ເຈົ້າໜ້າທີ່ອິນໂດເນເຊຍ ກ່າວວ່າ ນັກດຳນ້ຳຄົນນຶ່ງໄດ້ເສຍຊີວິດ ໃນຂະນະທີ່ກູ້ເອົາສິ້ນສ່ວນຊາກຖ້ຽວບິນ JT-610 ຂອງສາຍການບິນ Lion Air ທີີ່ຕົກລົງໃສ່ທະເລຈາວາ ບໍ່ເທົ່າໃດນາທີ ລຸນຫຼັງທີ່ໄດ້ບິນຂຶ້ນຈາກສະໜາມບິນຈາກາຕາ ໃນວັນຈັນແລ້ວ.
ທ້າວຊີຢັກຣູລ ອັນໂຕ ອາຍຸ 48 ປີ ຊຶ່ງເປັນຄົນສັນຊາດອິນໂດເນເຊຍ ໄດ້ເສຍຊີວິດໃນວັນສຸກວານນີ້. ເຈົ້າໜ້າທີ່ກ່າວວ່າລາວອາດເສຍຊີວິດຍ້ອນບັນຫາຄວາມກົດອາກາດ.
ທ້າວອັນໂຕ ໄດ້ໃຫ້ການຊ່ວຍເຫຼືອໃນຄວາມພະຍາຍາມເມື່ອໄວໆມານີ້ ທີ່ເມືອງປາລູ ທີ່ໄດ້ປະສົບກັບເຫດແຜ່ນດິນໄຫວ ແລະຟອງຍັກສຸນາມິ ໃນເດືອນກັນຍາຜ່ານມາ. ນອກນັ້ນແລ້ວ ລາວຍັງໄດ້ເຂົ້າຮ່ວມໃນການກູ້ໄພ ເຮືອບິນແອເອເຊຍຕົກ ເມື່ອເກືອບ 4 ປີກ່ອນ.
ພວກກູ້ໄພ ພວມກຽມເຮືອ ໄປບ່ອນທີ່ເຮືອບິນຕົກ
“ເປັນວິລະບຸຣຸດທີ່ສູງສົ່ງແທ້ໆ” ນັ້ນຄືຄຳເວົ້າ ທີ່ທ້າວໂຢເຊັຟ ຊາຟຣູດິນ ກ່າວເຖິງເພື່ອນຂອງລາວ ໃນຢູ່ເຟສບຸກ.
ພວກນັກດຳນ້ຳ ຂອງກອງທັບເຮືອອິນໂດເນເຊຍ ໄດ້ກູ້ເອົານຶ່ງໃນອັນທີ່ເອີ້ນວ່າ “ຫີບດຳ” ທີ່ບັນຈຸຂໍ້ມູນສຳຄັນ ກ່ຽວກັບການບິນຂຶ້ນເປັນເວລາສັ້ນໆຂອງເຮືອບິນລຳດັ່ງກ່າວ. ພວກດຳນ້ຳໄດ້ພົບເຫັນເຄື່ອງບັນທຶກຂໍ້ມູນ ໃນວັນພະຫັດຜ່ານມາ. ພວກເຂົາເຈົ້າຍັງສືບຕໍ່ຊອກຫາເຄື່ອງບັນທຶກສຽງ ຈາກຫ້ອງນັກບິນ.
ອຸບັດຕິເຫດດັ່ງກ່າວ ແມ່ນເປັນເທື່ອທຳອິດ ທີ່ພົວພັນກັບເຮືອບິນ ໂບອິ້ງ 737 ຮຸ້ນ MAX 8 ຊຶ່ງເປັນເຮືອບິນອາຍພົ່ນໂດຍສານຮຸ້ນໃໝ່ ປະຢັດນໍ້າມັນ ທີ່ມີຊື່ດັງ.
ກະຊວງຂົນສົ່ງຂອງອິນໂດເນເຊຍ ໄດ້ສັ່ງໃຫ້ທຳການກວດກາເບິ່ງເຮືອບິນໂບ ອິ້ງ 737 ຮຸ້ນ MAX 8 ທີ່ມີຢູ່ທັງໝົດ.
ສາຍການບິນ Lion Air ໄດ້ສັ່ງຊື້ເຮືອບິນໃໝ່ຮຸ້ນດັ່ງກ່າວ ຈຳນວນ 50 ລຳ ຊຶ່ງລຳນຶ່ງໆແມ່ນ
ມີລາຄາ 6 ພັນ 200 ລ້ານໂດລາ.
ຫົວໜ້າບໍລິຫານຂອງສາຍການບິນ Lion Air ທ່ານເອັດເວີດ ຊີເຣຕໄດ້ແຈ້ງໃຫ້ພວກນັກ
ຂ່າວຊາບວ່າ ເຮືອບິນລຳທີ່ປະສົບອຸບັດຕິເຫດດັ່ງກ່າວ ໄດ້ຖືກນຳໃຊ້ແຕ່ພຽງສອງເດືອນ
ເທົ່ານັ້ນ ແລະກໍໄດ້ປະສົບກັບບັນຫາທາງດ້ານເຕັກນິກ ໃນລະຫວ່າງການບິນຈາກເກາະ
ຕາກອາກາດ ບາຫລີ ໄປຍັງນະຄອນຫຼວງຈາກາຕາໃນຄືນກ່ອນ ແຕ່ບັນຫາດັ່ງກ່າວກໍໄດ້
ຮັບການແກ້ໄຂໄປ ແລ້ວ ຕາມລະບຽບການທີ່ໄດ້ຕັ້ງໄວ້.
ກະຊວງຂົນສົ່ງອິນໂດເນເຊຍ ໄດ້ສັ່ງໂຈະການປະຕິບັດໜ້າທີ່ ຂອງຜູ້ອຳນວຍການດ້ານ
ເຕັກນິກຂອງ Lion Air ແລະພວກນາຍຊ່າງ ທີ່ກວດສອບໃຫ້ເຮືອລຳດັ່ງກ່າວ ບິນປະຕິ
ບັດງານໄດ້.
ຜູ້ໂດຍສານແລະຈຸບິນທັງໝົດ 189 ຄົນ ໄດ້ເສຍຊີວິດ ໃນອຸບັດຕິເຫດເຮືອບິນຕົກ.