ອີຈິບໄດ້ຕອບໂຕ້ ຕໍ່ການໂຈມຕີທີ່ນອງເລືອດດ້ວຍປືນກົນ ທີ່ໄດ້ສັງຫານພວກທີ່ນັບຖື
ສາສະໜາຄຣິສນິກາຍຄອບຕິກຫຼາຍສິບຄົນ ໃນວັນສຸກວານນີ້ ດ້ວຍການໂຈມຕີທາງ
ອາກາດ ໃສ່ຄ້າຍຂອງພວກກໍ່ການຮ້າຍ ໃນລີເບຍ ບ່ອນທີ່ພວກມືປືນ ກຸ່ມຫົວຮຸນແຮງ
ລັດອິສລາມເຊື່ອວ່າ ໄດ້ຮັບການຝຶກແອບທີ່ນັ້ນ.
ປະທານາທິບໍດີ Abdel-Fatta el-Sissi ໄດ້ປະກາດກ່ຽວກັບການເອົາມາດຕະການ
ຕອບໂຕ້ ໃນຄຳປາໄສທາງໂທລະພາບ ບໍ່ເທົ່າໃດຊົ່ວໂມງ ຫລັງຈາກພວກມືປືນທີ່ໃສ່
ໜ້າກາກໄດ້ໂຈມຕີລົດເມ ທີ່ຂົນເອົາພວກນັບຖືສາສະໜາຄຣິສນິກາຍຄອບຕິກຂ້າມ
ທະເລຊາຍ ໄປຫາວັດ ຂອງພວກເຂົາເຈົ້າ. ເຈົ້າໜ້າທີ່ອີຈິບກ່າວວ່າ ມີຢ່າງໜ້ອຍ 28
ຄົນເສຍຊີວິດ ຍ້ອນນ້ຳມືຂອງມືປືນຈຸນີ້.
ທ່ານ el-Sissi ກ່າວວ່າ “ການໂຈມຕີທີ່ຮ້າຍແຮງ ໄດ້ມີຂຶ້ນ ຕໍ່ຄ້າຍຝຶກຕ່າງໆ” ທີ່ທ່ານ
ໝາຍເຖິງເປົ້າໝາຍຢູ່ໃນປະເທດລີເບຍ.
ທ່ານກ່າວຕື່ມວ່າ “ອີຈິບ ບໍ່ມີຄວາມລັງເລໃຈໃດໆ ທີ່ຈະໂຈມຕີຄ້າຍຂອງພວກກໍ່ການ
ຮ້າຍໃນທຸກຫົນແຫ່ງ. ເຈົ້າໜ້າທີ່ກອງທັບອີຈິບເວົ້າວ່າຄ້າຍທີ່ຕົກເປັນເປົ້າໃນປະເທດ
ລີເບຍ ແມ່ນມີການເຊື່ອມໂຍງໂດຍກົງ ກັບພວກມືປືນທີ່ພົວພັນໃນການໂຈມຕີລົດເມ
ຊຶ່ງມີການສົງໄສ ຢ່າງກວ້າງຂວາງວ່າ ເປັນສະມາຊິກຂອງກຸ່ມທີ່ເຫັນພ້ອມກັບລັດອິສ
ລາມ.
Your browser doesn’t support HTML5
Egypt Violence
ເຈົ້າໜ້າທີ່ເວົ້າວ່າ ມີພວກມືປືນ ຫຼາຍເຖິງ 10 ຄົນ ຢູ່ໃນລົດກະບະ 3 ຄັນທຳການໂຈມ
ຕີປະມານ 320 ກິໂລແມັດຫ່າງຈາກນະຄອນຫຼວງໄຄໂຣ ໂດຍພາກັນ ຍິງປືນກົນສາດ
ເຂົ້າໃສ່ລົດເມທີ່ບັນທຸກພວກສະແຫວງບຸນໄປຍັງວັດທີ່ສອກຫຼີກຫ່າງໄກແຫ່ງນຶ່ງໃນລັດ
Minya ທີ່ສ້າງຂຶ້ນເພື່ອເປັນກຽດໃຫ້ນັກບຸນ Samuel ຊຶ່ງເປັນພະສົງໃນສະໄໝສັດຕະ
ວັດທີ 7. ນອກຈາກ 28 ຄົນທີ່ເສຍຊີວິດແລ້ວຍັງມີອີກ 25 ຄົນໄດ້ຮັບບາດເຈັບ.
ຜູ້ປົກຄອງລັດ ທ່ານ Essam el-Bedawi ກ່າວວ່າ “ພວກເຂົາໄດ້ໃຊ້ປືນກົນຍິງສາດ
ເຂົ້າ.” ໂທລະພາບຂອງອີຈິບໄດ້ອອກຂ່າວຮູບຂອງລົດເມ ທີ່ມີປະຕູຖືກຍິງແຕກແລະ
ກໍຫ້ອມລ້ອມໄປດ້ວຍຕຳຫຼວດແລະລົດໂຮງໝໍ.
ຍັງບໍ່ທັນມີກຸ່ມໃດ ອອກມາອ້າງເອົາຄວາມຮັບຜິດຊອບໃນການໂຈມຕີດັ່ງກ່າວນີ້ເທື່ອ
ແຕ່ແນວໃດກໍຕາມ ມັນເປັນສັນຍາລັກ ຂອງພວກທີ່ເປັນເຄືອຂ່າຍ ກຸ່ມລັດອິສລາມຢູ່
ໃນອີຈິບຊຶ່ງໄດ້ທຳການໂຈມຕີ 4 ເທື່ອຕໍ່ພວກທີ່ນັບຖືສາສະໜາຄຣິສນິກາຍຄອບຕິກ
ນັບແຕ່ເດືອນທັນວາເປັນຕົ້ນມາ.
ສາສະໜາຄຣິສນິກາຍຄອບຕິກໃນອີຈິບ ເປັນປະຊາຄົມຄຣິສຕຽນທີ່ໃຫຍ່ທີ່ສຸດຢູ່ໃນ
ພາກຕາເວັນອອກກາງ. ພວກເຂົາເຈົ້າໄດ້ຕົກເປັນເປົ້າໃນການໂຈມຕີຂອງ ພວກມຸສ
ລິມຫົວຮຸນແຮງຈັດມາດົນນານແລ້ວ ພ້ອມໆກັບການຈຳແນກກີດກັນຈາກປະຊາຊົນ
ສ່ວນໃຫຍ່ຂອງປະເທດທີ່ນັບຖືສາສະໜາອິສລາມນັ້ນ.