ປະຊາຊົນຫຼາຍຮ້ອຍຄົນ ທີ່ພວມລະນຶກເຖິງຊາຍໜຸ່ມຜິວດຳ
ຄົນໜຶ່ງ ທີ່ໄດ້ຖືກຕຳຫຼວດ ຍິງເສຍຊີວິດປີກາຍນີ້ ໄດ້ພາກັນ
ຍ່າງເປັນຂະບວນ ໃນວັນເສົາວານນີ້ ໃນໃຈກາງ ເມືອງ
ເຟີເກິສັນ ໃນລັດມິສຊູຣີ ຂອງສະຫະລັດ. ໃນຂະນະທີ່ບັນດາ
ນັກເຄື່ອນໄຫວສິດທິພົນລະເມືອງ ແລະ ຜູ້ນຳສາສະໜາໄດ້
ລວມຕົວກັນຊຸມນຸມ ໃນເມືອງທີ່ມີຄົນອາເມຣິກັນ ອາຟຣິກັນ
ສ່ວນໃຫຍ່ ເພື່ອລະນຶກເຖິງວັນດັ່ງກ່າວ.
ບັນດາຜູ້ຮ່ວມການເດີນຂະບວນໄດ້ນຳໜ້າໂດຍພໍ່ ແລະ ຄອບຄົວ
ຂອງທ້າວ Michael Brown, ຊາຍອາຍຸ 18 ປີເຊິ່ງການຕາຍ
ຂອງລາວ ໃນວັນທີ 9 ສິງຫາ 2014 ໄດ້ກໍ່ໃຫ້ເກີດການປະທ້ວງ
ແລະ ຈະລາຈົນໃນຫຼາຍມື້ຫຼັງຈາກການຕາຍດັ່ງກ່າວ ແລະ ແລ້ວຫຼາຍເດືອນຕໍ່ມາ ເມື່ອ
ຄະນະຂຸນສານຕັດສິນຄະດີ ໄດ້ຕັດສິນກ່າວໂທດ ຕໍ່ເຈົ້າໜ້າທີ່ຕຳຫຼວດຜິວຂາວ ທີ່ໄດ້ຍິງ
ລາວຫຼັງຈາກການຜິດຖຽງກັນ.
ການຕາຍຂອງທ້າວ Brown ຍັງໄດ້ກໍ່ໃຫ້ເກີດການປະທ້ວງໃນຫຼາຍເມືອງຂອງ ອາເມຣິກາ,
ເນື່ອງຈາກການຂ້າຜູ້ຊາຍຜິວດຳທີ່ບໍ່ມີອາວຸດ ໂດຍຕຳຫຼວດຄົນອື່ນໆຫຼາຍຄັ້ງ ໄດ້ດຶງດູດ
ຄວາມສົນໃຈຂອງສາກົນ ຕໍ່ຄວາມເຄັ່ງຕຶງອັນດຸເດືອດ ທີ່ມີມາແຕ່ດົນນານ ລະຫວ່າງ
ບັນດາຕຳຫຼວດ ແລະ ປະຊາຊົນ ທີ່ພວກເຂົາໄດ້ຖືກມອບໝາຍ ໃຫ້ປົກປ້ອງພວກເຂົາ.
ພໍ່ຂອງທ້າວ Brown ກ່າວຕໍ່ບັນດານັກຂ່າວໃນວັນເສົາວານນີ້ວ່າ ລາວກຳລັງເຮັດວຽກເພື່ອຮັກສາຊີວິດ ແລະ ການຕາຍຂອງລູກຂອງລາວ ໃຫ້ເປັນຈຸດສົນໃຈຂອງສາທາລະນະຊົນ ເພື່ອຊ່ວຍເຫຼືອຫຼາຍຄອບຄົວ ແລະ ຄົນໄວໜຸ່ມໃນຊຸມຊົນຂອງລາວ.
ພິທີລະນຶກເຖິງດັາງກ່າວ ແມ່ນຄາດວ່າຈະມີຄົນເຂົ້າຮ່ວມຫຼາຍທີ່ສຸດໃນວັນອາທິດມື້ນີ້
ພ້ອມດ້ວຍການຍ່າງງຽບສະຫງົບໄປຫາໂບດ ເພື່ອພິທີທາງສາສະໜາ. ຜູ້ເຂົ້າຮ່ວມກໍຍັງ
ຈະໄດ້ປະຕິບັດການໄວ້ອາໄລ ສີ່ນາທີເຄິ່ງ ເຊິ່ງສົບຂອງທ້າວ Brown ໄດ້ນອນຢູ່ຖະໜົນ
ສີ່ຊົ່ວໂມງເຄິ່ງ ກ່ອນທີ່ ຈະຖືກນຳອອກໄປ.