ້."
ການສຳຫຼວດອາຍແກັສຄືນໃໝ່ ສາມາດເຫັນໄດ້ວ່າ ເປັນການເພີ່ມທະວີຄວາມເຄັ່ງຕຶງ ລະຫວ່າງປະເທດທີ່ໃຫຍ່ທີ່ສຸດຂອງເອເຊຍຕາເວັນອອກສຽງໃຕ້ກັບຈີນ.
ໃນເດືອນທັນວາຜ່ານມາ, ຄວາມເຄັ່ງຕຶງໄດ້ເພີ່ມຂຶ້ນ ເມື່ອອິນໂດເນເຊຍ ແລະ ຫວຽດນາມ ໄດ້ສຳເລັດການກຳນົດເຂດແດນ ຂອງເຂດເສດຖະກິດສະເພາະ, ເຮັດໃຫ້ປັກກິ່ງສົ່ງໜ່ວຍຍາມຝັ່ງຂອງຕົນ ເຂົ້າໄປໃກ້ກັບເຂດທູນາ ບລ໊ອກ ແລະ ເຂດຂຸດຄົ້ນອາຍແກັສ ຈິມ ສາວ ຂອງຫວຽດນາມ.
ການເຄື່ອນໄຫວນັ້ນໄດ້ເຮັດໃຫ້ອິນໂດເນເຊຍສົ່ງກຳປັ່ນລົບໄປພາກເໜືອ ຂອງ ທະເລ ນາທູນາ.
ພົນເຮືອເອກ Muhammad Ali, ເສນາທິການກອງທັບເຮືອອິນໂດເນເຊຍ ໄດ້ກ່າວວ່າ "ຖ້າພວກເຂົາຈັບປາ ຫຼືດໍາເນີນການສຳຫຼວດ ຫຼືຂຸດຄົ້ນຊັບພະຍາກອນທາງທະເລ, ນັ້ນແມ່ນເປັນສິ່ງຕ້ອງຫ້າມ. ມັນຕ້ອງໄດ້ຮັບການອະນຸຍາດຈາກລັດ ຖະບານອິນໂດເນເຊຍ. ຖ້າພວກເຂົາພຽງແຕ່ເດີນທາງຜ່ານ, ແມ່ນອະນຸຍາດໄດ້"
ຂະນະນີ້ ກອງທັບເຮືອອິນໂດເນເຊຍໄດ້ນຳໃຊ້ກຳປັ່ນລົບ 5 ລຳ ແລະ ເຮືອບິນລາດຕະເວນຂອງກອງທັບເຮືອ ເພື່ອຕິດຕາມກວດກາຢູ່ທາງພາກເໜືອ ຂອງທະເລ ນາທູນາ, ເຊິ່ງຄືກັນກັບນ່ານນໍ້າຫຼາຍໆແຫ່ງ ໃນເຂດອິນໂດປາຊີຟິກ ທີ່ຍັງເຫັນກິດຈະກຳການຫາປາ ຈາກກຳປັ່ນຂອງຈີນ, ຕິດຕາມດ້ວຍໜ່ວຍຍາມຝັ່ງຂອງປະເທດດັ່ງກ່າວ.