ທາງການນະຄອນຫຼວງວຽງຈັນ ຄາດຫມາຍວ່າເສດຖະກິດໂດຍລວມໃນປີ 2024 ນີ້ຈະຂະຫຍາຍຕົວໃນອັດຕາສະເລ່ຍ 5.7% ໂດຍມີມູນຄ່າລວມ 76,719.14 ຕື້ກີບ ທີ່ຄິດເປັນລາຍໄດ້ສະເລ່ຍຂອງປະຊາຊົນທີ່ລະດັບ 75.28 ລ້ານກີບ.
Your browser doesn’t support HTML5
ທາງການນະຄອນຫຼວງວຽງຈັນ ຄາດໝາຍວ່າເສດຖະກິດໂດຍລວມ ໃນປີ 2024 ນີ້ຈະຂະຫຍາຍຕົວໃນອັດຕາສະເລ່ຍ 5.7 ເປີເຊັນ
ສະມາຊິກສະພາປະຊາຊົນນະຄອນຫຼວງວຽງຈັນ ໃຫ້ທັດສະນະວ່າສະພາບເສດຖະກິດໃນເຂດນະຄອນຫຼວງວຽງຈັນ ໄດ້ປັບຕົວດີຂື້ນຢ່າງຕໍ່ເນື່ອງໃນໄລຍະ 10 ເດືອນທີ່ຜ່ານມາ ແລະ ໝັ້ນໃຈວ່າຈະກັບຄືນສູ່ສະພາວະປົກກະຕິໃນທ້າຍປີ 2024 ນີ້ ທັ້ງຢັງຄາດວ່າເສດຖະກິດຈະຂະຫຍາຍຕົວໃນອັດຕາສະເລ່ຍ 5.7% ທຽບໃສ່ປີ 2023 ເຊິ່ງຈະເຮັດໃຫ້ຜະລິດຕະພັນພາຍໃນ (GDP) ຂອງນະຄອນຫຼວງວຽງຈັນມີມູນຄ່າລວມ 76,719.14 ຕື້ກີບທີ່ຄິດເປັນລາຍໄດ້ສະເລ່ຍຂອງປະຊາຊົນໃນເຂດນະຄອນຫຼວງວຽງຈັນໄດ້ທີ່ລະດັບ 75.28 ລ້ານກີບຕໍ່ຄົນຕໍ່ປີ ຫຼື 3,425 ໂດລາສະຫະລັດ ເພີ່ມຂຶ້ນ 17,6% ເມື່ອທຽບໃສ່ປີ 2023 ແຕ່ດ້ວຍການອ່ອນຄ່າລົງຂອງເງິນກີບ ຈຶ່ງເຮັດໃຫ້ລາຍຮັບສະເລ່ຍຂອງປະຊາຊົນໃນນະຄອນຫຼວງວຽງຈັນ ຫຼຸດລົງກວ່າ 1.8 ເທົ່າ ເມື່ອທຽບໃສ່ປີ 2022 ທີ່ປະຊາຊົນມີລາຍໄດ້ສະເລ່ຍ 6,379 ໂດລາສະຫະລັດ ຊຶ່ງເປັນການຊຸກຍູ້ສົ່ງເສີມການຜະລິດສິນຄ້າມີປະສິດທິພາບຕໍ່າ ຫາກແຕ່ມີການນຳເຂ້າສິນຄ້າເພີ່ມຂຶ້ນນັບມື້ ດັ່ງສະມາຊິກສະພາປະຊາຊົນນະຄອນຫຼວງວຽງຈັນ ໃຫ້ການຢືນຢັນວ່າ:
“ອັດຕາການເຕີບໂຕທາງດ້ານເສດຖະກິດ ຄາດວ່າຈະມີການຂະຫຍາຍຕົວໃນລະດັບ 5.7%, ແຕ່ອັດຕາແລກປ່ຽນຜັດເພີ່ມຂຶ້ນ ລາຍຮັບສະເລ່ຍຕໍ່ຫົວຄົນ ເມື່ອປຽບທຽບໃສ່ອັດຕາແລກປ່ຽນ ເຫັນວ່າມີທ່າອຽງຫລຸດລົງ ການລົງເລິກໃນການຢູ້ແຮງໃນການຜະລິດເປັນສິນຄ້າ ເພື່ອທົດແທນການນຳເຂົ້າ ຍັງບໍ່ທັນມີປະສິດທິຜົນສູງ ການສົ່ງເສີມວິສາຫະກິດຂະຫນາດນ້ອຍ-ຂະຫນາດກາງ ຍັງບໍ່ທັນໄດ້ດີ ແລະການນໍາເຂົ້າຍັງບໍ່ທັນດຸນດ່ຽງ."
ແຕ່ຍ່າງໃດກໍ່ຕາມ ລາຍຮັບສະເລ່ຍຂອງປະຊາຊົນໃນນະຄອນຫຼວງວຽງຈັນດັ່ງກ່າວນີ້ກໍຖືວ່າເປັນອັດຕາທີ່ສູງທີ່ສຸດໃນລາວ ເນື່ອງຈາກວ່າລະດັບໃນການພັດທະນາເສດຖະກິດມີການແຕກຕ່າງກັນຫຼາຍ ເມື່ຶອທຽບໃສ່ແຂວງອື່ນໆ ເຊັ່ນ ແຂວງຫົວພັນ ທີ່ການພັດທະນາທາງດ້ານເສດຖະກິດມີຄວາມຄືບໜ້າຊ້າ ຍ້ອນມີຂໍ້ຈຳກັດທັ້ງໃນດ້ານເງິນທຶນ, ເຕັກນິກ, ບຸກຄະລາກອນ ແລະທີ່ຕັ້ງພູມສາດ. ຊຶ່ງພື້ນທີ່ສ່ວນຫຼາຍເປັນເຂດພູດອຍນັ້ນ ຈິ່ງເປັນອຸປະສັກຕໍ່ການຜະລິດດ້ານກະສິກຳ ແລະ ການພັດທະນາພື້ນຖານໂຄງຮ່າງຕ່າງໆ ຈຶ່ງໄດ້ສົ່ງຜົນກະທົບຕໍ່ການພັດທະນາເພື່ອຍົກສູງຄຸນນະພາບຊີວິດຂອງປະຊາຊົນໃນແຂວງຢ່າງຫລີກລ່ຽງບໍ່ໄດ້ ດັ່ງຈະເຫັນໄດ້ຈາກມູນຄ່າ GDP ທີ່ຄິດເປັນລາຍໄດ້ສະເລ່ຍຂອງປະຊາຊົນໃນແຂວງຫົວພັນ ໄດ້ພຽງແຕ່ 900 ໂດລາສະຫະລັດຕໍ່ຄົນຕໍ່ປີໃນປັດຈຸບັນ ດັ່ງເຈົ້າໜ້າທີ່ແຂວງຫົວພັນ ຢືນຢັນວ່າ:
“ໃນຂົງເຂດກະສິກຳ ປູກຝັງແລະລ້ຽງສັດ ກໍຖືວ່າໃນປັດຈຸບັນນີ້ ທາງແຂວງພວກເຮົາ ມີເນື້ອທີ່ປູກຝັງກະບ່ຫຼາຍປານໃດ ເພາະເປັນພູເຂົາ ປ່າດົງ ສູງຊັນ ແຕ່ພວກເຮົາກະພະຍາຍາມເຮັດໃຫ້ ພໍ່ແມ່ ປະຊາຊົນ ໄດ້ນຳໃຊ້ພື້ນທີ່ດັງກ່າວ ໃນການປູກພືດຊະນິດຕ່າງໆ, ໂດຍສະເພາະສາລີ, ມັນຕົ້ນບ່, ຫຼືພືດຜັກຕ່າງໆ ສໍາລັບການນໍາໃຊ້ພາຍໃນແລະສົ່ງອອກໄປຕ່າງປະເທດ ໂດຍສະເພາະແມ່ນສົ່ງໄປຫວຽດນາມ ເຊິງເຮັດໃຫ້ຊີວິດການເປັນຍູ່ຂອງພໍ່ແມ່ປະຊາຊົນກະນັບມື້ນັບດີຂື້ນ ສະເລ່ຍໃສ່ຫົວຄົນແມ່ນປະມານ 900 ໂດລາຕໍ່ຄົນຕໍ່ປີ.”
ສ່ວນ ນັກຊ່ຽວຊານດ້ານການເງິນ ແລະ ການທະນາຄານໃນອາຊຽນ ໄດ້ຄາດຄະເນສະພາບການເສດຖະກິດອາຊຽນໃນປີ 2024 ວ່າ GDP ລວມຂອງ 10 ປະເທດສະມາຊິກອາຊຽນຈະມີມູນຄ່າທັງໝົດ 4,161,842 ລ້ານໂດລາສະຫະລັດ, ໃນນັ້ນ ອິນໂດເນເຊຍ ຍັງເປັນປະເທດທີ່ມີມູນຄ່າ GDP ສູງສຸດ ຮອງລົງມາແມ່ນປະເທດໄທ, ສິງກະໂປ, ຟີລິບປິນ, ຫວຽດນາມ, ມາເລເຊຍ, ມຽນມາ, ກຳປູເຈຍ, ບຣູໄນແລະລາວຕາມລຳດັບ. ສຳລັບລາວນັ້ນຢັງຖືເປັນປີທີ 3 ແລ້ວທີ່ມູນຄ່າ GDP ຫຼຸດລົງ ແລະຕໍ່າກວ່າ GDP ຂອງບຣູໄນດ້ວຍ.
ທັ້ງນີ້ໂດຍ ຜູ້ຊ່ຽວຊານດ້ານການເງິນແລະການທະນາຄານໃນອາຊຽນ ຢັງຄາດຄະເນວ່າ GDP ຂອງລາວໃນປີ 2024 ຈະມີມູນຄ່າລວມບໍ່ເກີນ 14,110 ລ້ານໂດລາສະຫະລັດ.
ແຕ່ຍ່າງໃດກໍຕາມ ດ້ວຍການຫຼຸດລົງຢ່າງຕໍ່ເນື່ອງຂອງຄ່າເງິນກີບນັ້ນ ຈຶ່ງຈະສົ່ງຜົນກະທົບເຮັດໃຫ້ GDP ຂອງລາວຈະມີມູນຄ່າລວມພຽງແຕ່ 13,455 ລ້ານໂດລາ ເມື່ອທຽບໃສ່ອັດຕາແລກປ່ຽນທາງການທີ່ທະນາຄານແຫ່ງຊາດລາວກຳນົດນັ້ນ.