ຫົວໜ້າໜ່ວຍສິ້ງຊອມ ນິວເຄລຍ ຂອງສະຫະປະຊາຊາດໄດ້ພົບປະກັບເຈົ້າໜ້າທີ່ຂອງ ອີຣ່ານ ໃນວັນພະຫັດມື້ນີ້ ໃນນະຄອນຫຼວງ ເທຣ່ານ ໃນຄວາມພະຍາຍາມຄັ້ງຫຼ້າສຸດເພື່ອແກ້ໄຂບັນຫາຄຳຖາມທີ່ຄ້າງຄາມາດົນນານ ກ່ຽວກັບໂຄງການນິເຄລຍຂອງປະເທດດັ່ງກ່າວ.
ຫົວໜ້າອົງການພະລັງງານ ປະລະມານູສາກົນ ຫຼື IAEA ທ່ານ Yukiya Amano ໄດ້ພົບປະເຈລະຈາກັບເລຂາທິການສະພາຄວາມປອດໄພສູງສຸດຂອງ ອິຣ່ານ ທ່ານ Ali Shamkhani, ແລະ ຍັງມີກຳນົດທີ່ຈະພົບປະກັບ ປະທະນາທິບໍດີ Hassan Rouhani ນຳດ້ວຍ.
ອົງການ IAEA ໄດ້ກ່າວວ່າ ບັນດາເຈົ້າໜ້າທີ່ແມ່ນມີກຳນົດທີ່ຈະ ປຶກສາຫາລື ວິທີເພື່ອຈະແກ້ໄຂ ບັນຫາທີ່ຍັງຄ້າງໃຫ້ໄວຂຶ້ນ, ລວມທັງ “ການຊີ້ແຈງກ່ຽວຄວາມເປັນໄປໄດ້ໃນທາງທະຫານ” ຂອງກິດຈະກຳ ນິວເຄລຍຂອງ ອີຣ່ານ.
ອີຣ່ານ ໄດ້ປະຕິເສດການເຮັດວຽກເພື່ອພັດທະນາອາວຸດ ນິວເຄລຍ ມາເປັນເວລາດົນນານແລ້ວ ແລະ ໄດ້ເວົ້າວ່າ ການກ່າວຫາແມ່ນກ່ຽວ ພັນກັບການສືບລັບທີ່ບໍ່ຖືກຕ້ອງຂອງ ສະຫະລັດ ແລະ ອິສຣາເອລ.
ອົງການ IAEA ໄດ້ພະຍາຍາມມາຫຼາຍປີ ເພື່ອຫາຄຳຕອບໃນການສືບສວນຂອງພວກເຂົາ, ລວມທັງການໃຫ້ບັນດາຜູ້ສັງເກດການຂອງ ສະຫະປະຊາຊາດ ໄປຢ້ຽມຢາມຄ້າຍທະຫານທີ່ Parchin, ແຕ່ຊ້ຳພັດຖືກ ຕໍ່ຕ້ານຈາກ ອີຣ່ານ.
ກອງປະຊຸມຫຼາຍຄັ້ງໃນນະຄອນຫຼວງ ເທຣ່ານ ມີຂຶ້ນໃນຂະນະທີ່ບັນດານັກເຈລະຈາຈາກ ອີຣ່ານ ແລະຂອງກຸ່ມພີ 5 ບວກນຶ່ງ ທີ່ປະກອບດ້ວຍ ອັງກິດ, ຈີນ, ຝຣັ່ງ, ຣັດເຊຍ, ສະຫະລັດ ແລະ ເຢຍຣະມັນ ເຮັດວຽກ ໃນນະຄອນຫຼວງ Vienna ເພື່ອໃຫ້ບັນລຸຂໍ້ຕົກລົງ ໃນຂອບເຂດທີ່ກວ້າງ ຂວາງ ທີ່ຈະຈຳກັດກິດຈະກຳ ນິວເຄລຍຂອງ ອີຣ່ານ ເພື່ອເປັນການແລກປ່ຽນກັບການບັນເທົາການລົງໂທດ.
ທັງສອງຝ່າຍໄດ້ເຫັນດີກ່ຽວກັບຂໍ້ຕົກລົງຂອງໂຄງຮ່າງໃນເດືອນ ເມສາ ທີ່ຜ່ານມາ ແລະ ຄວນທີ່ຈະບັນລຸການຕົກລົງຂັ້ນສຸດທ້າຍ ທັນກັບເສັ້ນຕາຍໃນວັນອັງຄານທີ່ຜ່ານມານີ້ ແຕ່ວ່າຍັງມີ ອຸບປະສັກຫຼາຍຢ່າງຄ້າງຄາ ເຊິ່ງພວກເຂົາໄດ້ຕັດສິນໃຈ ເລື່ອນເວລາອອກໄປ ຕື່ມອີກ. ຄວາມແຕກຕ່າງ ແມ່ນເຊື່ອວ່າ ຈະເປັນບັນຫາກ່ຽວກັບການເຂົ້າໄປກວດກາ ຂອງບັນດາຜູ້ສັງເກດການແລະຄວາມໄວທີ່ມາດຕະການລົງໂທດຕ່າງໆ ຈະໄດ້ຖືກຍົກເລີກ.
Your browser doesn’t support HTML5
Iran nuclear