ໃນຂະນະທີ່ສະມາຊິກພັກເດໂມແຄຣັດ ພະຍາຍາມທີ່ຈະຄວບຄຸມຜົນກະທົບ ກ່ຽວກັບ ການຮົ່ວໄຫຼຂອງອີເມລທີ່ເປັນຕາອັບອາຍຂາຍໜ້ານັ້ນ, ຫຼາຍຄົນພາຍໃນພັກ ແມ່ນກຳລັງ ພະຍາຍາມທີ່ຈະຫັນຄວາມສົນໃຈໄປໃສ່ຄູ່ປໍລະປັກ ທີ່ມີຄວາມຄຸ້ນເຄີຍເຊັ່ນ ຣັດເຊຍ.
ພວກເຈົ້າໜ້າທີ່ລະດັບສູງຂອງທ່ານນາງ Clinton ໃນວັນຈັນວານນີ້ໄດ້ເອົາບາດກ້າວພິ ເສດ ໂດຍກ່າວຫານັກເຈາະຂໍ້ມູນ ຣັດເຊຍ ໃນການພະຍາຍາມທີ່ຈະເຂົ້າແຊກແຊງໃນ ການເລືອກຕັ້ງສະຫະລັດ ໂດຍການ ເປີດເຜີຍ ອີເມລຕ່າງໆຂອງຄະນະກຳມະການແຫ່ງ ຊາດຂອງພັກເດໂມແຄຣັດ.
ພວກປະທ້ວງເດີນທາງເຂົ້າໄປໃນເມືອງ ເມື່ອວັນທີ 25 ກໍລະກົດ 2016 ໃນນະຄອນ Philadelphia ໃນລະຫວ່າງ ມື້ທຳອິດຂອງກອງປະຊຸມຫຼວງແຫ່ງຊາດຂອງພັກ ເດໂມແຄຣັດ.
ນັກວາງແຜນຍຸດທະສາດອາວຸໂສຂອງພັກບາງຄົນ ແລະ ອະດີດຜູ້ຊ່ວຍເຫຼືອທ່ານນາງ Clinton ໄດ້ສະເໜີວ່າ ການໂຄສະນາຫາສຽງຂອງທ່ານນາງ Hillary Clinton ຈະສືບຕໍ່ ທີ່ຈະໃຊ້ບັນຫາດັ່ງກ່າວນີ້ເພື່ອຕັ້ງຄຳຖາມ ກ່ຽວກັບຄວາມສຳພັນຂອງທ່ານ Trump ກັບ ມົສກູ.
ເວັບໄຊທ໌ Wikileaks ໄດ້ເປີດເຜີຍອີເມລຂອງຄະນະກຳມະການແຫ່ງຊາດພັກເດໂມ ແຄຣັດ 20,000 ສະບັບໃນສັບປະດາທີ່ຜ່ານມາ, ກ່ອນການເລີ່ມຕົ້ນຂອງກອງປະຊຸມຫຼວງ ຂອງພັກບໍ່ດົນ ເຊິ່ງໄດ້ເລີ່ມຂຶ້ນໃນວັນຈັນວານນີ້ ທີ່ນະຄອນ Philadelphia.
ອີເມລ 20,000 ສະບັບ ໄດ້ຢືນຢັນເຖິງຄວາມເປັນຫ່ວງຂອງຜູ້ສະໜັບສະໜູນສະມາຊິກ ສະພາສູງລັດ Vermont ທ່ານ Bernie Sanders, ທີ່ກ່າວຫາວ່າ ພັກໃຫ້ການສະໜັບສະ ໜູນຕໍ່ທ່ານນາງ Clinton.
ແມ່ຍິງຄົນໜຶ່ງນຸ່ງເສື້ອຍືດທີ່ມີຕົວໜັງສືອ່ານວ່າ "Trump Putin `16" ໃນຂະນະທີ່ລໍຖ້າຜູ້ລົງແຂ່ງຂັນ ເອົາຕຳແໜ່ງປະທານາທິບໍດີຈາກພັກ ຣີພັບບລີກັນ ທ່ານ Donald Trump ໃນງານໂຄສະນາຫາສຽງ ທີ່ມະຫາວິທະຍາໄລລັດ Plymouth ໃນເມືອງ Plymouth ລັດ New Hampshire. 7 ກຸມພາ 2016.
Wikileaks ເຊິ່ງເປັນກຸ່ມສະໜັບສະໜູນຄວາມໂປ່ງໃສ, ບໍ່ໄດ້ເປີດເຜີຍແຫຼ່ງທີ່ມາຂອງອີ ເມລທີ່ຮົ່ວໄຫຼອອກມານັ້ນ. ແຕ່ຫຼາຍໆຄົນໄດ້ຊີ້ໄປຫາ ຣັດເຊຍ, ຫຼັງຈາກຄະນະກຳມະການແຫ່ງຊາດພັກເດໂມແຄຣັດ ໄດ້ກ່າວໃນເດືອນທີ່ແລ້ວນີ້ວ່າ ພວກເຈາະຂໍ້ມູນ ຣັດເຊຍ ໄດ້ເຈາະເຂົ້າໄປໃນລະບົບຂອງພວກເຂົາເຈົ້າ.
ພວກນັກຂ່າວໄດ້ຖາມລັດຖະມົນຕີກະຊວງການຕ່າງປະເທດ ຣັດເຊຍ ທ່ານ Sergey Lavrov ກ່ຽວກັບ ການກ່າວຫາປະເທດຂອງທ່ານ ທີ່ມີສ່ວນຮ່ວມໃນການລັກຈາກຂໍ້ມູນ ຫຼັງຈາກໄດ້ພົບປະກັບລັດຖະມົນຕີການຕ່າງປະເທດ ສະຫະລັດ ທ່ານ John Kerry ທີ່ ກອງປະຊຸມສະ ມາຄົມບັນດາປະຊາຊາດເຂດເອເຊຍຕາເວັນອອກສຽງໃຕ້ ຫຼື ASEAN ທີ່ນະຄອນຫຼວງວຽງຈັນ ຂອງ ລາວ. ເມື່ອທ່ານໄດ້ຫຼີກລ່ຽງ ການຕອບຄຳຖາມໂດຍກົງຕໍ່ ບັນຫາດັ່ງກ່າວ, ທ່ານ Lavrov ໄດ້ກ່າວວ່າທ່ານ “ບໍ່ຢາກໃຊ້ຄຳເວົ້າທີ່ມີພະຍັນຊະນະ ສີ່ຕົວ.”