ຮອງນາຍົກລັດຖະມົນຕີ ຢືນຢັນວ່າ ມີເຈົ້າໜ້າທີ່ຂອງລັດຖະບານຈໍານວນບໍ່ໜ້ອຍທີ່ພົວພັນກັບການລັກລອບຂົນສົ່ງ ແລະຄ້າຢາເສບຕິດຢູ່ ໃນລາວ ຊຶ່ງເຮັດໃຫ້ບໍ່ສາມາດປາບປາມໄດ້ຢ່າງມີປະສິດທິຜົນ.
Your browser doesn’t support HTML5
ຮອງນາຍົກ ຢືນຢັນວ່າ ມີເຈົ້າໜ້າທີ່ຂອງລັດ ຈໍານວນບໍ່ໜ້ອຍ ທີ່ພົວພັນກັບການລັກລອບຂົນສົ່ງ ແລະຄ້າຢາເສບຕິດ
ພົນເອກ ວິໄລ ຫລ້າຄຳຟອງ, ຮອງນາຍົກລັດຖະມົນຕີ - ລັດຖະມົນຕີກະຊວງປ້ອງກັນຄວາມສະຫງົບ ຢືນຢັນວ່າ ສາເຫດທີ່ສຳຄັນປະການໜຶ່ງທີ່ເຮັດໃຫ້ລັດຖະບານລາວ ບໍ່ສາມາດປາບປາມການລັກລອບຂົນສົ່ງ ແລະຄ້າຂາຍຢາເສບຕິດໃນລາວໄດ້ຢ່າງສິ້ນເຊີງ ກໍເພາະວ່າ ມີເຈົ້າໜ້າທີ່ຂອງລັດຈຳນວນບໍ່ໜ້ອຍທີ່ເຂົ້າໄປມີສ່ວນກ່ຽວຂ້ອງໂດຍກົງ ຊຶ່ງທີ່ຜ່ານມາ ກໍປະກົດວ່າ ໄດ້ມີການຈັບກຸມພະນັກງານຂອງລັດ ທີ່ເຮັດວຽກຢູ່ໃນທຸກພາກສ່ວນ ທັງໃນລະດັບສູນກາງ ແລະລະດັບທ້ອງຖິ່ນໃນທົ່ວປະເທດ ໂດຍໃນນີ້ ກໍລວມທັງຕໍາຫລວດ ແລະພະນັກງານໃນອໍານາດການປົກຄອງລະດັບທ້ອງຖິ່ນດ້ວຍດັ່ງທີ່ ພົນເອກ ວິໄລ ໄດ້ໃຫ້ການຢືນຢັນວ່າ:
“ການເຮັດໜ້າທີ່ຂອງພວກເຮົານີ້ ກະຫຍຸ້ງຍາກ ແຕ່ວ່າ ຢາກແກ້ໂຕນີ້ ກະມີຕັ້ງແຕ່ວ່າ ຊ່ວຍກັນ ມັນຕ້ອງເວົ້າເລື່ອງບ້ານກູ້ມບ້ານ ເມືອງກຸ້ມເມືອງຄູນ ແລ້ວຢູ່ບ້ານນີ້ ນາຍບ້ານຕ້ອງເຂັ້ມງວດ ແລະເຂັ້ມແຂງ. ອຳນາດການປົກຄອງຕ້ອງໄດ້ຮັບການປັບປຸງໃຫ້ມີຄຸນນະພາບມັນຈັງສິໄດ້ ອັນນີ້ແມ່ນຮອງນາຍບ້ານເປັນຜູ້ຂາຍຊ້ຳ ພວກເຮາກະຈັບໄດ້ ຖືກນາຍບ້ານ ກະມີ ຖືກຄົນຢູ່ສັງກັດລັດເຮານີ້ ກະມີ ຢູ່ສຳນັກງານ ອົງການ ຢູ່ໃນພະແນກການ ກະມີ.”
ພົນເອກ ວິໄລ ໃຫ້ການຢືນຢັນດ້ວຍວ່າ ໄດ້ກວດພົບເຫັນການຜະລິດຢາບ້າ ແລະຍາໄອສ໌ຢູ່ບັນດາແຂວງພາກເໜືອຂອງລາວເພີ່ມຂຶ້ນ. ທັງຍັງເປັນການຍາກທີ່ຈະສະກັດກັ້ນໃຫ້ໄດ້ຢ່າງສົມບູນ. ຍ້ອນກຸ່ມແກັ່ງຄ້າຢາເສບຕິດຢູ່ລາວ ມັນເປັນຂະແໜງໜຶ່ງຂອງວົງການຄ້າຢາເສບຕິດຂ້າມຊາດທີ່ມີເຄືອຂ່າຍຢ່າງກວ້າງຂວາງໃນທົ່ວໂລກ. ໃນນັ້ນ ຮວມຢູ່ໃນລຸ່ມແມ່ນໍ້າຂອງ. ບ່ອນທີ່ຄວາມຮັບຜິດຊອບໄດ້ຖືກຈັດສັນຢ່າງຊັດເຈນໃນແຕ່ລະປະເທດ ກໍຄືການຜະລິດ, ການຂົນສົ່ງ ແລະ ການແຈກຢາຍ ໂດຍເຄືອຂ່າຍໃນລາວ ຈະຮັບຜິດຊອບການຂົນສົ່ງຢາເສບຕິດ ຜ່ານລາວ ໄປຕ່າງປະເທດ. ສ່ວນແຫຼ່ງຜະລິດຢາເສບຕິດໃຫຍ່ທີ່ສຸດ ແມ່ນຢູ່ມຽນມາ. ແຕ່ມັນເປັນການຍາກທີ່ສຸດທີ່ຈະສະກັດກັ້ນມັນຢ່າງສົມບູນ. ເພາະວ່າ ເປັນກໍລະນີທີ່ກ່ຽວຂ້ອງເຖິງການພົວພັນ ແລະການຮ່ວມມືລະຫວ່າງປະເທດ.
ສ່ວນເຈົ້າຫນ້າທີ່ໃນສຳນັກງານປາບປາມຢາເສບຕິດແຫ່ງຊາດໄທ (ປປສ.) ເປີດເຜີຍວ່າ: ສະພາບການລັກລອບຂົນສົ່ງ ແລະຂົນສົ່ງຢາເສບຕິດໃນເຂດອ່າງແມ່ນໍ້າຂອງ ນັບມື້ນັບຮ້າຍແຮງຂຶ້ນ ເຮັດໃຫ້ຕ້ອງໃຊ້ກໍາລັງທະຫານຫຼາຍຂຶ້ນເພື່ອສະກັດກັ້ນເຊັ່ນກັນ ແຕ່ການປະຕິບັດງານດັ່ງກ່າວ ຈະມີປະສິດທິພາບຫຼາຍຂຶ້ນ. ຖ້າຫາກມີການແລກປ່ຽນຂໍ້ມູນ-ຂ່າວສານກ່ຽວກັບການຄ້າຢາເສບຕິດສາກົນຢູ່ເຂດອ່າງແມ່ນ້ຳຂອງຢ່າງໃກ້ຊິດ. ດັ່ງທີ່ເຈົ້າຫນ້າທີ່ຂັ້ນສູງຂອງໄທ ໃຫ້ການຍືນຍັນວ່າ:
“ເຮົາພະຍາຍາມປະສານງານກັບປະເທດບ້ານໃກ້ເຮືອນຄຽງ ທາງດ້ານປະເທດມຽນມາ ແລະລາວ ກ່ຽວກັບວຽກງານຂ່າວ. ແລ້ວກໍມີເລື່ອງຕິດຕາມຈັບຜູ້ຄົນທີ່ມີໝາຍຈັບ. ເນື່ອງຈາກວ່າ ຢາທີ່ແຜ່ລາມມາຝັ່ງເຮົານີ້ ສ່ວນໜຶ່ງແມ່ນມາຈາກຄົນທີ່ມີໝາຍຈັບ ແລ້ວໄດ້ຫຼົບໜີໄປອີກຟາກໜຶ່ງ ແລະເປັນຜູ້ກະທຳຫຼັກໃນການຂົນສົ່ງ. ສ່ວນດ້ານຊາຍແດນ ຍັງໄດ້ປະສານສົມທົບກັບກອງກຳລັງຜາເມືອງ ໃນການເພີ່ມທະວີຄວາມເຂັ້ມງວດໃນການສະກັດກັ້ນ ບວກກັບການວິເຄາະຂ່າວເພື່ອເຮັດໃຫ້ຖືກຕ້ອງເທົ່າທີ່ຈະເຮັດໄດ້, ແຕ່ປັດຈຸບັນ ນໍ້າໜັກຈະມາທາງດ້ານແມ່ນ້ຳຂອງ. ຊຶ່ງພວກເຮົາຈະຕ້ອງຕິດຕາມສະຖານະການ ແລ້ວກະວິເຄາະ ພິຈາລະນາການໃຊ້ກໍາລັງເພື່ອໃຫ້ມັນສອດຄ່ອງ.”
ທັງນີ້ ທາງການໄທໄດ້ກວດພົບວ່າ ກຸ່ມຄ້າຢາເສບຕິດໃນລາວໄດ້ໃຊ້ drones ໃນການລັກລອບຂົນສົ່ງຢາເສບຕິດຂ້າມແມ່ນໍ້າຂອງ ຈາກລາວມາໄທເພີ້ມຂຶ້ນນັບມື້ ໂດຍສະເພາະບັນດາແຂວງ ທີ່ຕັ້ງຢູ່ກົງກັນຂ້າມກັບບັນດາແຂວງໃນພາກຕາເວັນອອກສຽງເໜືອ (ອີສານ) ຂອງໄທ ເປັນເຂດທີ່ມີການລັກລອບຂົນສົ່ງຢາເສບຕິດຈາກລາວມາໄທຫຼາຍທີ່ສຸດ. ໂດຍເຫັນໄດ້ຈາກການຈັບກຸມ ແລະຍຶດຢາເສບຕິດທີ່ເພີ່ມຂຶ້ນກວ່າ 130 ເທົ່າ ນັບຕັ້ງແຕ່ປີ 2023 ເປັນຕົ້ນມາ ແລະເຂດທີ່ຍຶດຢາເສບຕິດໄດ້ຫລາຍທີ່ສຸດນັ້ນ ແມ່ນເຂດຊາຍແດນແມ່ນ້ຳຂອງ ລະຫວ່າງແຂວງບໍລິຄຳໄຊກັບແຂວງນະຄອນພະນົມ.
ນັບແຕ່ປີ 2023 ຫາ ເດືອນສິງຫາ ປີ 2024, ທາງການໄທ ໄດ້ຈັບຕົວຜູ້ຄ້າຢາເສບຕິດກວ່າ 145,000 ຄົນ, ຍຶດຊັບສິນຂອງຜູ້ຄ້າຢາເສບຕິດໄດ້ 32 ຕື້ກວ່າບາດ, ຍຶດຢາບ້າ ແລະ ຢາໄອສ໌ກວ່າ 40 ໂຕນ ໃນຂະນະນັ້ນ, ເຈົ້າໜ້າທີ່ມຽນມາ ໄດ້ຈູດທຳລາຍຢາເສບຕິດ 610 ໂຕນ ພ້ອມກັນນັ້ນ, ຕຳຫຼວດລາວສາມາດສະກັດຈັບນັກຄ້າຢາເສບຕິດໄດ້ກວ່າ 18,900 ຄົນ, ຍຶດຢາບ້າກວ່າ 43 ໂຕນ, ສານເຄມີກວ່າ 340 ໂຕນ ແລະອຸປະກອນສື່ສານທັນສະໄໝກວ່າ 38,000 ລາຍການ.