ມີຜູ້ເສຍຊີວິດ 9 ຄົນ ແລະອີກ 6 ຄົນຫາຍສາບສູນ ລຸນຫຼັງຝົນທີ່ຕົກລົງມາຢ່າງໜັກເປັນປະຫວັດການ ຢູ່ໃນຂົງເຂດຊົນນະບົດຂອງແຂວງກວາງຕຸ້ງ ທີ່ຕັ້ງຢູ່ບໍລິເວນພາກໃຕ້ຂອງຈີນ, ໃນຂະນະທີ່ບັນດາເຈົ້າໜ້າທີ່ໄດ້ອອກມາເຕືອນໃນວັນສຸກມື້ນີ້ວ່າ ຈະເກີດໄພນ້ຳຖ້ວມຕື່ມອີກ ໃນຂົງເຂດອື່ນໆຂອງປະເທດ, ອີງຕາມລາຍງານຂອງອົງການຂ່າວ AP.
4 ຄົນເສຍຊີວິດ ແລະອີກ 4 ຄົນຫາຍສາບສູນ ຢູ່ບໍລິເວນເມືອງເໝີຍຊຽນ (Meixian), ແລະເມືອງເໝີຍຊູ (Meizhou) ຂອງແຂວງກວາງຕຸ້ງ, ອີງຕາມຜູ້ປະກາດຂ່າວຂອງອົງການຂ່າວ CCTV ຂອງທາງການ ທີ່ໄດ້ລາຍງານ ໃນຕອນຄ່ຳຂອງວັນພະຫັດວານນີ້. ສ່ວນອີກ 5 ຄົນເສຍຊີວິດຢູ່ໃນເມືອງຈຽວຫຼິງ (Jiaoling) ເຊິ່ງເກີດຂຶ້ນຢູ່ໃນບໍລິເວນເມືອງ ເໝີຍຊູ ເຊັ່ນກັນ.
ຝົນທີ່ຕົກລົງມາຢ່າງໜັກ ແມ່ນເລີ້ມຂຶ້ນຕັ້ງແຕ່ວັນອາທິດ ຫາວັນອັງຄານແລ້ວນີ້, ອັນໄດ້ເຮັດໃຫ້ຕົ້ນໄມ້ຫັກລົ້ມ ແລະບ້ານເຮືອນຫຼາຍຫຼັງພັງລົງມາ. ຖະໜົນທີ່ເໜັ່ງໄປຫາຂົງເຂດເໝີຍຊຽນໂດຍກົງ ແມ່ນຖືກຕັດຂາດຢ່າງສິ້ນເຊີງ ເນື່ອງຈາກຝົນທີ່ຕົກລົງມາຢ່າງໜັກ. ແມ່ນ້ຳຊົງຢວນ (Songyuan) ທີ່ໄຫຼຄົດໂຄ້ງຜ່ານເມືອງເໝີຍຊູ ກໍໄດ້ປະສົບກັບໄພນໍ້າຖ້ວມຄັ້ງໃຫຍ່ທີ່ສຸດເປັນປະຫວັດການຂອງຕົນ, ອີງຕາມອົງການຂ່າວ CCTV.
ມີການຄາດຄະເນເຖິງຄວາມສູນເສຍທາງເສດຖະກິດໂດຍກົງ ຄິດເປັນມູນຄ່າ 3.65 ຕື້ຢວນ ຫຼື 502 ລ້ານໂດລາ ຢູ່ບໍລິເວນຂົງເຂດຈຽວຫຼິງ, ໃນຂະນະທີ່ເມືອງເໝີຍຊຽນ ກໍສູນເສຍຢ່າງໜັກເຊັ່ນກັນ ຄິດເປັນມູນຄ່າ 1.06 ຕື້ຢວນ ຫຼື 146 ລ້ານໂດລາ.
ພາກສ່ວນອື່ນໆຂອງປະເທດ ກໍປະເຊີນກັບຝົນທີ່ຕົກລົງມາຢ່າງໜັກໜ່ວງ ແລະສະພາບອາກາດທີ່ຮ້າຍແຮງໃນອີກ 24 ຊົ່ວໂມງຕໍ່ໜ້າເຊັ່ນກັນ, ໂດຍສູນອຸຕຸນິຍົມວິທະຍາແຫ່ງຊາດ ໄດ້ອອກຄຳເຕືອນຕໍ່ຫຼາຍແຂວງທີ່ຕັ້ງຢູ່ທາງພາກໃຕ້ ແລະບາງຂົງເຂດຢູ່ບໍລິເວນພາກເໜືອຂອງປະເທດ.
ຕາມການພະຍາກອນອາກາດ ໄດ້ໃຫ້ຮູ້ວ່າ ແຂວງເຫີໜານ (Henan) ແລະແຂວງອັນຫຸຍ (Anhui) ທີ່ຕັ້ງຢູ່ໃນພາກກາງຂອງຈີນ, ເຊັ່ນດຽວກັບແຂວງຈຽງຊູ (Jiangsu) ທີ່ຕັ້ງຢູ່ບໍລິເວນຊາຍຝັ່ງທະເລ ພ້ອມທັງແຂວງກຸຍຊູ (Guizhou) ທີ່ຕັ້ງຢູ່ທາງພາກໃຕ້ຂອງປະເທດ ລ້ວນແຕ່ຄາດວ່າ ຈະມີໝາກເຫັບຕົກ ແລະອາດມີລົມພັດທີ່ຮຸນແຮງ. ສູນອຸຕຸນິຍົມວິທະຍາແຫ່ງຊາດກ່າວວ່າ ປະລິມານນ້ຳຝົນທີ່ອາດຕົກລົງມາ ສູງຮອດ 50 ມິນລີແມັດ ຫາ 80 ມິນລີແມັດພາຍໃນມື້ດຽວຢູ່ໃນແຂວງເຫີໜານ, ອັນຫຸຍ ແລະແຂວງ ຫູເປີຍ.
ໃນອາທິດແລ້ວນີ້, ແຂວງ ຟູຈຽນ ແລະ ແຂວງ ກວາງຊີ ທີ່ຕັ້ງຢູ່ບໍລິເວນພາກໃຕ້ຂອງປະເທດ ກໍປະສົບກັບໄພດິນເຈື່ອນ ແລະສະຖານະການນ້ຳຖ້ວມທ່າມກາງຝົນທີ່ຕົກລົງມາຢ່າງໜັກ. ມີນັກສຶກສາຄົນນຶ່ງເສຍຊີວິດຢູ່ໃນແຂວງກວາງຊີ ລຸນຫຼັງທີ່ລາວຕົກລົງໄປໃນແມ່ນ້ຳທີ່ຖ້ວມລົ້ນຂຶ້ນຈາກຝົນທີ່ຕົກລົງມາຢ່າງໜັກ.