ພັກຝ່າຍຂວາຈັດ ໄດ້ຮັບໄຊຊະນະໃນການເລືອກຕັ້ງລັດຖະສະພາຢູໂຣບ ຫຼື EU ໃນວັນອາທິດວານນີ້, ເຊິ່ງເພີ່ມຄວາມບໍ່ແນ່ນອນໃຫ້ກັບທິດທາງດ້ານການ ເມືອງໃນອະນາຄົດຂອງ EU.
ການຢັ່ງຫາງສຽງ Exit polls ຄາດຄະເນວ່າ ພັກເປັນກາງ, ພັກເສລີນິຍົມ ແລະພັກສັງຄົມນິຍົມ ຈະໄດ້ຮັບຄະແນນສຽງສ່ວນຫລາຍໃນສະພາທີ່ມີ 720 ບ່ອນນັ່ງ ແຕ່ຈະສູນເສຍບ່ອນນັ່ງປະມານ 28 ບ່ອນ.
ປະທານາທິບໍດີ ຝຣັ່ງ ທ່ານ ເອັມມານູເອລ ມາກຣົງ (Emmanuel Macron) ໄດ້ຖືກພັກຝ່າຍຂວາຈັດຂອງທ່ານນາງ ມາຣີນ ເລີເພັນ (Marine Le Pen) ຕຳໜິ.
ທ່ານ ມາກຣົງ (Macron) ກ່າວວ່າ ຜົນໄດ້ຮັບຂອງສະຫະພາບຢູໂຣບແມ່ນເປັນສິ່ງທີ່ໂຫດຮ້າຍສຳລັບລັດຖະບານຂອງທ່ານ, ແລະເປັນສິ່ງທີ່ທ່ານບໍ່ສາມາດເມີນເສີຍໄດ້, ເຮັດໃຫ້ທ່ານຕ້ອງໄດ້ຮຽກຮ້ອງໃຫ້ມີການເລືອກຕັ້ງລະດັບຊາດ ຢ່າງຮີບດ່ວນ.
ຖ້າພັກການໂຮມຊາດ ຫຼື Rally party ຂອງທ່ານນາງ ເລີເພັນ (Le Pen) ໄດ້ຮັບຄະແນນສຽງສ່ວນຫລາຍໃນລັດຖະສະພາ, ທ່ານ ມາກຣົງ (Macron) ຈະມີອິດທິພົນພຽງເລັກນ້ອຍຕໍ່ວຽກງານພາຍໃນປະເທດ.
ນາຍົກລັດຖະມົນຕີເຢຍລະມັນ ທ່ານໂອລາຟ ໂຊລສ໌ (Olaf Scholz) ກໍທົນ ທໍລະມານໃນຄໍ່າຄືນທີ່ເຈັບປວດນີ້ເຊັ່ນກັນ.
ພັກປະຊາທິປະໄຕສັງຄົມ ຫຼື Social Democrats ຂອງທ່ານ ເຮັດຜົນງານ ໄດ້ບໍ່ດີທີ່ສຸດເທົ່າທີ່ເຄີຍມີມາ, ໂດຍໄດ້ຮັບຜົນກະທົບຈາກຝີມືຂອງພັກອະນຸລັກ ນິຍົມຫຼັກ ແລະພັກທາງເລືອກຂວາຈັດສໍາລັບເຢຍລະມັນ.
ໃນຂະນະດຽວກັນ, ການຢັ່ງຫາງສຽງ Exit polls ໄດ້ສະແດງໃຫ້ເຫັນວ່າ ນາຍົກລັດຖະມົນຕີອີຕາລີ ທ່ານນາງ ຈໍເຈຍ ເມໂລນີ (Giorgia Meloni) ມີສະ ຖານະທີ່ແຂ່ງແກ່ນຂຶ້ນ, ໂດຍທີ່ມີກຸ່ມອ້າຍນ້ອງຫົວອະນຸລັກນິຍົມຂອງອີຕາລີ ຫຼື Brothers of Italy ຢູ່ໃນອັນດັບຕົ້ນໆ.