ຜູ້ປົກຄອງລັດ Florida ທ່ານ Rick Scott ກ່າວຕໍ່ກອງປະຊຸມນັກຂ່າວໃນວັນສຸກວານນີ້ວ່າ ລັດ Florida ທີ່ຢູ່ທາງພາກໃຕ້ຂອງປະເທດ ມີລາຍງານ 4 ກໍລະນີ ຂອງເຊື້ອໄວຣັສ Zika ທີ່ປາກົດວ່າບໍ່ພົວພັນກັບການເດີນທາງ.
ທ່ານ Scott ກ່າວວ່າ “ລັດ Florida ໄດ້ກາຍມາເປັນລັດທຳອິດຢູ່ໃນປະເທດເຮົາທີ່ມີການລະບາດ ຂອງເຊື້ອໄວຣັສ Zika ຢູ່ໃນທ້ອງຖິ່ນ. ມາເຖິງປັດຈຸບັນນີ້ ມີລາຍງານການລະ ບາດ ປະມານ 1,650 ກໍລະນີຂອງເຊື້ອໄວຣັສ Zika ຢູ່ໃນສະຫະລັດ ທີ່ພົວພັນກັບການເດີນທາງໄປຍັງບັນດາປະເທດ ຢູ່ໃນເຂດ Latin America ຫລື Caribbean ທີ່ພວມປະເຊີນໜ້າກັບການລະບາດຂອງເຊື້ອໄວຣັສນີ້.
ທ່ານ Scott ໄດ້ກ່າວ ໂດຍອ້າງຄຳເວົ້າຂອງພວກເຈົ້າໜ້າທີ່ສາທາລະນະສຸກ ຂອງລັດວ່າ ສີ່ກໍລະນີໃນລັດ Florida ແມ່ນເກີດຂຶ້ນຢູ່ໃນເຂດນ້ອຍໆທາງພາກເໜືອຂອງນະຄອນ Miami.
ໂຄສົກທຳນຽບຂາວ ທ່ານ Eric Schultz ກ່າວວ່າ ໄດ້ມີການລາຍງານໃຫ້ປະ ທານາທິບໍດີ Barack Obama ຊາບກ່ຽວກັບສະຖານະການດັ່ງກ່າວ ໃນຕອນເຊົ້າວັນສຸກວານນີ້. ທ່ານ
ກ່າວວ່າ ລັດຖະບານທ່ານ Obama ໃຫ້ການສະໜັບສະໜູນຕໍ່ຄວາມພະຍາຍາມຂອງ ທ່ານ Scott ຜູ້ທີ່ທ່ານຍ້ອງຍໍວ່າ ກຳລັງກວດສອບຂົງເຂດດັ່ງກ່າວຢ່າງລະອຽດ ໃນການຊອກຫາເຊື້ອໄວຣັສ Zika ແລະໄດ້ ກະກຽມມາເປັນເວລານານເພື່ອຮັບມືກັບການແຜ່ລະບາດທີ່ອາດເກີດຂຶ້ນ.
ພາບຖ່າຍໃນວັນທີ 7 ເດືອນມິຖຸນາ 2016 ສະແດງໃຫ້ເຫັນ ຢູ່ເຂດເມືອງ Dade ນະຄອນ Miami ທີ່ພະນັກງານຄວບຄຸມຍຸງ ທ່ານ Carlos Vargas ກຳລັງຊີ້ໃສ່ໜອນນໍ້າ.
ລັດ Florida ໄດ້ຮ້ອງຂໍເງິນຈາກກອງທຶນສຸກເສີນ Zika 15 ລ້ານໂດລາ ເພື່ອເກັບກຳແລະກວດເບິ່ງຍຸງ ແລະໂຄງການຕ່າງໆ ເພື່ອການກະກຽມຮັບມືກັບເຊື້ອໄວຣັສ Zika. ສູນກາງ ຄວບຄຸມ ແລະປ້ອງກັນພະຍາດສະຫະລັດ ກ່າວວ່າ ຕົນໄດ້ໃຫ້ການຊ່ວຍເຫລືອເງິນ 8 ລ້ານໂດລາ.
ອົງການ Oneblood ຊຶ່ງເປັນສູນກາງຮັບການບໍລິຈາກເລືອດທີ່ສຳຄັນ ໄດ້ກ່າວວ່າຕົນຈະ ກວດສອບເລືອດທັງໝົດທີ່ເກັບໄວ້ເພື່ອຊອກຫາເຊື້ອໄວຣັສ Zika.