ບັນດາສະມາຊິກສະພາ ເອທິໂອເປຍ ໄດ້ລົງຄະແນນສຽງ ເພື່ອຍົກເລີກການລະບຸກຸ່ມແນວໂຮມປົດປ່ອຍປະຊາຊົນ ທິເກຣ, ເຊິ່ງແມ່ນພັກການເມືອງທີ່ສຳຄັນຂອງພາກພື້ນ ທິເກຣ ອອກຈາກລາຍຊື່ກຸ່ມກໍ່ການຮ້າຍ, ສີ່ເດືອນຫຼັງຈາກຂໍ້ຕົກລົງສັນຕິພາບໄດ້ສິ້ນສຸດສົງຄາມກາງເມືອງສອງປີ ລະຫວ່າງກຸ່ມດັ່ງກ່າວ ແລະ ກອງກຳລັງລັດຖະບານ. ນັກຂ່າວວີໂອເອ ມາຢາ ມິຊີເກຍ ມີລາຍງານຈາກນະຄອນຫຼວງ ອາດິສ ອາບາບາ, ປະເທດ ເອທິໂອເປຍ, ເຊິ່ງ ພຸດທະສອນ ຈະນຳລາຍລະອຽດມາສະເໜີທ່ານໃນອັນດັບຕໍ່ໄປ.
Your browser doesn’t support HTML5
ຟັງລາຍງານ ບັນດາເຈົ້າໜ້າທີ່ ເອທິໂອເປຍ ຖອນພັກການເມືອງ ທິເກຣ ອອກຈາກລາຍຊື່ກຸ່ມກໍ່ການຮ້າຍ
ບັນດາສະມາຊິກສະພາ ເອທິໂອເປຍ ໄດ້ລົງຄະແນນສຽງໃນກອງປະຊຸມພິເສດເມື່ອວັນພຸດທີ່ຜ່ານມາ ເພື່ອຖອນການກຳນົດໃຫ້ ກຸ່ມແນວໂຮມປົດປ່ອຍປະຊາຊົນ ທິເກຣ, ຫຼື TPLF ເປັນກຸ່ມກໍ່ການຮ້າຍ.
ບັນດາສະມາຊິກສະພາໃນສະພາຕ່ຳ ໄດ້ອະນຸມັດການເຄື່ອນໄຫວດັ່ງກ່າວດ້ວຍຄະແນນສຽງສ່ວນຫຼາຍ. ຈາກສະມາຊິກ 472 ຄົນ, ມີພຽງ 61 ຄົນໄດ້ລົງຄະແນນສຽງຕໍ່ຕ້ານ ການເຄື່ອນໄຫວນັ້ນ ແລະ 5 ຄົນບໍ່ໄດ້ອອກສຽງ.
ການຕັດສິນໃຈດັ່ງກ່າວແມ່ນບາດກ້າວຫຼ້າສຸດ ໃນຂໍ້ຕົກລົງສັນຕິພາບທີ່ສະຫະພາບ ອາຟຣິກາ ໄດ້ໄກ່ເກ່ຍເມື່ອເດືອນພະຈິກປີກາຍນີ້ ລະຫວ່າງລັດຖະບານກາງຂອງ ເອທິໂອເປຍ ແລະ TPLF ທີ່ໄດ້ສິ້ນສຸດສົງຄາມກາງເມືອງສອງປີ.
ລັດຖະບານກາງຂອງ ເອທິໂອເປຍ ໄດ້ໝາຍ TPLF ເປັນອົງການກໍ່ການຮ້າຍໃນເດືອນພຶດສະພາ 2021, ບໍ່ເທົ່າໃດເດືອນກ່ອນສົງຄາມໄດ້ເກີດຂຶ້ນລະຫວ່າງກອງກຳລັງທີ່ຈົງຮັກພັກດີຕໍ່ແຕ່ລະຝ່າຍ.
ສົງຄາມນັ້ນໄດ້ເຮັດໃຫ້ຫຼາຍພັນຄົນເສຍຊີວິດ ແລະ ອີກຫຼາຍລ້ານຄົນບໍ່ມີທີ່ຢູ່ອາໄສ.
ຂໍ້ຕົກລົງສັນຕິພາບດັ່ງກ່າວໄດ້ເຮັດໃຫ້ກອງກຳລັງ ທິເກຣ ມອບອາວຸດໜັກໃຫ້ລັດຖະບານກາງ, ເຊິ່ງໃນການຕອບແທນໄດ້ເປີດເສັ້ນທາງການຊ່ວຍເຫຼືອ ແລະ ສືບຕໍ່ການບໍລິການທີ່ຈຳເປັນຕໍ່ພາກພື້ນນັ້ນ.
ລັດຖະບານຊົ່ວຄາວແມ່ນໄດ້ຖືກຕັ້ງຢູ່ໃນເຂດດັ່ງກ່າວຈົນກວ່າການເລືອກຕັ້ງຈະຖືກຈັດຂຶ້ນ, ອັນເປັນສ່ວນນຶ່ງຂອງຂໍ້ຕົກລົງ.
ທ່ານ ເກຕາຈິວ ເຣດາ, ຜູ້ທີ່ຖືກເລືອກໂດຍ TPLF ໃຫ້ນຳພາລັດຖະບານພາກພື້ນຊົ່ວຄາວ, ແມ່ນນຶ່ງໃນເຈົ້າໜ້າທີ່ ທິເກຣ ຫຼາຍຄົນທີ່ຖືກຂໍ້ກ່າວຫາລັດທິກໍ່ການຮ້າຍກ່ອນໜ້ານີ້ພາຍໃຕ້ການກຳນົດນັ້ນ.
ລາຍງານຂອງສື່ມວນຊົນ ເອທິໂອເປຍ ໄດ້ກ່າວວ່າຂໍ້ກ່າວຫາທີ່ວ່ານັ້ນແມ່ນຄາດວ່າຈະຖືກຍົກເລີກເຊັ່ນກັນ.
ໂຄສົກ TPLF ແມ່ນບໍ່ສາມາດໃຫ້ຄຳເຫັນໃນທັນທີ.
ກຸ່ມປົກປອງສິດທິມະນຸດໄດ້ກ່າວຫາທຸກຝ່າຍທີ່ເຮັດສົງຄາມກັນ, ລວມທັງກອງກຳລັງ ເອຣິເທຣຍ ແລະ ອຳຮາຣາ ໃນພາກພື້ນ, ກ່ຽວກັບ ການກໍ່ອາຊະຍາກຳສົງຄາມໃນລະຫວ່າງຄວາມຂັດແຍ້ງນັ້ນ.
ລັດຖະມົນຕີກະຊວງການຕ່າງປະເທດ ສະຫະລັດ ທ່ານ ແອນໂທນີ ບລິງເຄັນ, ຜູ້ທີ່ໄດ້ເດີນທາງໄປ ເອທິໂອເປຍ ໃນຕົ້ນເດືອນມີນາ, ໃນວັນຈັນທີ່ຜ່ານມາໄດ້ກ່າວປະນາມຄວາມໂຫດຮ້າຍປ່າເຖື່ອນ ທີ່ໄດ້ກະທຳໂດຍທຸກຝ່າຍໃນຄວາມຂັດແຍ້ງນັ້ນ ແລະໄດ້ສະແດງຄວາມຍິນດີຕໍ່ຄວາມມຸ່ງໝັ້ນທີ່ຈະສະແຫວງຫາຄວາມຍຸຕິທຳໃນໄລຍະການປ່ຽນແປງ.
ລັດຖະບານ ເອທິໂອເປຍ ໄດ້ປະຕິເສດຄຳຖະແຫຼງຂອງທ່ານ ບລິງເຄັນ, ໂດຍກ່າວວ່າ ມັນເປັນການຍຸແຍ່ ແລະ ບໍ່ຖືກກາລະເທສະ.