ການໂຈມຕີທາງອາກາດ ໄດ້ສັງຫານ ພວກນັກຮົບລັດອິສລາມ ຢ່າງນ້ອຍ 250 ຄົນ ຢູ່ໃນອີຣັກ ອີງຕາມ ບັນດາເຈົ້າໜ້າທີ່ ຂອງ ອີຣັກ ແລະ ສະຫະລັດ ທີ່ໄດ້ລາຍງານໃຫ້ຊາບ ໃນວັນພະຫັດມື້ນີ້.
ການໂຈມຕີທາງອາກາດ ຕໍ່ຂະບວນລົດ ປະມານ 40 ຄັນຂອງກຸ່ມລັດອິສລາມ ມີຂຶ້ນຢູ່ທາງໃຕ້ເມືອງ Fallujah ໜ້ອຍນຶ່ງ ຊຶ່ງເຄີຍເປັນ ທີ່ໝັ້ນຂອງກຸ່ມ ລັດອິສລາມ ທີ່ໄດ້ຖືກປົດປ່ອຍ ໂດຍກອງກຳລັງປະສົມ ອີຣັກ ພາຍໃຕ້ການນຳພາໂດຍສະຫະລັດ ເມື່ອສັບປະດາແລ້ວນີ້.
ການໂຈມທາງອາກາດດັ່ງກ່າວນີ້ ເປັນຂີດໝາຍ ຂອງການໂຈມຕີຮ້າຍແຮງ ສຸດຕໍ່ພວກນັກຮົບລັດອິສລາມ ຫຼື ພວກຈີຫາດ ແຕ່ບັນດາເຈົ້າໜ້າທີ່ ເຕືອນວ່າ ເຖິງແມ່ນວ່າ ກຸ່ມດັ່ງກ່າວໄດ້ສູນເສຍດິນແດນຫຼາຍແຫ່ງກໍຕາມ ແຕ່ຂວັນຂອງ ພວກເຂົາເຈົ້າກໍປາກົດວ່າ ບໍ່ຖືກທຳລາຍເລີຍ.
ຂະນະດຽວກັນ ກອງກຳລັງຂອງຊີເຣຍ ກໍມີຄວາມຄືບໜ້າ ໃນສັບປະດານີ້ ໂດຍຍຶດເອົາເມືອງຕ່າງໆ ຢູ່ໃກ້ໆ ອີຣັກ ທີ່ຄວບຄຸມໂດຍກຸ່ມລັດອິສລາມ ຄືນ ມາໄດ້ ຊຶ່ງພວກເຂົາໄດ້ລຶບລ້າງເຂດແດນ ເຮັດໃຫ້ພວກນັກຮົບເພື່ອສາສະໜາ ມີຄວາມສະດວກ ໃນການຂົນສົ່ງ ແລະ ການປະສານງານງ່າຍຂຶ້ນ ໃນອັນທີ່ ກຸ່ມດັ່ງກ່າວ ໄດ້ປະກາດ ເປັນ “ລັດອິສລາມ ຫຼື caliphate” ຂອງທັງສອງ ປະເທດນັ້ນ.
ຫຼັງຈາກທີ່ໄດ້ປະສົບຜົນສຳເລັດ ໃນການຍຶດຄືນເອົາເມືອງ Fallujah ຂອງ ກຳລັງປະສົມ ເປັນເວລານຶ່ງເດືອນແລ້ວ ກອງກຳລັງຂອງອີຣັກ ຈະເລີ້ມລົງມື ເພື່ອຍຶດເອົາເມືອງ Mosul ຊຶ່ງເປັນເມືອງໃຫຍ່ອັນດັບສອງຂອງອີຣັກ ຄືນມາ ຈາກການຄວບຄຸມຂອງພວກນັກຮົບຈີຫາດ.
ໃນໄລຍະຫຼາຍສັບປະດາຜ່ານມານີ້ ບັນດາເຈົ້າໜ້າທີ່ສືບລັບ ສະຫະລັດ ໄດ້ ອະທິບາຍເຖິງ ກຸ່ມລັດອິສລາມ ວ່າແມ່ນ “ຢູ່ໃນຈຸດອ່ອນແອທີ່ສຸດ ຕັ້ງແຕ່ໄດ້ມີການຂະຫຍາຍຕົວຢ່າງວ່ອງໄວ ຂອງພວກເຂົາເຈົ້າ.”
ແຕ່ບັນດາຜູ້ບັນຊາການທະຫານຊາວເຄີດໃນອີກຣັກ ເຕືອນວ່າ ເມືອງ Mosul ຈະເປັນບ່ອນທີ່ມີການຕໍ່ສູ້ທີ່ຫຍຸ້ງຍາກກວ່າເກົ່າຫຼາຍ ຊຶ່ງຈະຕ້ອງມີການຕົກລົງ ກັນທາງດ້ານການເມືອງ ແລະ ການທະຫານ ລະ ຫວ່າງທຸກພັກຝ່າຍທີ່ກ່ຽວຂ້ອງ.
ອ່ານຂ່າວນີ້ຕື່ມ ເປັນພາສາອັງກິດ
Your browser doesn’t support HTML5
IS Falluja