ອົບພະຍົບຫລາຍພັນຄົນ ສ່ວນໃຫຍ່ມາຈາກພາກຕາເວັນອອກກາງ ທີ່ຫຼົບໜີຈາກສົງຄາມ ແລະ ຄວາມທຸກຍາກໃນວັນຈັນວານນີ້ ໄດ້ສືບຕໍ່ເດີນທາງຜ່ານແຫຼມບານກັງ ໄປສູ່ ຢູໂຣບ ຕາເວັນຕົກ, ໃນຂະນະທີ່ບັນດາຜູ້ນຳສະຫະພາບຢູໂຣບຫຼືອີຢູ ໄດ້ດີ້ນຮົນທີ່ຈະຫຼີກລ້ຽງບໍ່ໃຫ້ເກີດໄພພິບັດທາງດ້ານມະນຸດສະທຳ ທີ່ເພີ່ມຂຶ້ນນີ້ ໃນຂະນະທີ່ລະດູໜາວກຳລັງຫຍັບໃກ້ເຂົ້າມາຢ່າງວ່ອງໄວ.
ໃນຂະນະທີ່ອາກາດ ສືບຕໍ່ເຢັນລົງໃນຫຼາຍພາກສ່ວນຂອງທະ ວີບ, ບັນດາຜູ້ນຳຂອງ EU ໄດ້ປະຊຸມກັນໃນວັນອາທິດທີ່ຜ່ານມາເປັນເທື່ອທີ 5 ເພື່ອຫາລືກ່ຽວກັບວິກິດການດັ່ງກ່າວ. ພວກຜູ້ນຳຂອງອີຢູໄດ້ເຫັນດີທີ່ຈະຂະຫຍາຍສູນຮອງຮັບໃນປະເທດ ກຣິສ ເພື່ອຊ່ວຍເຫລືອອົບພະຍົບ ຕື່ມອີກ 100,000 ຄົນ ໃນຂະນະທີ່ບໍ່ປະສົບກັບຄວາມສຳເລັດໃນການ ແກ້ໄຂຄວາມຂັດແຍ້ງທາງດ້ານການເມືອງທີ່ມີຄວາມເຫັນແຕກຕ່າງກັນ ລະຫວ່າງລັດຖະ ບານ ທີ່ຍິນດີຈະຊ່ວຍແກ້ໄຂວິກິດການ ແລະ ປະເທດທີ່ໄດ້ປະຕິເສດທີ່ຈະສະໜອງທີ່ຢູ່ອາໄສຖາວອນໃຫ້ກັບອົບພະຍົບ.
ຫຼາຍຊົ່ວໂມງຕໍ່ມາ, ນາຍົກລັດຖະມົນຕີ ເຢຍຣະມັນ ທ່ານ Angela Merkel ໄດ້ກ່າວວ່າ “ລັດຖະບານທີ່ໄດ້ຕ້ອນຮັບເອົາຄື້ນຂອງຊາວຕ່າງຊາດນັ້ນ, ໄດ້ອະທິບາຍວິກິດການດັ່ງກ່າວວ່າ ເປັນ “ການທົດສອບທີ່ໃຫຍ່ທີ່ສຸດທີ່ ຢູໂຣບ ເຄີຍປະເຊີນໜ້າມາ.”
ຫົວໜ້າສະຫະພາບ ຢູໂຣບ ທ່ານ Jean Claud Juncker ໄດ້ກ່າວວ່າ ສູນຮອງຮັບເພີ່ມເຕີມ ຈະຖືກສ້າງຂຶ້ນຕາມເສັ້ນທາງແຫຼມ ບານກັງ ທີ່ອົບພະຍົບສ່ວນໃຫຍ່ໄດ້ເດີນທາງໜີຈາກປະເທດ ຊີເຣຍ ໃນສອງສາມສັບປະດາທີ່ຜ່ານມາ. ອາຄານໃໝ່ຈະສາມາດຮອງຮັບ ອົບພະຍົບໄດ້ເຖິງ 50,000 ຄົນ ໃນເມື່ອສະຖານທີ່ເພີ່ມເຕີມແມ່ນໄດ້ຖືກວາງແຜນໃນປະເທດ ກຣິສ ສຳລັບອົບພະຍົບເພີ່ມເຕີມອີກ 50,000 ຄົນ.
ທ່ານ Juncker ຜູ້ທີ່ໄດ້ເປີດເຜີຍຂໍ້ສະເໜີການຊ່ວຍເຫຼືອ 20 ສະບັບໃນວັນຈັນວານນີ້, ໄດ້ອະທິບາຍວ່າ ໜ່ວຍຮອງຮັບແຕ່ລະຈຸດແມ່ນສຳຄັນສຳລັບການລົງທະບຽບອົບພະຍົບແຕ່ ລະຄົນ ແລະ ຈັດການການເດີນທາງຂອງພວກເຂົາເຈົ້າ. ແຕ່ທ່ານກໍໄດ້ສະແດງຄວາມຢ້ານກົວວ່າ ການສັນຍາກ່ອນໜ້ານີ້ທີ່ຈະຊ່ວຍເຫຼືອຈາກບັນດາປະເທດ EU ແມ່ນຍັງຈະບໍ່ໄດ້ປະຕິບັດເທື່ອ.
ອົງການສາກົນເພື່ອຜູ້ອົບພະຍົບ ກ່າວວ່າ ຜູ້ຍົກຍ້າຍຖິ່ນຖານ ແລະ ອົບພະຍົບຫຼາຍກວ່າ 680,000 ຄົນຈາກຕາເວັນອອກກາງ, ອາຟຣິກາ ແລະ ເອເຊຍ ໄດ້ເດີນທາງໂດຍທາງທະເລເຂົ້າໄປໃນຢູໂຣບ ໃນປີນີ້.