ຜູ້ນຳນັກສຶກສາ Hong Kong 3 ຄົນ ໄດ້ຖືກພົບເຫັນວ່າ ມີຄວາມຜິດ ຍ້ອນເຂົ້າຮ່ວມ ໃນການປະທ້ວງ ທີ່ນຳໄປສູ່ການເດີນຂະບວນຄັ້ງໃຫຍ່ເພື່ອປະຊາທິປະໄຕ ເມື່ອເກືອບ ສອງປີຜ່ານມາແລ້ວນັ້ນ.
ທ້າວ Joshua Wong ແລະ ທ້າວ Alex Chow ໄດ້ຖືກພົບເຫັນວ່າມີຄວາມຜິດ ໃນວັນ ພະຫັດມື້ນີ້ ຖານເຂົ້າຮ່ວມໃນການໂຮມຊຸມນຸມທີ່ຜິດກົດໝາຍ ໃນຂະນະດຽວກັນ ທ້າວ Nathan Law ໄດ້ຖືກພົບເຫັນວ່າມີຄວາມຜິດຜິດ ຖານຍຸຍົງໃຫ້ຜູ້ອື່ນ ເຂົ້າຮ່ວມນຳ. ທັງສາມຄົນມີກຳນົດຈະກັບຄືນມາສານ ໃນວັນທີ 15 ສິງຫາ ເພື່ອການຕັດສິນລົງໂທດ.
ບຸກຄົນທັງສາມ ໄດ້ປີນຮົ້ວ ຕຶກໂຮງການລັດຖະບານ Hong Kong ເມື່ອວັນທີ 26 ກັນຍາ ປີ 2014 ແລະ ໄດ້ຈັດການປະທ້ວງ ຢູ່ທີ່ເດີ່ນສະໜາມ ຈະຕຸລັດຂອງພົນລະເຮືອນ ເພື່ອ ຮຽກຮ້ອງ ໃຫ້ມີການເລືອກຕັ້ງທີ່ເສລີ ແລະ ຄົບຖ້ວນ ສຳລັບ ເຂດເຄິ່ງປົກຄອງຕົນເອງ ຮົງກົງ ຂອງຈີນ.
ການເຄື່ອນໄຫວດັ່ງກ່າວ ແມ່ນການນັ່ງປະທ້ວງຢູ່ຕາມຖະໜົນຫົນທາງທີ່ສຳຄັນໆ ຂອງ Hong Kong ທີ່ໄດ້ເຮັດໃຫ້ຂົງເຂດນັ້ນ ຕົກຢູ່ໃນສະ ພາບບໍ່ໄປບໍ່ມາ ເປັນເວລາ 79 ມື້.
ພວກນິຍົມປະຊາທິປະໄຕ ຢູ່ໃນ Hong Kong ແມ່ນກຳລັງມີຄວາມຮູ້ສຶກເປັນຫ່ວງ ຫຼາຍຂຶ້ນ ທີ່ປັກກິງກຳລັງເຄື່ອນໄຫວ ເພື່ອຈະຕັດຮອນສິດເສລີພາບຂອງພົນລະເຮືອນ ໃນຂົງເຂດ ທີ່ມີຢູ່ແລ້ວນັ້ນ ນັບແຕ່ອັງກິດໄດ້ມອບໂອນການຄວບຄຸມ Hong Kong ຄືນໃຫ້ແກ່ຈີນ ໃນປີ 1997.
ອ່ານຂ່າວນີ້ຕື່ມ ເປັນພາສາອັງກິດ
Your browser doesn’t support HTML5
Hong Kong Protest Verdict