ຫຼັງຈາກການເຈລະຈາແບບ ມາລາທອນ ຫຼາຍມື້, ບັນດາຜູ້ນຳ ຢູໂຣບ ໄດ້ປະກາດຂໍ້ຕົກລົງຊົ່ວຄາວ ໃນວັນຈັນທີ່ຜ່ານມານີ້ ເພື່ອສະໜອງການຊ່ວຍກອບກູ້ເສດຖະກິດອີກຄັ້ງໜຶ່ງໃຫ້ແກ່ ກຣິສ, ເຊິ່ງເປັນຄັ້ງທີສາມໃນຫ້າປີ ແລະ ເປັນການຮັບປະກັນວ່າ ກຣິສ ຍັງຄົງເປັນສະມາຊິກຂອງກຸ່ມ 19 ປະເທດທີ່ໃຊ້ສະກຸນເງິນ ຢູໂຣ. ແຕ່ເຖິງແມ່ນວ່າຈະເປັນການລ່ວງອົກລວ່ງໃຈໃນ ຢູໂຣບ ແລະ ຕະຫຼາດການເງິນກໍຕາມ, ບັນດາຜູ້ຊ່ຽວຊານກ່າວວ່າ ພາກສ່ວນທີ່ຫຍຸ້ງຍາກແມ່ນໄດ້ເລີ່ມຂຶ້ນແລ້ວ.
Mil Arcega ມີລາຍງານເລື່ອງນີ້ ເຊິ່ງ ພຸດທະສອນ ຈະນຳລາຍລະອຽດມາສະເໜີທ່ານ.
Your browser doesn’t support HTML5
ຟັງລາຍງານ ກຣິສ ຍັງຢູ່ລອດໃນເຂດ ສະກຸນເງິນ ຢູໂຣ ແຕ່ຈະປະສົບບັນຫາ ທ້າທາຍຫຼາຍຢ່າງ.
ເມື່ອພິຈາລະນາຈາກການສະໜອງຕອບຂອງບັນດາຕະຫຼາດການເງິນຕ່າງໆ ຂໍ້ຕົກລົງແມ່ນໄດ້ບັນລຸໄປແລ້ວ. ການຊ່ວຍກອບກູ້ເສດຖະ ກິດຄັ້ງທີສາມສຳລັບ ກຣິສ ມີມູນຄ່າເກືອບ 90 ຕື້ຢູໂຣ. ແຕ່ວ່າບັນດາສະມາຊິກສະພານິຕິບັນຍັດກຣີສ ຍັງບໍ່ໄດ້ໃຫ້ສັດຕະຍາບັນຕໍ່ເງື່ອນໄຂຕ່າງໆ ເຊິ່ງລວມມີການຕັດການໃຊ້ຈ່າຍຕ່າງໆ, ຂຶ້ນພາສີ ແລະ ການໂອນກິດຈະການຕ່າງໆຂອງລັດໄປໃຫ້ເອກະຊົນ.
ສາດສະດາຈານ ວິຊາເສດຖະສາດນາໆຊາດ ຂອງມະຫາວິທະຍາໄລ Johns Hopkins ທ່ານ Cristino Arroyo ກ່າວຕໍ່ວີໂອເອຜ່ານທາງ Skype ວ່າ ນັ້ນແມ່ນພາກສ່ວນທີ່ຍັງງ່າຍຢູ່.
ທ່ານ Arroyo ເວົ້າວ່າ “ພາກສ່ວນທີ່ຍາກແທ້ໆ ແມ່ນພວກເຂົາຈະ ຕ້ອງເຮັດ, ນອກຈາກບັງຄັບໃຫ້ປະຕິຮູບແລ້ວ, ພວກເຂົາກໍຈະຕ້ອງຊອກຫາວິທີໃຫ້ມີການເຕີບໂຕຕໍ່ໄປ ແລະ ນັ້ນກໍແມ່ນສິ່ງທ້າທາຍຕົວຈິງ.”
ເຖິງແມ່ນວ່າ ສະພາແຫ່ງຊາດຂອງ ກຣິສ ໃຫ້ສັດຕະຍາບັນຕໍ່ຂໍ້ຕົກລົງ ດັ່ງກ່າວ, ມັນກໍຍັງຈະເປັນການປີນພູເຂົາອັນສູງຊັນ ສຳລັບປະເທດທີ່ຍັງພະຍາຍາມສູ້ຊົນເພື່ອໃຫ້ຕົນເອງຫຼຸດອອກຈາກ ສະພາບເສດຖະກິດ ຕົກຕ່ຳອັນເລິກເຊິ່ງ. ນັກວິເຄາະຕະຫຼາດຫຼັກຊັບ ທ່ານ Mike Ingram ຈາກບໍລິສັດ BGC ກ່າວວ່າ ການຕັດລາຍຈ່າຍເພີ່ມຂຶ້ນ ແມ່ນບໍ່ໜ້າເປັນໄປໄດ້ວ່າ ການຜະລິດຈະພຽງພໍຕໍ່ການເຕີບໂຕ ເພື່ອຫຼຸດຜ່ອນໜີ້ສິນທີ່ຂະຫຍາຍຕົວອອກຢ່າງໄວວາຂອງ ກຣິສ.
ທ່ານ Ingram ເວົ້າວ່າ “ພວກເຮົາຈະໄດ້ເຫັນການຕັດການໃຊ້ຈ່າຍລົງຕື່ມອີກໃນພາກສ່ວນສາທາລະນະ. ແລະ ການປະຢັດມັດທະຍັດ ໂດຍທົ່ວໄປທີ່ຂາດລາຍລະອຽດຕື່ມອີກ ຊຶ່ງບາງທີອາດຄົງຈະໄດ້ເຫັນ ກັນຕະຫຼອດໄປນັ້ນ.”
ຖ້າປາສະຈາກການວາງແຜນເພື່ອພັດທະນາເສດຖະກິດທີ່ຂາດແຄນເງິນຂອງ ກຣິສ ໃຫ້ ເຕີບໂຕນັ້ນ, ທ່ານ Robert Kahn ນັກເສດຖະສາດ ທີ່ສະພາການພົວພັນສາກົນ ກ່າວວ່າ ການຊ່ວຍກອບກູ້ເສດຖະກິດຄັ້ງຫຼ້າສຸດນີ້ແມ່ນເປັນພຽງຜ້າພັນບາດຊື່ໆ.
ທ່ານ Kahn ກ່າວວ່າ “ເຖິງແມ່ນວ່າ ພວກເຮົາຈະໄດ້ບັນລຸຂໍ້ຕົກລົງ ກັນແລ້ວກໍຕາມ, ແຕ່ຄວາມຢ້ານກົວຂອງຂ້າພະເຈົ້າກໍແມ່ນວ່າ ມັນຈະເປັນຄວາມພະຍາຍາມຫຼາຍຂຶ້ນແທ້ໆເພື່ອປະເຊີນໜ້າກັບບັນຫາທີ່ຫຍຸ້ງ ຍາກຕາມພາຍຫຼັງ ແລະເລື່ອນເວລາເປັນການຊົ່ວຄາວ, ແທນທີ່ຈະຕັ້ງ ນະໂຍບາຍເພື່ອເຮັດໃຫ້ການເຕີບໂຕກັບຄືນມາສູ່ ກຣິສ.”
ຜູ້ໃຫ້ກູ້ຢືມເງິນລາຍໃຫຍ່ທີ່ສຸດໃຫ້ແກ່ ກຣິສ,ປະເທດ ເຢຍຣະມັນ ເຊິ່ງຖືກວິພາກວິຈານຍ້ອນໄດ້ສະເໜີໃຫ້ຕັດການໃຊ້ຈ່າຍລົງຕື່ມອີກເພື່ອ
ແລກປ່ຽນກັບການຊ່ວຍກອບກູ້ເສດຖະກິດ ກ່າວວ່າ ເງື່ອນໄຂນັ້ນອາດມີຊ່ອງທາງສຳລັບການຜ່ອນສັ້ນຜ່ອນຍາວໄດ້.
ທ່ານ ນາງ Angela Merkel ເວົ້າວ່າ “ກຸ່ມປະເທດສະກຸນເງິນຢູໂຣແມ່ນກຽມພ້ອມແລ້ວ ຖ້າຈຳເປັນ ຈະຕໍ່ເວລາ ໃນການບໍ່ໃຫ້ຈ່າຍດອກ ເບ້ຍແລະເງິນຕົ້ນ ອອກໄປຕື່ມ ແລະ ກຳນົດການຊຳລະເງິນກູ້ທີ່ຍາວ ຂຶ້ນອີກ. ພວກເຮົາໄດ້ປຶກກັນກ່ຽວກັບບັນຫານີ້ແລ້ວ ຫຼັງຈາກປະສົບຜົນສຳເລັດໃນການທົບທວນໂຄງການໃໝ່ຂອງ ກຣິສ ຄັ້ງທຳອິດ.”
ໃນຂະນະທີ່ບັນດາທະນາຄານຂອງ ກຣິສ ຍັງປິດຢູ່ໃນອາທິດນີ້, ລັດຖະມົນຕີການເງິນບາງຄົນກໍໄດ້ສະແດງຄວາມຜ່ອນຄາຍອອກວ່າ ການເຈລະຈາຫຼາຍຄັ້ງໄດ້ປ້ອງກັນບໍ່ໃຫ້ ກຣິສ ເຊິ່ງມີໂອກາດອອກຈາກການເປັນສະມາຊິກເຂດໃຊ້ເງິນສະກຸນຢູໂຣ ໃນຕອນນີ້. ບາງຄົນກ່າວວ່າ ສິ່ງທ້າທາຍໃຫຍ່ທີ່ຈະມາໃນສອງສາມທິດນີ້ ແມ່ນວິທີທີ່ຈະສ້າງຄືນຄວາມເຊື່ອຖື ລະຫວ່າງ Athens ແລະ 18 ປະເທດອື່ນໆທີ່ໄດ້ສ້າງຕັ້ງເຂດສະກຸນເງິນຢູໂຣ ຂຶ້ນມາ.