ສະຫະລັດໄດ້ສະແດງຄວາມຊົມເຊີຍກ່ຽວກັບການຮື້ຟື້ນ
ການເຈລະຈາສັນຕິພາບຄືນໃໝ່ລະຫວ່າງອິນເດຍແລະ
ປາກິສຖານ ແລະສະແດງຄວາມຫວັງວ່າ ຂັນຕອນດັ່ງ
ກ່າວຈະໃຫ້ດອກອອກຜົນທີ່ດີ.
ໂຄສົກຂອງທຳນຽບຂາວ ທ່ານ Robert Gibbs ກ່າວ
ໃນວັນພະຫັດວານນີ້ວ່າ ປະທານາທິບໍດີບາຣັກໂອບາມາ
ໄດ້ຊຸກຍູ້ໃຫ້ທັງສອງຝ່າຍທຳການພົວພັນກັນຄືນໃໝ່.
ການປະກາດຂອງສະຫະລັດມີຂຶ້ນບໍ່ດົນລຸນຫຼັງທີ່ໄດ້ມີການອອກຖະແຫຼງການພ້ອມໆກັນທີ່
ນະຄອນຫຼວງອິສລາມາບັດ ແລະນິວເດລີທີ່ກ່າວວ່າ ປະເທດຄູ່ປໍລະປັກນິວເຄລຍທັງສອງ
ໄດ້ຕົກລົງທີ່ຈະເປີດການສົນທະນາຫາລືກ່ຽວກັບທຸກໆບັນຫາຄືນໃໝ່ ຮວມທັງການຕໍ່ຕ້ານ
ພວກກໍ່ການຮ້າຍ ແລະແຄວ້ນແຄັສເມຍທີ່ເປັນບັນຫາຖົກຖຽງໂຕ້ແຍ້ງ.
ຖະແຫຼງການເວົ້າວ່າ ລັດຖະມົນຕີການຕ່າງປະເທດປາກິສຖານທ່ານ Shah Mehmood
Qureshi ຈະເດີນທາງໄປຍັງກຸງນິວເດລີພາຍໃນເດືອນກໍລະກົດເພື່ອພົບປະກັບຄູ່ຕຳແໜ່ງ
ຝ່າຍອິນເດຍທ່ານ S.M. Krisna ແລະທົບທວນເບິ່ງຄວາມກ້າວໜ້າໃນການເຈລະຈາຫາລື.
ນາຍົກລັດຖະມົນຕີປາກິສຖານ ທ່ານ Yousuf Raza Gilani ໄດ້ຊົມເຊີຍການປະກາດ
ດັ່ງກ່າວນີ້ ແລະຍົກຍ້ອງນາຍົກລັດຖະມົນຕີອິນເດຍ ທ່ານ Manmohan Singh ທີ່ເປີດ
ບົດຕອນໃໝ່ ກ່ຽວກັບຄວາມສຳພັນ ລະຫວ່າງປະເທດທັງສອງ.
ອິນເດຍ ໄດ້ໂຈະຂັ້ນຕອນການເຈລະຈາສັນຕິພາບໃນຂອບເຂດທີ່ກວ້າງຂວາງທີ່ໄດ້ດຳເນີນ
ມາເປັນເວລາເກືອບ 5 ປີໃນປີ 2008 ລຸນຫຼັງໄດ້ມີການໂຈມຕີທີ່ນະຄອນມູມໄບທີ່ເຮັດໃຫ້
ມີຜູ້ເສຍຊີີວິດຢ່າງນ້ອຍ 166 ຄົນນັ້ນ. ອິນເດຍໄດ້ຖິ້ມໂທດການບຸກໂຈມຕີແບບກ້າຕາຍທີ່
ວ່ານີ້ໃສ່ກຸ່ມຫົວຮຸນແຮງອິສລາມທີ່ມີຖານປະຕິບັດງານຢູ່ປາກິສຖານ.