ທ່ານ Lucas Papademos ມີກໍານົດຈະສາບານຕົວເຂົ້າຮັບຕໍາແໜ່ງນາຍົກລັດຖະມົນຕີ
ກຣີສຄົນໃໝ່ ລຸນຫລັງການເຈລະຈາກັນຢ່າງຂຸ້ນຂ້ຽວມາເປັນເວລາເກືອບນຶ່ງອາທິດ ກ່ຽວກັບ
ການປະກອບລັດຖະບານປະສົມ ທີ່ຫວັງວ່າ ຈະກອບກູ້ປະເທດຊາດໃຫ້ພົ້ນຈາກວິກິດການ
ການເງິນທີ່ໜັກໜ່ວງທີ່ສຸດນັ້ນ.
ຄາດວ່າໃນຕອນບ່າຍວັນສຸກນີ້ ທ່ານ Papademos ຈະແຕ່ງຕັ້ງຄະນະລັດຖະບານຂອງ
ທ່ານທີ່ຄິດວ່າຈະຮວມເອົາພວກລັດຖະມົນຕີຄົນສໍາຄັນຫລາຍໆຄົນ ຈາກລັດຖະບານຂອງ
ທ່ານ George Papandreou ທີ່ຈະພົ້ນຈາກຕໍາແໜ່ງນາຍົກລັດຖະມົນຕີ ຫລັງຈາກໄດ້ປະ
ກາດລາອອກໄປໃນວັນອາທິດຜ່ານມາ ຊຶ່ງເປັນເວລາລະຫວ່າງກາງຂອງສະໄໝສີ່ປີຂອງທ່ານ.
ໃນວັນພະຫັດວານນີ້ ພວກຜູ້ນໍາພັກການເມືອງທີ່ຜິດຖຽງກັນຂອງກຣີສ ໄດ້ແຕ່ງຕັ້ງທ່ານ
Papademos ອະດີດຮອງປະທານທະນາຄານກາງຢູໂຣບ ເປັນນາຍົກລັດຖະມົນຕີຮັກສາ
ການຊົ່ວຄາວຂອງກຣີສ ໄປຈົນກວ່າຈະມີການເລືອກຕັ້ງທົ່ວປະເທດ ທີ່ກໍານົດໄວ້ຊົ່ວຄາວ
ໃສ່ເດືອນກຸມພາປີ 2012.
ລັດຖະບານໄລຍະຂ້າມຜ່ານ ແມ່ນຈະມີໜ້າທີ່ຈັດຕັ້ງປະຕິບັດ ແຜນການຕັດງົບປະມານຢ່າງ
ໃຫຍ່ທີ່ປະຊາຊົນບໍ່ມັກນັ້ນ ແຕ່ຖືກບັງຄັບໂດຍພວກຜູ້ນໍາຢູໂຣບ ເພື່ອທີ່ກຣີສຈະໄດ້ຮັບເງິນ
ງວດຕໍ່ໄປຈາກກອງທຶນຊ່ວຍເຫລືອ ເພື່ອປ້ອງກັນບໍ່ໃຫ້ກຣີສລົ້ມລະລາຍ ພາຍໃນບໍ່ເທົ່າໃດ
ອາທິດນີ້ ຖ້າຫາກບໍ່ສາມາດຊໍາລະໜີ້ສິນໄດ້ນັ້ນ.
ບັດນີ້ ທົ່ວໂລກແມ່ນແນຄວາມສົນໃຈໄປໃສ່ສະຖານະການໃນອິຕາລີ ຊຶ່ງເປັນເສດຖະກິດ
ໃຫຍ່ອັນດັບສາມໃນເຂດຢູໂຣ ທີ່ກໍາລັງຖືກກົດດັນໃຫ້ຈັດຕັ້ງປະຕິບັດແຜນການຕັດງົບປະ
ມານຢ່າງຮອບດ້ານ ເພື່ອລົດໜີ້ສິນ ຈໍານວນ 2600 ຕື້ໂດລາຂອງປະເທດ.
ວັນສຸກມື້ນີ້ ສະພາສູງຂອງອິຕາລີ ເລິ່ມຕົ້ນທໍາການອະພິປາຍກັນກ່ຽວກັບ ມາດຕະການ
ການປະຢັດມັດທະຍັດທີ່ໜັກໜ່ວງ ທີ່ບັງຄັບໂດຍພວກຜູ້ນໍາຢູໂຣບ ເພື່ອຄໍ້າປະກັນຄວາມ
ທຸ່ນທ່ຽງຂອງເງິນຢູໂຣເອົາໄວ້ນັ້ນ.