ພາຍຸຫິມະຂະໜາດແຮງ ຊຶ່ງຄາດວ່າ ຈະເຮັດໃຫ້ສ່ວນໃຫຍ່ ຂອງພາກຕາເວັນອອກ ສຽງເໜືອຂອງສະຫະລັດເປັນອຳມະພາດ ໃນສອງມື້ຂ້າງໜ້ານີ້ ເລີ້ມພັດເຂົ້າຖະຫລົ່ມຫົວເມືອງໃຫຍ່ໆ ທີ່ສຳຄັນໆ ນັບແຕ່ນະຄອນຫຼວງວໍຊິງຕັນໄປເຖິງນະຄອນ Boston ໃນວັນຈັນວານນີ້.
ຄວາມຮ້າຍແຮງຂອງພາຍຸຫິມະ ແມ່ນໄດ້ພັດກາຍຂົງເຂດນະຄອນ
ຫຼວງວໍຊິງຕັນ ແຕ່ທາງພາກເໜືອຂຶ້ນໄປ ເຊັ່ນລັດ New Jersey,
New York, Connecticut, Rhode Island ແລະ Massache-
setts ແມ່ນໄດ້ປະກາດສະພາວະສຸກເສີນໃນ ດ້ານຫິມະ ຜູ້ຄົນ
ຈຳນວນຫຼາຍລ້ານຄົນ ໄດ້ຖືກຂໍຮ້ອງໃຫ້ຢູ່ກັບບ້ານກັບເຮືອນ
ໃນຂະນະນທີ່ລົດໄຟ Amtrak ໄດ້ລຸດຈຳນວນການໃຫ້ບໍລິການໜ້ອຍຖ້ຽວລົງ ໃນເຂດສາຍເໜືອ ແລະພວກສາຍການບິນຕ່າງກໍໄດ້ຍົກເລີກຖ້ຽວບິນຈຳນວນນັບຮ້ອຍ ໃນການຄະເນກ່ຽວກັບການພັດເຂົ້າຖະຫຼົ່ມຂອງພະຍຸຫິມະທີ່ຮ້າຍແຮງ ເລີ້ມແຕ່ວັນຈັນວານນີ້
ຈົນເຖິງເຊົ້າວັນພຸດມື້ອື່ນ.
ຄາດຄະເນວ່າ ຈະມີຫິມະຕົກລົງມາ ຫຼາຍເຖິງ 90 ຊັງຕີແມັດ ໃນເຂດພາກເໜືອຂອງ
ປະເທດ ພ້ອມກັນກັບລົມແຮງເກືອບເທົ່າກັບລົມເຮີຣິເຄນ ແລະພາໃຫ້ເກີດນ້ຳຖ້ວມໃນບໍລິເວນແຄມຝັ່ງທະເລ.
ໃນທົ່ວຂົງເຂດ ເຄື່ອງຂອງຕາມຮ້ານຕ່າງໆ ແມ່ນຂາຍຈົນໝົດກ້ຽງ ໂດຍພວກຜູ້ຄົນທີ່ອາ
ໄສຢູ່ໃນຂົງເຂດພາກັນຊຶ້ໄປກັກຕຸນໄວ້ ຊຶ່ງຮວມທັງອາຫານການກິນ ຊ້ວນ ເຄື່ອງປັ່ນໄຟຟ້າ ໃນຂະນະທີ່ຕຽມການຮັບມື ກັບການຢູ່ກັບບ້ານກັບເຮືອນທີ່ອາດເປັນໄປໄດ້ ໃນໄລຍະສອງສາມມື້ຂ້າງໜ້ານີ້.
ເຈົ້າຄອງນະຄອນນິວຢ໊ອກ ທ່ານ Bill de Blasio ໄດ້ກ່າວວ່າ ພາຍຸທີ່ວ່ານີ້ ອາດເປັນນຶ່ງໃນພາຍຸທີ່ຮ້າຍແຮງສຸດ ທີ່ທາງນະຄອນນິວຢ໊ອກໄດ້ປະເຊີນມາ ນຳໜ້າບັນຊີ ທີ່ເລີ້ມມາແຕ່ປີ 1872 ພຸ້ນ. ເຈົ້າໜ້າທີ່ໃນທົ່ວຂົງເຂດ ພາກັນກ່າວເຕືອນຜູ້ຄົນ ໃນການທີ່ຄາດຫວັງ
ວ່າຈະບໍ່ມີໄຟຟ້າໃຊ້ຢູ່ໃນທົ່ງຂົງເຂດ ຊຶ່ງອາດເປັນໄປໄດ້ໃນໄລຍະຫຼາຍໆມື້.
ຜູ້ປົກຄອງລັດ New York ທ່ານ Andrew Cuomo ທີ່ໄດ້ສັ່ງໃຫ້ງົດການເດີນທາງ ທີ່ເລີ້ມ
ແຕ່ຕອນເດິກຂອງວັນຈັນວານນີ້ ໃນສິບກວ່າຫົວເມືອງ ທີ່ອ້ອມແອ້ມນະຄອນນິວຢ໊ອກ.
ຜູ້ປົກຄອງນະຄອນ Boston ທ່ານ Martin Walsh ຮຽກຮ້ອງໃຫ້ຜູ້ຄົນພາກັນຊ່ອຍເຫຼືອ
ຊຶ່ງກັນແລະກັນ.
ຊຶຶ່ງທ່ານໄດ້ກ່າວວ່າ: “ພວກເຮົາຂໍຮ້ອງໃຫ້ຊາວ Boston ທຸກໆຄົນ ເບິ່ງແຍງ ຊ່ອຍເຫຼືອ
ເພື່ອນບ້ານ ຄືກັນກັບວ່າ ຄົນທີ່ທ່ານເຫັນຂ້າງນອກ ຫຼືຄົນທີ່ທ່ານຮູ້ຈັກ ບ້ານໃກ້ເຮືອນຄຽງ.”
ພາຍຸຫິມະທີ່ຮ້າຍແຮງສຸດໃນຂົງເຂດພາກຕາເວັນອອກສຽງເໜືອ ທີ່ວ່ານີ້ ຄາດວ່າ ຈະພັດ
ເຂົ້າຖະຫຼົ່ມໃນແລງວັນຈັນວານນີ້ ແຕ່ວ່າ ບັນດານັກພະຍາກອນອາກາດ ໄດ້ເຕືອນວ່າ ຫິມະຈະບໍ່ເຊົາຕົກ ຈົນຮອດເຊົ້າວັນພຸດມື້ອື່ນ.
ໃນນະຄອນຫຼວງວໍຊີງຕັນສະພາຕ່ຳ ໄດ້ຍົກເລີກການລົງຄະແນນສຽງທີ່ມີໝາຍກຳນົດໃສ່
ແລງວັນຈັນວານນີ້ແລະວັນອັງຄານມື້ນີ້. ອົງການສະຫະປະຊາຊາດໃນນະຄອນ New York ໄດ້ປິດລົງກ່ອນເວລາເຮັດວຽກ ໃນວັນຈັນວານນີ້ ແລະຍັງຈະປິດໃນວັນອັງຄານມື້ນີ້ ອີກເຊັ່ນ
ກັນ. ໂຮງລະຄອນຕ່າງໆໃນເຂດ Broadway ຂອງເກາະ Manhattan ນັ້ນແມ່ນໄດ້ປິດ
ລົງ ໃນແລງວັນຈັນວານນີ້.
ພາຍຸຫິມະ ຖະຫຼົ່ມ ພາກຕາເວັນອອກ ສຽງເໜືອ ສຫລ