ຍັງອີກອາທິດດຽວເທົ່ານັ້ນ ກໍຈະມີການເລືອກຕັ້ງກາງສະໄໝແລ້ວ. ໃນລັດຈໍເຈຍ ກໍມີການເລືອກເອົາຜູ້ປົກຄອງລັດແລະສະມາຊິກສະພາສູງ. ສຳລັບການເລືອກຕັ້ງເອົາສະມາຊິກສະພາສູງນັ້ນ ທ່ານເຮີສແຊລ ວອກເກີ (Herschel Walker) ສັງກັດພັກຣພັບບລິກັນ ກຳລັງແຂ່ງກັບ ທ່ານຣັຟຟະແອລ ວໍນາກ (Raphael) Warnock, ສັງກັດພັກເດໂມແຄຣັດທີ່ດຳລົງຕຳແໜ່ງຢູ່ໃນປັດຈຸບັນ. ດາວມະໄລທອງ, ຄົນລາວອາເມຣິກັນທີ່ເປັນນັກທຸລະກິດການເປັນນາຍ ໜ້າຂາຍ ແລະຊື້ເຮືອນໃນນະຄອນແອັດແລນຕາ ແລະມີລູກສາວສອງຄົນນັ້ນ ຢາກໃຫ້ມີການສືບຕໍ່ຂະຫຍາຍກົດໝາຍດູແລສຸຂະພາບທີ່ມີລາຄາຖືກ, ສົ່ງເສີມການສຶກສາ ແລະສິດຂອງແມ່ຍິງໃນການເຮັດແທ້ງລູກ ສະນັ້ນ ນາງຈຶ່ງເລືອກເອົາທ່ານ ວໍນາກ ດັ່ງທີ່ນາງເວົ້າກັບວີໂອເອວ່າ:
Your browser doesn’t support HTML5
ສຽງຂອງນາງ ດາວ ມະໄລທອງເວົ້າກ່ຽວກັບການເລືອກຕັ້ງກາງສະໄໝໃນລັດຈໍເຈຍ
ຈໍເຈຍ ເປັນລັດທີ່ມີການແຂ່ງຂັນທີ່ດຸເດືອດ ແລະໜ້າຈັບຕາເບິ່ງຫລາຍ ໃນການເລືອກຕັ້ງກາງສະໄໝນີ້ ເພາະວ່າໃນການເລືອກຕັ້ງປະທານາທິບໍດີຄັ້ງແລ້ວນີ້ ໃນປີ 2020 ທ່ານໄບເດັນຈາກພັກເດໂມແຄຣັດ ໄດ້ຊະນະອະດີດປະທານາທິບໍດີດໍໂນລ ທຣຳ ໂດຍຄະແນນສູສີກັນ ແລະກ່ອນໜ້ານັ້ນ ຈໍເຈຍກໍເປັນລັດທີ່ ເລືອກເອົາປະທານາທິບໍດີ ຈາກພັກຣິພັບບລິກັນເປັນເວລານານກວ່າ 10 ປີ. ແຕ່ການຢັ່ງຫາສຽງເມື່ອມໍ່ໆມານີ້ ໂດຍມະຫາວິທະຍາໄລ Quinnipiac ສະແດງໃຫ້ເຫັນວ່າ ທ່ານວໍນາກ ມີຄະແນນນຳໜ້າທ່ານວອກເກີ 52 ເປີເຊັນ ຕໍ່ 45 ເປີເຊັນ ຊຶ່ງເຮັດໃຫ້ທ່ານວໍນາກຈາກພັກເດໂມແຄຣັດມີຄວາມຫວັງສູງ ທີ່ຈະຊະນະ.