ກອງປະຊຸມສຸດຍອດດ້ານສະພາບອາກາດ COP29 ຈະເລີ້ມຂຶ້ນໃນວັນຈັນມື້ນີ້ທີ່ນະຄອນຫຼວງ ບາກູ, ປະເທດ ອາເຊີໄບຈານ. ຊຶ່ງເປັນປະເທດທີ່ເສດຖະກິດສ່ວນໃຫຍ່ຂຶ້ນຢູ່ກັບການຂາຍນໍ້າມັນເຊື້ອໄຟຟອສຊິວ. ຜູ້ນຳໂລກ ແລະຜູ້ແທນຫຼາຍພັນຄົນຈະພະຍາຍາມເຈລະຈາຫາວິທີຫຼຸດການປ່ອຍແກ໊ສເຮືອນແກ້ວເປັນເວລາ 12 ວັນ, ທ່າມກາງຄໍາເຕືອນວ່າຄວາມພະຍາຍາມຄວບຄຸມພາວະໂລກຮ້ອນນັ້ນຄາດເຄື່ອນໄປໄກຫຼາຍ. ແຮນຣີ ຣິຈແວລ ມີລາຍງານ, ເຊິ່ງພວກເຮົາຈະນຳລາຍລະອຽດມາສະເໜີທ່ານໃນອັນດັບຕໍ່ໄປ.
ປີ 2024 ອາດຈະເປັນປີທີ່ຮ້ອນທີ່ສຸດເທົ່າທີ່ເຄີຍບັນທຶກມາ ຊຶ່ງເກີນຂີດໝາຍສຳຄັນ.
ທ່ານ ຄາໂລ ບວນເທັມໂປ ຈາກອົງການສະໜອງຂໍ້ມູນສະພາອາກາດປ່ຽນແປງ ໂຄປີມີກັສ ກ່າວວ່າ
“ເປັນປະຕິທິນປີທຳອິດທີ່ມີອຸນຫະພູມສູງກວ່າເກນສຳຄັນທາງຈິດຕະວິທະຍາທີ່ 1.5 ອົງສາເຊວຊຽສ ເໜືອຍຸກກ່ອນອຸດສະຫະກໍາ. ການຮັກສາອຸນຫະພູມໂລກບໍ່ໃຫ້ເກີນ 1.5 ອົງເຊວຊຽສເປັນເປົ້າໝາຍສຳຄັນຂອງຂໍ້ຕົກລົງປາຣີປີ 2015.”
ທ່ານນາງ ຣຸດ ທາວເນັນ, ຈາກສະຖາບັນ ຊາແທັມ ຮາວສ໌ ກ່າວວ່າ
“ເມື່ອພວກເຮົາຜ່ານເກນບາງຢ່າງໄປແລ້ວ, ພວກເຮົາກໍອາດກໍ່ໃຫ້ເກີດຜົນກະທົບຕໍ່ສະພາບອາກາດທີ່ອາດບໍ່ສາມາດຢ້ອນກັບມາຄືນໄດ້.”
ຈາກແນວໂນ້ມໃນປັດຈຸບັນສະຫະປະຊາຊາດໄດ້ກ່າວວ່າ ໂລກກຳລັງມຸ່ງໜ້າສູ່ພາວະໂລກຮ້ອນປະມານ 3 ອົງສາເຊວຊຽສ ພາຍໃນໝົດສັດຕະວັດນີ້ ສົ່ງຜົນໃຫ້ເກີດຄື້ນຄວາມຮ້ອນທີ່ຮ້ອນຂຶ້ນ, ໄພແຫ້ງແລ້ງທີ່ຮຸນແຮງຂຶ້ນ, ພາຍຸທີ່ຮຸນແຮງຂຶ້ນ ແລະອື່ນໆ.
ທ່ານ ແອນໂຕນີໂອ ກູເນເຣັສ, ເລຂາທິການໃຫຍ່ສະຫະປະຊາຊາດກ່າວວ່າ
“ການປ່ອຍແກ໊ສເຮືອນແກ້ວປະຈຳປີ (ຢູ່ທີ່) ສູງເປັນປະວັດການ ໂດຍເພີ້ມຂຶ້ນ 1,3 % ເມື່ອປີທີ່ຜ່ານມາ.”
ນີ້ຄືສາກຫຼັງສຳລັບກອງປະຊຸມສຸດຍອດດ້ານສະພາບອາກາດ COP29 ເປັນເວລາສອງອາທິດທີ່ນະຄອນຫຼວງ ບາກູ, ປະເທດອາເຊີໄບຈານ ຊຶ່ງຈະເປີດຂຶ້ນໃນຈັນນີ້ມື້ນີ້.
ສ່ວນສຳຄັນຂອງກອງປະຊຸມໃນປີນີ້ແມ່ນການຈັດຫາເງິນທຶນເພື່ອຮັບມືກັບສະພາບອາກາດ ຊຶ່ງປະເທດທີ່ລໍ້າລວຍກວ່າຈະຊ່ວຍຈ່າຍເງິນໃຫ້ປະເທດທີ່ທຸກຍາກກວ່າເພື່ອຫຼຸດຄວັນພິດ ແລະປັບຕົວໃຫ້ເຂົ້າກັບການປ່ຽນແປງຂອງສະພາບອາກາດໄດ້ແນວໃດ.
ທ່ານນາງ ຣຸດ ທາວເນັນ:
“ຖ້າບໍ່ມີການຕັດສິນໃຈທີ່ສາມາດນຳໄປສູ່ອີກສິ່ງນຶ່ງ, ທຸກສີ່ງທຸກຢ່າງກໍຈະພັງລົງ.”
ອາເຊີໄບຈານ ເປັນຜູ້ຜະລິດນໍ້າມັນ ແລະ ແກ໊ສລາຍໃຫຍ່ ຊຶ່ງເປັນເຊື້ອໄຟຟອສຊິວທີ່ຊ່ວຍຂັບເຄື່ອນການປ່ຽນແປງສະພາບອາກາດ.
ທ່ານນາງ ຣຸດ ທາວເອັນ:
“ເຂົາເຈົ້າຍັງເປັນປະເທດທີ່ມີຄວາມສ່ຽງທາງດ້ານສະພາບອາກາດອີກດ້ວຍ, ດັ່ງນັ້ນເຂົາເຈົ້າຈຶ່ງເອົານໍ້າປະມານ 50 ຫາ 70% ຈາກບໍລິເວນຊາຍແດນ ແລະນອກຊາຍແດນຂອງເຂົາເຈົ້າ. ດັ່ງນັ້ນ, ຈຶ່ງເປັນເລື່ອງຍາກໃນການດຳເນີນການ ແລະປ່ຽນຜ່ານສະພາບອາກາດ. ແລະຍ້ອນເຊັ່ນນັັ້ນ, ເຂົາເຈົ້າຈຶ່ງມີຄວາມສົນໃຈຢ່າງຍິ່ງທີ່ຈະຈັດຫາເງິນທຶນ ເພື່ອຊ່ວຍເຫຼືອປະເທດກຳລັງພັດທະນາຢ່າງປະເທດຂອງຕົນເອງໃນການຫາແນວທາງທີ່ເໝາະສົມໃນອານາຄົດ.”
ໃນຂະນະທີ່ກອງປະຊຸມສຸດຍອດໃກ້ຈະເກີດຂຶ້ນ - ທ່ານ ດໍໂນລ ທຣຳ ແມ່ນໄດ້ຮັບໄຊຊະນະໃນການເລືອກຕັ້ງປະທານາທິບໍດີສະຫະລັດ. ທ່ານອາດດຶງສະຫະລັດ ອອກຈາກຂໍ້ຕົກລົງ ປາຣີ ອີກເທື່ອນຶ່ງ ທີ່ຕັ້ງເປົ້າໝາຍດ້ານສະພາບອາກາດ. ນອກຈາກນີ້ຍັງມີຄວາມຢ້ານກົວກັບສົງການຄ້າກັບຈີນອີກດ້ວຍ.
ທ່ານນາງ ຣຸດ ທາວເນັນ:
“ພວກເຮົາບໍ່ໜ້າຈະກ້າວໄປສູ່ໂລກທີ່ໝັ້ນຄົງຫຼາຍຂຶ້ນ ຍ້ອນຜົນກະທົບຈາກດິນຟ້າອາກາດທີ່ເພີ້ມຂຶ້ນ. ດັ່ງນັ້ນ, ພວກເຮົາຈຳເປັນຕ້ອງຮຽນຮູ້ທີ່ຈະຈັດການພາຍໃຕ້ເງື່ອນໄຂຂອງຄວາມບໍ່ໝັ້ນຄົງທາງພູມສາດການເມືອງ ຊຶ່ງຈະເພີ້ມຫຼາຍຂຶ້ນໃນອານາຄົດ.”
ບັນດານັກວິທະຍາສາດກ່າວວ່າຈາກໄຟໄໝ້ປ່າທີ່ ຄາລີຟຊເນຍ ໄປຈົນເຖິງອຸທຸກກະໄພຮ້າຍແຮງໃນເມືອງ ວາເລັນເຊຍ, ປະເທດ ສເປນ, ການປ່ຽນແປງສະພາບອາກາດເປັນຕົວການເຮັດໃຫ້ເກີດສະພາບອາກາດຮ້າຍແຮງ ແລະຫາກບໍ່ມີການດຳເນີນການຢ່າງຮີບດ່ວນສະພາບອາກາດອາດຈະຮ້າຍແຮງລົງຫຼາຍກວ່ານີ້.