ລັດຖະບານຄິວບາຮຽກຮ້ອງໃຫ້ສະຫະລັດດຳເນີນການພີ້ມຕື່ມເພື່ອຫລຸດຜ່ອນຄວາມກົດດັນທາງດ້ານເສດຖະກິດຕໍ່ປະເທດຂອງຕົນ ຫລັງຈາກໄດ້ມີການປັບປຸງຄວາມສຳພັນລະ ຫວ່າງວໍຊິງຕັນແລະຮາວານາ ໂດຍກ່າວວ່າ ການລົງໂທດ ທາງດ້ານເສດຖະກິດຂອງສະ ຫະລັດໄດ້ສ້າງຄວາມເສຍຫາຍໃຫ້ແກ່ຄິວບາ 4 ພັນ 600 ລ້ານໂດລາໃນສົກງົບປະມານ ປີກາຍນີ້.
ລັດຖະມົນຕີການຕ່າງປະເທດຄິວບາ ທ່ານ Bruno Rodriguez ໄດ້ໃຫ້ຄວາມເຫັນດັ່ງ ກ່າວ ໃນກອງປະຊຸມຖະແຫຼງຂ່າວ ເນື່ອງໃນວັນຄົບຮອບການລິເລີ້ມໃນການປຸກລະດົມ ປະຈຳປີສຳລັບການລົງມະຕິອົງການສະຫະປະຊາຊາດທີ່ໄດ້ປະນາມການລົງໂທດຂອງສະຫະລັດຕໍ່ປະເທດເກາະດອນທີ່ພວມປະສົບກັບບັນຫາທາງດ້ານການເງິນນັ້ນ.
ທ່ານ Rodriguez ເອີ້ນການລົງໂທດຂອງສະຫະລັດວ່າ “ເປັນສາເຫດສຳຄັນຕໍ່ບັນຫາທາງດ້ານເສດຖະກິດແລະອຸບປະສັກຕໍ່ການພັດທະນາ.”
ທ່ານກ່າວວ່າ 55 ປີທີ່ການຂວ້ຳບາດເລີ້ມມີຜົນບັງຄັບໃຊ້ມັນໄດ້ສ້າງຄວາມເສຍຫາຍໃຫ້ແກ່ຄິວບາ 125.9 ຕື້ໂດລາ. ຕົວເລກນີ້ແມ່ນຮວມທັງຄວາມເສຍຫາຍທີ່ແທ້ຈິງເຊັ່ນການປັບໃໝຕໍ່ຄູ່ການຄ້າຄິວບາ ແລະຕົວເລກສົມມຸດຖານເຊັ່ນການຂາຍຂອງທຸລະກິດຕ່າງໆຄິວບາ ທີ່ອາດມີຂຶ້ນຢູ່ໃນຕະຫລາດສະຫະລັດ.
ນັບຕັ້ງແຕ່ຄິວບາແລະສະຫະລັດໄດ້ສ້າງຕັ້ງຄວາມສຳພັນທາງດ້ານການທູດຄືນໃໝ່ໃນ ການເຄື່ອນໄຫວທີ່ບໍ່ຄາດຄິດ ເມື່ອເດືອນທັນວາປີ 2014 ປະເທດທັງສອງເປີດສະຖານ ທູດ ຟື້ນຟູຖ້ຽວບິນພານິດ ຫຼຸດຜ່ອນຂໍ້ຈຳກັດຮັດແຄບ ໃນການເດີນທາງ ແລະໄດ້ມີການເຈລະຈາທາງດ້ານການຄ້າ ສິ່ງແວດລ້ອມ ແລະຂໍ້ຕົກລົງທາງດ້ານການສື່ສານ.
ແຕ່ສະຫະລັດຍັງບໍ່ທັນໄດ້ຍົກເລີກໂດຍເຕັມໃນການຫ້າມຄ້າຂາຍກັບຄິວບາ ຊຶ່ງເປັນສິ່ງ ທີ່ມະຕິແບບບໍ່ມີຜົນບັງຄັບ ຂອງສະມັດຊາໃຫຍ່ ສະຫະປະຊາຊາດ ໄດ້ຮັບຮອງເອົາໃນ ທຸກໆປີນັບແຕ່ປິ 1992 ເປັນຕົ້ນມາ. ຄິວບາແມ່ນເປັນແຮງກົດດັນທີ່ສຳຄັນຢູ່ເບື້ອງຫລັງມະຕິດັ່ງກ່າວ ແລະກໍໄດ້ຮັບການສະໜັບສະໜຸນຢ່າງຖ້ວມລົ້ນຈາກປະເທດຕ່າງໆ.