ທ່ານ Francois Hollande ຫົວໜ້າພັກສັງຄົມນິຍົມໄດ້ໂຜ່ໂຕຂຶ້ນມາ ເປັນຜູ້ມີສຽງນໍາໜ້າ
ໃນການເລືອກຕັ້ງປະທານາທິບໍດີຂອງຝຣັ່ງ ຫຼັງຈາກໄດ້ຮັບຄະແນນນໍາໜ້າປະທານາທິບໍດີ
Nicolas Sarkozy ທີ່ປົກຄອງປະເທດໃນປັດຈຸບັນ ໃນການປ່ອນບັດຮອບທີນຶ່ງໃນວັນອາ
ທິດວານນີ້.
ພ້ອມກັບທີ່ການນັບບັດຄະແນນສຽງເກືອບສໍາເລັດໝົດແລ້ວນັ້ນ ທ່ານ Hollande ໄດ້ຮັບ
ສຽງສະໜັບສະໜຸນຫຼາຍກວ່າ 28 ເປີເຊັນ ໃນຂະນະທີ່ທ່ານ Sarkozy ນິຍົມແນວທາງ
ເດີມ ໄດ້ຮັບ 27 ເປີເຊັນ. ຜູ້ສະມັກແຂ່ງຂັນ 2 ທ່ານນີ້ ຈະປະເຊີນໜ້າກັນອີກໃນການ
ແຂ່ງຂັນຮອບຊີ້ຂາດໃນວັນທີ 6 ພຶດສະພາໜ້ານີ້.
ພວກຜູ້ສະມັກແຂ່ງຂັນອີກ 8 ຄົນແມ່ນໄດ້ຕົກຮອບໄປແລ້ວ. ແຕ່ທ່ານ ນາງ Marine Le
Pen ຫົວນິຍົມຂວາຈັດ ໄດ້ເຮັດໃຫ້ພວກຢັ່ງສຽງແປກໃຈ ຍ້ອນໄດ້ຮັບສຽງສະໜັບສະ
ໜຸນມາໃນອັນດັບ 3 ໂດຍໄດ້ຮັບຫຼາຍກວ່າ 18 ເປີເຊັນ ຊຶ່ງແມ່ນຫຼາຍທີ່ສຸດສໍາລັບຜູ້ສະ
ມັກສັງກັດພັກແນວໂຮມແຫ່ງຊາດ ທີ່ຕໍ່ຕ້ານພວກຄົນເຂົ້າເມືອງ ທີ່ທ່ານ Jean-Marie
Le Pen ບິດາຂອງທ່ານນາງ ໄດ້ກໍ່ຕັ້ງຂຶ້ນມານັ້ນ. ທ່ານນາງ Marine Le Pen ກ່າວວ່າ
ທ່ານນາງຈະແນະນໍາພວກສະໜັບສະໜຸນທ່ານນາງກ່ຽວກັບວ່າ ຄວນຈະລົງຄະແນນ
ສຽງໃຫ້ໃຜໃນການເລືອກຕັ້ງຮອບຕໍ່ໄປ ໃນສັບປະດາໜ້ານີ້.
ທ່ານ Hollande ກ່າວວ່າ ຜົນການເລືອກຕັ້ງໃນວັນອາທິດວານນີ້ເຮັດໃຫ້ທ່ານເປັນຜູ້
ສະມັກທີ່ແຂງແຮງທີ່ສຸດ ແຕ່ເຕືອນພວກສະໜັບສະໜຸນທ່ານ ໃຫ້ຄາດໝາຍການໂຈມ
ຕີຢ່າງແຂງແຮງຈາກປະທານາທິບໍດີ Sarkozy ໃນການປ່ອນບັດເລືອກຕັ້ງໃນວັນທີ 6
ເດືອນໜ້ານີ້.
ທ່ານ Hollande ກ່າວວ່າ ທ່ານຢາກທ້ອນໂຮມ ອັນທີ່ທ່ານເອີ້ນວ່າ ປະເທດທີ່ຖືກ
ແບ່ງແຍກໂດຍນະໂຍບາຍ ທີ່ລົ້ມແຫຼວຂອງທ່ານ Sarkozy ນັ້ນ. ທ່ານກ່າວຕື່ມວ່າ
ທ່ານຢາກຂຶ້ນພາສີ ທີ່ພວກມະຫາເສດຖີ ຈ່າຍໃຫ້ລັດຖະບານນັ້ນ.
ສ່ວນທ່ານ Sarkozy ນັ້ນ ກໍຍັງຄົງມີກໍາລັງໃຈດີແລະກະຕືລືລົ້ນ ກ່ຽວກັບການເລືອກ
ຕັ້ງຮອບທີສອງ ເຖິງແມ່ນທ່ານໄດ້ເປັນປະທານາທິບໍດີ ຄົນທໍາອິດທີ່ປົກຄອງປະເທດ
ຢູ່ ທີ່ໄດ້ເສຍໄຊໃນການເລືອກຕັ້ງຮອບທີນຶ່ງໃນປະວັດສາດສະໄໝໃໝ່ຂອງຝຣັ່ງ.
ທ່ານ Sarkozy ໄດ້ໃຫ້ເຫດຜົນສໍາລັບຜົນການເລືອກຕັ້ງໃນວັນອາທິດວານນີ້ວ່າ ເປັນ
ຍ້ອນຄວາມເປັນຫ່ວງກັງວົນຂອງປະຊາຊົນ ກ່ຽວກັບຄວາມໝັ້ນຄົງດ້ານວຽກການຂອງ
ເຂົາເຈົ້າ ແລະຄວາມສົມບູນຂອງເຂດນໍ້າແດນດິນຂອງຊາດ.