ພວກຜູ້ນຳຂອງສະຫະພາບຢູໂຣບໄດ້ບັນລຸການຕົກລົງກັນເພື່ອນຳໃຊ້ກອງທຶນຊ່ອຍເຫຼືອແບບ
ຍືນຍົງຂອງຕົນ ເຂົ້າໄປເສີມຄວາມເຂັ້ມແຂງໂດຍກົງໃຫ້ແກ່ບັນດາທະນາຄານ ໃນທົ່ວທະວີບຢູ
ໂຣບ ແລະຊອກຫາຊ່ອງທາງ ໃຫ້ມີການຄວບຄຸມ ໃນໄລຍະຍາວ ກ່ຽວກັບເລື່ອງງົບປະມານທີ່
ເຄັ່ງຄັດກວ່າເກົ່າພ້ອມກັບການຮວມຕົວກັນທາງດ້ານການເມືອງ.
ການຕັດສິນໃຈດັ່ງກ່າວ ໄດ້ບັນລຸກັນ ໃນຕອນເຊົ້າຂອງວັນສຸກມື້ນີ້ ຫຼັງຈາກໄດ້ມີການສົນທະ
ນາຫາລືເປັນເວລາຫຼາຍໆຊົ່ວໂມງໃນກອງປະຊຸມສຸດຍອດຂອງສະຫະພາບຢູໂຣບທີ່ນະຄອນ
Brussels. ນອກນັ້ນແລ້ວ ຂໍ້ຕົກລົງສະບັບນີ້ ຍັງໄດ້ສ້າງຕັ້ງອົງການຄຸ້ມຄອງກວດກາທະນາ
ຄານຮ່ວມສຳລັບ 17 ປະເທດທີ່ໃຊ້ເງິນຢູໂຣ ແລະອະນຸຍາດໃຫ້ນຳໃຊ້ເງິນຈາກກອງທຶນຊ່ອຍ
ເຫຼືອ ຊື້ພັນທະບັດຂອງປະເທດກູ້ຢືມທີ່ພວມປະສົບບັນຫາ. ພາກສ່ວນຫຼັງນີ້ໄດ້ບັນລຸກັນເພື່ອ
ເປັນການສະໜອງຕອບ ຕໍ່ຄວາມຮຽກຮ້ອງຕ້ອງການ ຂອງສະເປນ ແລະອີຕາລີທີ່ຕ້ອງການ
ຄວາມຊ່ອຍເຫຼືອເພື່ອບັນເທົາຕົ້ນທຶນໃນການກູ້ຢືມທີ່ເພີ່ມທະວີຂຶ້ນນັ້ນ.
ປະທານສະພາຜູ້ນຳ ຂອງສະຫະພາບຢູໂຣບ ທ່ານ Herman Van Rompuy ໄດ້ກ່າວຊົມ
ເຊີຍຂໍ້ຕົກລົງດັ່ງກ່າວນີ້ໃນລະຫວ່າງກອງປະຊຸມຖະແຫຼງຂ່າວລຸນຫຼັງການປະຊຸມກັນ.
ນອກນັ້ນແລ້ວ ພວກຜູ້ນຳຂອງສະຫະພາບຢູໂຣບ ຍັງໄດ້ຕົກລົງ ທີ່ຈະແຍກເງິນໄວ້ປະມານ
150 ພັນລ້ານໂດລາ ເພື່ອຊ່ອຍກະຕຸກຊຸກຍູ້ເສດຖະກິດຂອງບັນດາປະເທດ ທີ່ມີເສດຖະກິດ
ອ່ອນແອທີ່ສຸດໃນກຸ່ມດັ່ງກ່າວ. ອັນທີ່ເອີ້ນວ່າ ຂໍ້ຕົກລົງການເຕີບໂຕນີ້ຂັ້ນຕົ້ນແມ່ນໄດ້ຖືກປະ
ຕິເສດຈາກທັງສະເປນ ແລະອີຕາລີ ຈົນເທົ່າພວກເຂົາເຈົ້າໄດ້ຮັບການຕົກລົງ ທີ່ປະເທດທັງ
ສອງຮຽກຮ້ອງຕ້ອງການ.
ທັງອີຕາລີແລະສະເປນ ຊຶ່ງເປັນປະເທດ ທີ່ມີເສດຖະກິດໃຫຍ່ເປັນອັນດັບສາມແລະອັນດັບ
ສີ່ຂອງເຂດໃຊ້ເງິນຢູໂຣນັ້ນ ໄດ້ຈັບຕາເບິ່ງໃນໄລຍະສາມສາມມື້ຜ່ານມານີ້ ຂະນະທີ່ອັດຕາ
ດອກເບ້ຍເງິນກູ້ຢືມຂອງພວກເຂົາເຈົ້າ ໄດ້ຖີບໂຕຂຶ້ນໃກ້ກັບລະດັບ 7%. ນີ້ແມ່ນຂີດໝາຍ
ຊຶ່ງປະເທດທີ່ມີເສດຖະກິດຂະໜາດນ້ອຍກວ່າເຊັ່ນກຣີສ ໄອແລນແລະປອກຕຸຍກາລໄດ້ຖືກ
ບັງຄັບໃຫ້ຮັບເອົາເງິນຊ່ອຍເຫຼືອຂອງນາໆຊາດ ໃນໄລຍະສອງປີຜ່ານມາ.
ຖ້າອີຕາລີແລະສະເປນຫາກນຳໃຊ້ເງິນຊ່ອຍເຫຼືອຈາກກອງທຶນປະເທດທີ່ໃຊ້ເງິນຢູໂຣເພື່ອ
ຂາຍໜີ້ສິນຂອງຕົນແລ້ວ ມັນອາດສາມາດຕັດຕົ້ນທຶນໃນການກູ້ຢືມຂອງປະເທດທັງສອງ
ລົງຍ້ອນວ່າປະເທດເຫຼົ່ານີ້ຈະບໍ່ຖືກພວກເກັງກຳໄລດຳເນີນການຕາມອຳເພີໃຈໄດ້ອີກຕໍ່ໄປ
ໃນຕະຫຼາດໂລກ.
ນາຍົກລັດຖະມົນຕີສະເປນ ທ່ານ Mariano Rajoy ໄດ້ເຕືອນໃນສັບປະດານີ້ວ່າ ລັດຖະ
ບານຂອງທ່ານຈະບໍ່ສາມາດປະຄັບປະຄອງຄ່າກູ້ຢືມໃນອັດຕາສູງໄດ້ອີກຕໍ່ໄປແລ້ວ. ທ່ານ
ໄດ້ຮັບການສະໜັບສະໜຸນ ຈາກປະທານາທິບໍດີຂອງຝຣັ່ງ ທ່ານ Fancois Holland ທີ່
ກ່າວ ໃນຂະນະເດີນທາງໄປເຖິງ ກອງປະຊຸມສຸດຍອດວ່າ ທ່ານພວມຊອກຫາການແກ້ໄຂ
ຢ່າງວ່ອງໄວ ເພື່ອໃຫ້ການສະໜັບສະໜຸນແກ່ອີຕາລີແລະສະເປນ.